Bubambe Bupya bwa Muswaangano Waalubazu

Kwiinda mukuyumizigwa amuuya uusalala, Banakristo bakusaanguna bakasolekesya kubeleka canguzu kukambauka makani mabotu kusikila mpobagolela. (Inc. 1:8; Kol. 1:23) Pulogilamu yamuswaangano waalubazu wamwaka wamulimo wa 2007 iijisi mutwe wakuti, ‘Amujate Bubi a Jwi lya Leza,’ iyootugwasya kwiiya zikozyanyo zyabo zibotu kapati.—Inc. 18:5.

Kaamba Jwi lya Leza, Mwami Davida wakati: “Bukamboni bwa-Jehova bulasyomeka, bulasongwaazya batezi.” (Int. 19:7) Pulogilamu yakabambwa kabotu yamuswaangano waalubazu wamu 2007 iyookankaizya bubotu bwa Magwalo “kukuolola” alimwi iyootukulwaizya kubelesya Jwi lya Leza mukukambauka amukuyiisya cakubindaana. (2 Tim. 3:16, 17) Pulogilamu mpya iyootutondezya mbotukonzya kutantamuka ntenda alimwi akugwasyigwa kwiinda mukubelesya njiisyo zyamu Bbaibbele mubuumi bwesu. Alimwi iyootugwasya kubelesya Jwi lya Leza mukugwasya bakubusi alimwi abapya kuya ambele kumuuya.

Amubone kuti mwaakujanika ciindi pulogilamu yaakutalika alimwi kamuswiililisya. Amukalembe twaambo ntomukonzya kubelesya kumugama. Amukaswiilile kapati kumalailile ayootambulwa alimwi amukatelaike mbomuyanda kuzibelesya zintu nzyomwakaiya.

Pulogilamu yamuswaangano waalubazu iyootugwasya kulumba kapati ku Jwi lya Leza, kutwiibalusya kuzumanana kutazungaana mukukambauka makani mabotu aa Bwami cabusungu alimwi akututondezya mbotukonzya kugwasya bamwi kucita mbubwenya. Aboobo, amukanze kutayooindwa malailile aakumuuya aali oonse Jehova ngapa mumbazu eeyi!—Is. 30:20b, 21.