Pulogilamu Mpya ya Muswaangano Waalubazu Wabuzuba Bomwe
Imutwe wapulogilamu mpya yamuswaangano waalubazu ikuzwa mu September ngwakuti, “Zyoonse [eezi Zicitwe] nkaambo ka-Makani Mabotu.” (1 Kor. 9:23) Makani mabotu aa Bwami ngamakani mapati kapati aamvwugwa sunu. Eeyi pulogilamu iyootugwasya kuteelela coolwe cilibedelede ncotujisi icakuba batumwa bamakani aaya mabotu kapati. Alimwi iyootuyumya kuzumanana kwaambilizya makani aya cakutaleka.—Inc. 5:42.
Ipulogilamu iyootutondezya mbotunga twabelesya lwiiyo lwesu lwa teokrasi kabotu kutegwa tuzwidilile mumulimo wesu. Tuyoomvwa bamwi ibacinca buumi bwabo ikutegwa bayungizye mulimo wabo, ikubikkilizya abakubusi ibali mukubeleka anguzu zyabo zyoonse kutolaa mbele makani mabotu.—Amukozyanisye Ba-Filipi 2:22.
Makani mapati aayoobandikwaa mwaambi uuswaya ayootondezya mbokuyandika kuti tucaale ‘katweelela kuba batumwa bamakani mabotu.’ (1 Tes. 2:4) Tuyoogwasigwa kubona kuti cilayandika kuzumanana kutobela zyeelelo zya Leza alimwi amilawo yakwe mukuyeeya kwesu alimwi amubukkale ikuti katuyanda kuti tuzumanane kubaa coolwe cakutola lubazu mukukambauka makani mabotu kubantu. Zileleko nzyotujana kwiinda mukucita boobo azyalo ziyoobandikwa.
Mutakabi nomukakilwa kujanika kupulogilamu eyi. Aabo bazwaa kulyaaba ino-ino ibayanda kuti bakabbapatizigwe kumuswaangano oyu waalubazu wabuzuba bomwe beelede bazibye mulangizi weendelezya mpoona-mpoona. Amubatambe boonse mbomwiiya limwi kuti bakajanike. Atuzumizye Jehova kuti atuyumye kutegwa tucite zintu zyoonse akaambo kamakani mabotu, eci ciyootugwasya kumanizya mulimo oyu mupati kwiinda milimo yoonse kaitanasika Harmagedoni.