‘Akucitwe Kuyanda kwa Leza’
1. Ino ujisi mutwe nzi muswaangano waalubazu wamwaka wamulimo wa 2012, alimwi nkaambo nzi ncociyandika kuti twaalange-lange makani aaya?
1 Twakalengwa akaambo kakuyanda kwa Jehova. (Ciy. 4:11) Aboobo, cilakonzya kutwaalila kuzuzikizya makanze ngotuponena kakunyina kwiiya akucita kuyanda kwa Leza. Eeci tacili cuuba-uba kucita akaambo kakuti tulwana “zisusi zyanyama amizeezo yesu” naa kuyanda kucita “kuyanda kwabamasi.” (Ef. 2:3; 1 Pe. 4:3; 2 Pe. 2:10) Ikuti kakunyina lugwasyo luzwa kuli Leza, tulakonzya ‘kujatwa katulanga a Diabolosi kutegwa tucite kuyanda kwakwe.’ (2 Ti. 2:26) Pulogilamu yamuswaangano wesu waalubazu yamwaka wamulimo wa 2012 iyoogwasya umwi aumwi wesu kubeleka kweelana akulomba kwatatu kuli mumupailo wacikozyanyo. (Mt. 6:9, 10) Ujisi mutwe wakuti, “Akucitwe Kuyanda kwa Leza.”
2. Mibuzyo nzi iiyooingulwa kumuswaangano?
2 Mibuzyo Iiyooyingulwa: Mwanooswiilila pulogilamu, amujane bwiinguzi kumibuzyo eeyi: Ino ncinzi cimbi ciyandika ncotweelede kucita kunze lyakuswiilila Jwi lya Leza? Mbuti mbotukonzya kuzumanana kumvwisya ncayanda Leza kulindiswe? Nkaambo nzi ncotweelede kuba aluyandisisyo lwakubagwasya bantu bamisyobo yoonse? Mbuti mbomukonzya kujana buumi bujisi mpindu? Nobakubusi, ncinzi ncomweelede kumutondezya Jehova? Ino mbulumbu nzi mbotukonzya kujana akaambo kakucita kuyanda kwa Leza? Nkaambo nzi ncociyandika kapati lino kuyumya akukulwaizya bamwi?
3. Mbuti mbotukonzya kugwasyigwa abubambe oobu bwakumuuya?
3 Amukajanike alimwi akubikkila maano kupulogilamu. Kulangilwa kuti kunooli uyooiminina Bbeteli naa mulangizi weendeenda kali mwaambi uuswaya. Kautanatalika muswaangano naa nowamana, amwaanguluke kwiizya anguwe alimwi amukaintu wakwe, ikuti kakwete. Mwaakupiluka kuŋanda, mutakabi ‘basikumvwa buyo baluba,’ pele amukainduluke nzyomwaiya mbuli mukwasyi alimwi akubandika mbomukonzya kubeleka kweelana akuyanda kwa Leza.—Jak. 1:25.
4. Nkaambo nzi ncociyandika kuti kucita kuyanda kwa Leza tukubikke mubusena bwakusaanguna?
4 Lino-lino aabo babikkila buyo maano kuzyintu nzyobalombozya alimwi akukaka kucita kuyanda kwa Jehova bayoonyonyoonwa. (1 Jo. 2:17) Aboobo tulalumba kuti Jehova watubambila makani aaya aciindi ceelede kuti tugwasyigwe kubikka mubusena bwakusaanguna kucita kuyanda kwa Leza!