Amuswiilile Akwiiya
1. Nkaambo nzi ncokuyandika kusoleka canguzu kutegwa tuswiilile akwiiya kumuswaangano wacooko?
1 Ino-ino, miswaangano yacooko yamu 2013 iyootalika. Kwabelekwa kale milimo minji kulibambila pulogilamu eeyi yalo iijisi makani aajatikizya nzyobayandika bakwesu abacizyi munyika yoonse. Sena mwakatalika kale kulibambila kutegwa mukajanike kumuswaangano mazuba oonse otatwe? Miswaangano mipati ilakonzya kuba azyintu zinji zinyonganya, aboobo kuyandika kusoleka canguzu kubikkila maano kupulogilamu. Mbwaanga zibeela zitola ciindi cilamfwu kwiinda miswaangano yambungano, kuyandika kuzumanana kubikkila maano. Kuyungizya waawo, kweenda alimwi azyintu zimwi zilakonzya kutupa kukatala. Ino ncinzi ciyootugwasya kuzumanana kubikkila maano kutegwa tuswiilile akwiiya?—Dt. 31:12.
2. Ino inga twalibambila buti mumoyo kujatikizya pulogilamu yamuswaangano wacooko?
2 Kautanatalika Muswaangano: A Web site yesu iizumizyidwe ya www.jw.org, kulabikkwa kapulogilamu kamuswaangano, kalo kajisi mitwe yamakani yoonse alimwi alugwalo lomwe naa obilo aajisi twaambo tupati-pati twamakani amwi aamwi. Ikuti kamukonzya kubelesya Intaneti, kulanga-langa twaambo ootu ciyootugwasya kulibambila mumoyo kujatikizya zyintu ziyakuyiigwa. (Ezr. 7:10) Ciindi nomucita kukomba kwamumukwasyi, sena inga tiimwabandika pulogilamu yamuswaangano kutegwa boonse bamumukwasyi wanu kabaulangila muswaangano wacooko uuboola kumbele?
3. Ino ncinzi ciyootugwasya kubikkila maano kuswiilila?
3 Ciindi Capulogilamu: Kuti kacikonzyeka, cilayandika kuunkila limwi kucimbuzi kaitanatalika pulogilamu. Amwiizime fooni yanu kutegwa mutanyonganizyigwi abasikumutumina naa basikumulembela tugwalo naa kusunkwa kuti andinywe mubalembele kagwalo bamwi ciindi capulogilamu. Kuti kamuyanda kuti mutaizimi fooni yanu, amwiisetiŋe munzila iitakonzyi kunyonganya bamwi ciindi muntu naamutumina. Kuti kamubelesya electronic tablet (kakkompyuta kasyoonto) ciindi capulogilamu, amucite oobo munzila iitanyonganyi bamwi. Tamweelede kulya naa kunywa ciindi capulogilamu. (Muk. 3:1) Amubikkile maano kulanga mwaambi. Ciindi lugwalo nolubalwa, amutobelezye mu Bbaibbele lyanu. Kamulemba twaambo tupati-pati.
4. Ino bazyali inga babagwasya buti bana babo kuswiilila akwiiya?
4 Tuyanda kuti abalo bana besu bakaswiilile akwiiya. Lugwalo lwa Tusimpi 29:15 lwaamba kuti: “Mwana uulekwa buyo ujazya banyina nsoni.” Aboobo, cili kabotu kuti mikwasyi kaikkala antoomwe kutegwa bazyali kababona kuti bana balabikkila maano kupulogilamu kutali kwiile kubandika, kulemba tugwalo twaafooni, naa kweendeenda. Nokuba kuti tabakonzyi kumvwa zyoonse zyaambwa akaambo kuti bacili baniini, bana inga bayiisyigwa kuswiilila akukkala kabaumwine wi.
5. Nkaambo nzi ncocigwasya kwiinduluka nzyotwakaiya, alimwi ino inga twacita buti oobo?
5 Noyamana Pulogilamu Yabuzuba Bumwi Abumwi: Mutanoomuki koona. Amufwambaane koona kutegwa mulyookezye. Kwiinduluka nzyomwaiya ciyoomugwasya kuziyeeya kwaciindi cilamfwu. Aboobo, inga camugwasya kwiinduluka pulogilamu yabuzuba oobo mbuli mukwasyi mumaminiti masyoonto ciindi cakumangolezya buzuba abuzuba. Ikuti nywebo abeenzinyoko kamuunka kubusena nkobasambala zyakulya, inga cabota kubwezelezya akabbuku nkomwali kulembela twaambo tupati-pati kutegwa mukabandike aabeenzinyoko kaambo komwe naa tobilo twamukkomanisya kapati. Ciindi nomwapiluka kuŋanda wamana muswaangano, mulakonzya kubelesya ciindi cilimbocibede ciindi Cakukomba Kwamukwasyi kutegwa mubandike mbuli mukwasyi mbomukonzya kubelesya zyintu nzyomwakaiya. Alimwi nsondo ansondo inga mwabikka ciindi cakwiinduluka cibeela cimwi cabbuku lili lyoonse lipya.
6. Sena kujanika buyo amuswaangano kulizulide? Amupandulule.
6 Kujanika kupobwe inga tiikwagwasya kapati ccita kuti cakulya caligwa alimwi akugaigwa. Ncimwi buyo apobwe lyakumuuya ndyotunoojisi kumuswaangano wacooko. Atukagwasyigwe kwiinda mukuyoojanika kupulogilamu yoonse yamuswaangano, kuswiililisya alimwi akuzicita nzyotuyakwiiya.