“Bunganya Bantu”
1. Ino miswaangano yacooko ayamasi ikozyenye buti ayooyo ngobakali kunooyeeya lyoonse bana Israyeli ngobakajisi nokwakainda buyo ciindi cisyoonto nobakazwa mu Egepita?
1 Nokwakainda buyo ciindi cisyoonto kuzwa nobakazwa mu Egepita, Jehova wakaambila Musa kuti ‘abunganye bantu’ a Cilundu ca Sinai kuti baswiilile majwi aakwe kutegwa kabamuyoowa akuyiisya bana babo nzila zyakwe. (Dt. 4:10-13) Kweelede kuti ooyu wakali muswaangano iwakayumya lusyomo lwabo ngobakali kunooyeeya lyoonse! Mumyezi misyoonto iiboola kumbele, bantu ba Jehova bayooswaangana amiswaangano yacooko alimwi ayamasi kutegwa bakayiisyigwe a Jehova. Ino ncinzi ncotweelede kucita kutegwa tukagwasyigwe kapati?
2. Ncinzi ncotweelede kucita kutegwa ‘tulibambile’ kuyoojanika kumuswaangano?
2 ‘Amulibambile’: Jehova wakalailila bana Israyeli kuti ‘balibambile’ muswaangano ngobakali kunooyeeya lyoonse iwakali kuyoocitikila a Cilundu ca Sinai. (Kul. 19:10, 11) Mbubwenya buyo, cilayandika kuti balibambile kabotu boonse aabo bayoojanika kumuswaangano wacooko, ikutali buyo baabo ibayootola lubazu mupulogilamu. Mucikozyanyo, banji bayooyanda kulomba mazuba aakulyookezya kuli basikubanjizya milimo. Ambweni bukkale bwanu bulikozyenye aboobo mbwaakajisi Nehemiya. Wakali kuyanda kuti auleke mulimo wakukutaukila Mwami Aritasasta kutegwa aunke ku Jerusalemu kuyoogwasyilizya kuyakulula bulambo, pele wakalizyi kuti ambweni mwami tanaakali kuyoozumina. Nehemiya wakapaila, mpoonya cabusicamba acabulemu wakamwaambila mwami kulomba kwakwe. Mwami wakamuzumizya kuti aunke alimwi buya wakagwasyilizya mumulimo wakuyaka. (Neh. 2:1-9) Kunze lyakulomba mazuba kuli basikumunjizya mulimo, sena mwazyiba kale mbomuyakweenda alimwi ankomuyookkala? Baalu bayookkomana kugwasya uuli woonse uuyandika lugwasyo. Amulibambile kunoosika kaatanatalika mapulogilamu buzuba abuzuba alimwi ‘akuyoobikkila maano kapati’ kuzintu nzyomuyoomvwa.—Heb. 2:1.
3. Ncinzi ciyootugwasya kulibambila mumoyo wesu kujatikizya muswaangano?
3 Acimwi ciyandika kapati kutegwa katulibambilide, cibikkilizya kulibambila mumoyo kutegwa tukacikonzye kuswiilila alimwi akwiiya. (Ezr. 7:10) Pulogilamu yamuswaangano iyoobikkwa a Web site yesu ya jw.org kakucili ciindi alimwi inoojisi mitwe yamakani oonse kubikkilizya alugwalo lomwe naa obilo abuzuba buli boonse. Eeci citugwasya kuba atwaambo tubotu ntotukonzya kulanga-langa ciindi ca Kukomba Mumukwasyi mumvwiki zisyoonto kautanatalika muswaangano nkoyeelede kuunka mbungano yanu. Basikumwaya bamwi balasimba kapepa kapulogilamu alimwi akukabelesya kulemba twaambo ciindi camuswaangano.
4. Mbuti bazyali mbobakonzya kubelesya muswaangano wacooko kuyiisya bana babo?
4 ‘Amuyiisye Bana Banu’: Kaambo kamwi ncowakacitilwa muswaangano waa Cilundu ca Sinai kakali kakuti bazyali bana Israyeli ‘bayiisye bana babo.’ (Dt. 4:10) Muswaangano upa bazyali coolwe cibotu cakucita mbubwenya. Bazyali beelede kukkala abana babo ciindi muswaangano noucitwa akubagwasya kuti kabaswiilila. Kumamanino aabuzuba buli boonse alimwi aciindi nobayookomba mumukwasyi, mikwasyi inga yalanga-langa pulogilamu antoomwe.
5. Ino kujanika kumuswaangano uubola kuyootugwasya buti?
5 Muswaangano ngobakali kunooyeeya lyoonse waa Cilundu ca Sinai, wakagwasya bana Israyeli kutondezya kulumba coolwe citaliboteli ncobakajisi cakuba bantu ba Leza. (Dt. 4:7, 8) Muswaangano wesu uuboola ubambilidwe kutugwasya munzila njiyonya. Kwamazuba otatwe tatunooli munyika ya Saatani mbyaabi pele tunookkomene akukatalusyigwa kumuuya alimwi akuyanzana abakwesu munzila iikulwaizya. (Is. 35:7-9) Buzuba bwa Jehova mbobuyaabuswena, tutakaindwi coolwe cakuswaangana antoomwe kutegwa tukakulwaizyanye!—Heb. 10:24, 25.