Miswaangano Yazyooko Ayaakati Kamasi ya “Kupona Munzila Njayanda Leza” ya 1998
1 Ibbuku lya Tusimpi 10:29 lituyeezya kuti “inzila ya-Jehova nciyubilo ciyumu.” Elo uleelela kaka mutwe wamuswaangano wamwaka uno wa—“Kupona Munzila Njayanda Leza”! Ino mbuti mutwe ooyu mbouyoobandikwa mupulogilamu yoonse yamazuba otatwe? Toonse tulalangila cabusungu kuzintu nzyotwabambilwa. Itwaambo tupati-pati tuyoobandikwa.
2 Tatukasowi Ciindi Kujanika: Bunji bwabakwesu muno mu Afulika bainda mumapenzi manji akaambo kankondo alimwi amanyongwe izili mumasena amwi aanyika eyi. Imiswaangano yabantu ba Jehova baibona kuti njiijisilidi maumi aabo. Kutegwa bakajanike amuswaangano bamwi baleenda misinzo milamfwu, pele kwiina nobalombozya kutajanika amuswaangano nouba omwe. Mucisi ca Democratic Republic of Congo (cakali kwiitwa kuti Zaire) imukwesu uulaamyaka yakuzwalwa iili 73 wakeenda makkilomita aasika ku 450 kutegwa akajanike aamuswaangano. Wakaakusika kubusena obo nokwakainda mazuba aali 16, nkujana zituta zyakwe zyazimba cini-cini, pele wakali kkomene kuti wakasika kubusena obo. Nowakamana muswaangano, kakkomene cini-cini akuyumizigwa munzila yakumuuya, wakalutalika lwakupilukila kumunzi wakwe amaulu. Oobu mbwacita lyoonse kwamyaka iili mbwiibede!
3 Mucisi ca Mozambique imulangizi wacooko amukaintu wakwe bakatanta mulundu mulamfwu alimwi bakakosola busena bumwi bupati buli mbuli cimpayuma kabeenda amaulu kuyoojanika kumuswaangano wabbazu. Bakaweenda musinzo wamakkilomita aali 90 mumawoola aali 45. Ibakajanika boonse bakakulwaizigwa kapati acikozyanyo cabanabukwetene aba. Imikwasyi minji yabakajanika abalo bakeenda misinzo milamfwu kutegwa bajanike. Mulangizi wacooko wakaluula kuti bakwesu bamwi kubikkilizya aumwi uulaamyaka yakuzyalwa iili 60, bakeenda musinzo wamakkilomita aali 200 amaulu!
4 Sena mwalibambila kabotu kuyoojanika amuswaangano wakono? Tacilangilwi kuti muyooyenda misinzo milamfwu kapati, pele muyooyandika kusoleka canguzu alimwi akulisungula kutegwa nywebo alimwi amukwasyi wanu mukajanike. Amulibambile kuyoojanika kupulogilamu yoonse kuzwa kumatalikilo kusikila kumamanino. Basikwiiya Bbaibbele ibanji bali mukuyaambele kutegwa balyaabe. Ikuti naa bajanika amuswaangano, bayoogwasigwa kusala ntaamu yeelede. Sena mwabatamba mbomwiiya limwi Bbaibbele abamwi ibalaa luyandisisyo kuti bakajanike?
5 Ipulogilamu Yamazuba Otatwe: Kono ipulogilamu iyoocitwa mumiswaangano iili 52 mu Zambia. Miswaangano iyoocitwa mu Chichewa, Chitonga, Cibemba, Cingisi, Cilubale alimwi a Cilozi. Mulimo Wesu Wabwami wa April 1998 ulijisi mulongo wamadeeti alimwi amasena kuyoocitilwa miswaangano eyi. Ipulogilamu yamuswaangano iyoojatikizya kuluula mbuli mbwali mukuulongezya mulimo Jehova muzilawo zinji.
6 Ikulailila Kwaalubazu: Cilayandika kapati kuti mukajanike kumuswaangano mbungano yanu nkoyaambilidwe kuyoojanika. Mwalombwa kuti mutalibambili kuyoojanika kumuswaangano umwi waakati kamasi ccita kuti mwakasalwa aba Sosaiti. Imuyoocitilwa muswaangano waakati kamasi kwiina nomukonzya kukkwana nociba cibeela buyo cisyoonto cabantu ibayanda kuyoojanika kubusena obo. Ikulemeka kwanu alimwi akutobela bubambe oobu kuyoocitya kuti zintu zyoonse buyo zicitwe kabotu akuccililana.—1 Kor. 14:33, 40.
7 Mumazuba otatwe oonse, ipulogilamu inootalika aciindi ca 8:45 hrs. Mubuzuba bwakusaanguna abwabili, ipulogilamu iyoomana aciindi ca 17:00 hrs, pele mubuzuba bwatatu iyoomana aciindi ca 16:00 hrs.
8 Twanoounka akupilukila kumuswaangano, tweelede kusola kujana ciindi cakucita bumboni bwamukwiizya. Amulibambile kucita boobo kwiinda mukubwezelezyaa matulakiti, mamagazini mapya, mabroshuwa naaba mabbuku aambi ikutegwa mukape bumboni kubantu ambweni ibatajisi coolwe cakusikilwa amakani mabotu.—2 Tim. 3:17.
9 “Amucenjele Mbomumvwa”: Basimuswaangano balatondezya busongo kwiinda mukutobela malailile aali kubbuku lya Luka 8:18. Boonse bakulwaizigwa kutolelezyaa Bbaibbele, ibbuku lyanyimbo alimwi akabbuku kakulembela. Amuswiilisisye kutwaambo tupati-pati mumakani oonse alimwi amutulembe mubufwaafwi. Amulibuzye mbwaanga amugwasya lwanu imakani aabandikwa. Buzuba abuzuba bwamuswaangano kamutanaona, amutwiindulule twaambo ntomwalemba akulilanga mbuli mbomubutobela bukkale mbwayanda Jehova.—Tus. 4:10-13.
10 Cabonwa kuti ciindi camuswaangano, bamwi bayandisya kukkala mumyootokala yabo naa mutwaanda, elyo tabaiboni ipulogilamu mboyeendelezyegwa. Bamwi balabonwa kabaile kweendeenda ciindi nobeelede kuti kabakkede muswaanganinwa akuswiilila. Itukamu twabakubusi tulabonwa katuzwa kubusena bwamuswaangano kumazuba. Ibabelesi ba Jehova bamwi muciindi camusyule bakalubizya kapati mubuumi bwabo nkaambo kwiina nobakaateelelesya malailile aziyeezyo zya Jehova. Masimpe tatuyandi kulubizya andiswe munzila eyo. (1 Bam. 17:13-15) “Muzike musyomesi uucenjede” wabamba malailile ngotuyandika toonse. Cilayandika ‘kuswiilisisya kapati kuli zeezyo nzyotumvwa,’ ikapati iciindi cacibeela cimwi acimwi capulogilamu yamuswaangano wamazuba otatwe. Cintu cimwi ciyandika kapati kulindiswe ciyoopegwa abuzuba, ikujatikizya makani aayootugwasya akutukulwaizya cini-cini kujatikizya bukkale bwesu kumbele. Kwiinda mukuswiilisisya kwesu alimwi akubelesya zyoonse Jehova nzyayootupa munzila yakumuuya aamiswaangano iilangilwa kumbele, bulangizi bwesu buyooyumizigwa cini-cini, ikutegwa ‘tutasweeki’ akuleka kupona munzila njayanda Leza.—Mt. 24:45; Bahi. 2:1, Ci.
11 Insamino Iilemeka Jehova: Muziindi zino zikatazya, tweelede kucenjela kapati ikutegwa tutayungwi amuuya wanyika ino. (1 Kor. 2:12) Insamino yesu akulibamba kweelede kuba kwakulibombya alimwi ikutondezya bulemu bweelela Leza ngotukomba. (1 Tim. 2:9, 10) Takuyandiki zyakusama zidula ikutegwa tube akati kabaabo ‘balemeka njiisyo zya Leza Mufutuli wesu.’ (Taita. 2:10, Ci) Amubone malailile mabotu aagwasya aamu Magwalo aamapeeji 11 a 12 mu Ngazi Yamulindizi ya July 1, 1997 mincali 14-18. Mutabunyansyi bumboni mbotunga twapa kwiinda mukusama munzila iilemeka Jehova.
12 Ikulilemeka Kutembaula Jehova: Tulizyi kuti kulilemeka kwa Bunakristo kulakonzya kucitya kuti bantu bamwi babuzumine nokuba kubukaka bukombi bwakasimpe. Aboobo, lyoonse tuyanda kulilemeka munzila iyeelela makani mabotu alimwi iipa kuti Jehova atembaulwe.—Flp. 1:27.
13 Mwakali imuswaangano wacooko wakusaanguna wakacitwa kucisi ca Angola nkocili kunyika. Mubuzuba bwabili bwamuswaangano, bamapulisa bobile bakatumwa kubusena obo kuyoobona kuti kuli luumuno. Bakakkala buzuba boonse. Kumamanino kwabuzuba, bakaamba mbobakazikkomanina nzyobakaswiilila alimwi akulilemeka kubotu nkobakabona. Omwe akati kabo wakati: “Ino nkaambo nzi buya ncotwatuminwa kubusena buno? Tulizyi kuti Bakamboni ba Jehova bayeendelezya caluumuno miswaangano yabo.”
14 Imuntu umwi wacipani catwaambo twacisi mucisi cimwi mu Afulika wakatijila ku Europe basicipaninyina bamwi boonse nobakajaigwa. Wakanjila mumapenzi manji alimwi wakatyompokelwa cini-cini. Kumbele wakazumina ciiyo ca Bbaibbele. Naakali kumuswaangano wacooko wakusaanguna, wakakkomana kapati kubona bantu basiyene-siyene alimwi babukkale bwiindene-indene nkobaswaangana muluumuno alimwi calukamantano. Wakasinizya kuti wakakajana ncobeni kasimpe, elyo amuswaangano ngoonooyo wakati wacileka kujatikizigwa mutwaambo twacisi toonse. Kumbele wakabbapatizigwa, alimwi ono walo abana bakwe babelekela Jehova.
15 Ino kulilemeka kwesu aamiswaangano yakono kuyoobajatikizya buti bantu ambweni banooli nceciindi citaanzi kujanika? Sena bayoobona muuya walukamantano kautondezyegwa twanoobeleka caantoomwe mumulimo wakulisungula? Sena bayoobukkomanina bulondo bwacilawo cesu alimwi akutubona swebo abana besu katubwezelela kufwumbwa tudooti tunooli munsi aampotukkede katutanazwa acilawo camuswaangano? Sena bayookubona kulilemeka kwesu kubotu ciindi notweenda kuya nkotoona anotupiluka alimwi anotuya kubusena bwamuswaangano? Sena bayoobona kuti tobazyali tubeendelezya kabotu bana besu ciindi coonse? Atubone kwaamba kuti twabakkomanisya munzila zyoonse aabo ibanootulangilila.
16 Ikugwasya Kubbadela Mali Aabelesyegwa Kumuswaangano: Itikiti lizumizya kuti mujane cuuno ciindi camusobano umwi noliba lyakunjila mubbuwa lisobaninwa naa muŋanda mpati yamuswaangano liladula kapati mazubaano munyika. Cili boobo nkaambo kakudula kwamali aakubbadela mumasena aamumadolopo aabelesyegwa mulimo oyu. Lyoonse iba Sosaiti balo mulawo wabo ngwakuti “zyuuno tazibbadelelwi, kwiina kwiinzya mutiba wakubikka mali aamulumbo.” Pele, ino mbuti mali aakubbadela balaabusena alimwi amali aayoobelesyegwa kumuswaangano mbwaayoobbadelwa? Nkwiinda mukusanga kwakuliyandila kwabaabo ibayoojanika. Tusyoma kuti muyootondezya muuya wakwaaba mbubwena mbuli wooyo iwakatondezyegwaa babelesi ba Leza musyule ibakaiya Jehova Leza alimwi a Jesu Kristo. (2 Kor. 8:7) Kulabikkilwa maanu kapati kuti mali oonse aasangwa abambwa kabotu, zyoonse zyabelesyegwa zyalembwa akuti abelesyegwa mulimo wawo. Mali oonse aasangwa kwiinda mucceki ayelede kaalembedwe kuti abbadelwe ku “Watch Tower.”
17 Aakukkala: Imalailile aalikupegwa kwamyaka iili mbwiibede alazumanana kubeleka aakuti, ZYUUNO ZILAKONZYA KUBIKKILWA BUYO BANAMUKWASYI ALIMWI ABAABO MBOMWEENDA LIMWI MUMOOTOKALA WANU. Calikukondelezya kubona kuti banji balaatobela malailile aya elyo eci cayungizya luyando lutondezyegwa kumiswaangano. Muzilawo zinji, ncuuba-uba kujana zyuuno mumasena amwi kwiinda mumwi. Mwalombwa mutondezye luse akusiila masena aatakatazyi kujana kuli baabo ibacembeede alimwi abamwi balaabuyumuyumu. Kamuyeeya kuti “luyando taluzumanani munzila yalo lwini.”—1 Bako. 13:4, 5, Ci; Flp. 2:4.
18 Imincini iifwotozya, ma Camcorder alimwi Ayakulekkoodya ma Cassette Aakuswiilila: Iimincini iifwotozya alimwi amincini iibelesyegwa kulekkooda zilakonzya kubelesyegwa kumiswaangano. Nokuba boobo, ikubelesya kwanu zintu eezi takweelede kusinkila bamwi. Tatweelede kunooendeenda ciindi capulogilamu kuyabufwotola nkaambo eco ciyoonyonganya bamwi basoleka kuswiilisisya pulogilamu. Kwiina ntambo zyamincini yakulekkooda iiliyoonse zyeelede kubikkwa kumagesi naa kumincini yakwaambawida nokuba kusinka mwiindwa naa kusinkila bamwi kuti bataboni kabotu.
19 Ilugwasyo Lutaanzi: Icibeela ca Lugwasyo Lutaanzi ncakusilika kuyandika kufwambaana kwalo. Mwalombwa mukaletelezye mapiilusi aanu aa asprin, misamu yamwida, mabbadegi, mapini azimwi-zimwi, nkaambo zintu eezi kwiina nozinooliko kumuswaangano. Boonse aabo ibalaa malwazi mbuli kasuntu, kunetuka, kuciswa moyo azimwi-zimwi beelede kuletelezya misamu iiyandika. Beelede kabalaa umwi wamumukwasyi naa wamumbungano afwaafwi uulizi penzi lyabo alimwi uukonzya kugwasya ciindi nokwayandika. Mapenzi alikuba kumiswaangano ciindi baciswa-ciswa nobalikusiigwa balikke mpoonya baciswa. Ikuti bamwi bayandika busilisi bwaalubazu kabatajisi banamukwasyi bakubagwasya, ibaalu bamumbungano yabo beelede kwaambilwa kujatikizya bukkale obu kutegwa bacite bubambe buyandika bwakugwasilizya. Kunyina bubambe buyoocitwa kumuswaangano bwamaanda aalubazu aakupa baabo ibaciswa.
20 Izyakulya Kumuswaangano: Muntu woonse uuyoojanika weelede kuletelezya cakulya cakwe mwini muciindi cakuya mukuyandaula cakulya cakuula muciindi cisyoonto cakulyookezya. Izyakulya zibotu alimwi zibwezyeka inga zyazulila. Ipepa lyamukati lya Mulimo Wesu Wabwami wamu July 1995, muncali 25 lilapa mizeezo yazintu zinga zyaletelezyegwa. Kwiina bukoko bweelede kuletwa mubusena bwamuswaangano. Tubbokesi muyobwedwa zyakulya kutegwa kazitontola ntomuleta naa zyoola zyeelede kuti kazili zisyoonto izikkwana aansi aacuuno canu. Bamwi balabonwa kabalya akunywa ciindi capulogilamu. Ikucita boobo citondezya kubula bulemu kuzintu zicitwa.
21 Mumiswaangano yamuminzi, bamwi basala kulijikila aciindi eci calo cipa kuti banji kabamuka kuya kucibeela cakumazuba. Sena cilakonzyeka kujika buyo kumangolezya? Izyakulya zijikilwa limwi mbuli zitende, zimbwali azimwi-zimwi zilakonzya kumupa kuti mwaaswiilile kabotu mapulogilamu aakumazuba. Aboobo, muyoojana ciindi cinji cakubandika abakwesu abacizi.
22 Tulikkomene kaka kuti Muswaangano wamu 1998 wa “Kupona Munzila Njayanda Leza” uyootalika lino-lino! Sena mwalibambila kale kuyoojanika? Amukabe aalweendo lubotu alimwi mukapilukile kumunzi kamukkomene akukkalwa moyo, kamukanzide buyo kuyaambele mumulimo mubotu wa Jehova akuzumanana kupona munzila njayanda Leza kutegwa mukatambule zilongezyo zitamani.
Ziyeezyo Zyamuswaangano
▪ Kubbapatizigwa: Basikubbapatizigwa beelede kuti kabakkede aabusena bweelede kaitanatalika pulogilamu yacifwumofwumo buzuba bwabili. Omwe-omwe uukanza kubbapatizigwa weelede kuletelezyaa cisani cakusambila cabulemu acakulipukutya. Mazuba aainda bamwi bakali kusama zyakusama ziteelede alimwi zyakali kunyonganya ciindi eci. Ibaalu ibaindulula mibuzyo abasikubbapatizigwa mubbuku lya Mulimo Wesu beelede kubona kwaamba kuti umwi aumwi watuteelela twaambo otu. Ikubbapatizigwa ikutondezya kulyaaba kwaumwi ncintu cicitwa akati kamuntu oyo alimwi a Jehova. Aboobo, taceelede kuti basikubbapatizigwa kabajatana kumaanza ciindi nobabbapatizigwa.
▪ Mabbaaji: Mwalombwa mukasame mabbaaji aamu 1998 ciindi coonse nomuli mudolopo lyamuswaangano alimwi anomweenda kuunka nkuko alimwi aciindi nomuzwa nkuko. Kanjikanji eci citupa coolwe cakupa bumboni. Mabbaaji atupulasitiki twangawo zyeelede kujanwa kwiinda mumbungano yanu nkaambo tazinooliko pe kumuswaangano. Mutalindili pe mane kwacaala mazuba masyoonto aakuunka kumuswaangano nomuyamulombe mabbaaji aanu amukwasyi wanu. Mutalubi kubweza kkaadi yanu impya ya Advance Medical Directive/Release.
▪ Ikulembya: Tuzibya basikumwaya bamuminzi kuti kuyooba desiki iiyoolanganya kulembya kupya alimwi akulembya kwakwiindulula kwa Awake! alimwi akwa Ngazi Yamulindizi.
▪ Mulimo Wakulisungula: Sena inga mwaaba ciindi kumuswaangano cakugwasya mucibeela cimwi? Ikubelekela bakwesu kwamaoola masyoonto buyo kuyoogwasya kapati alimwi kuletela lukkomano kuli yooyo uucita boobo. Kuti kamukonzya kugwasya, mwalombwa mukaunke ku Cibeela Camulimo Wakulisungula kumuswaangano. Ibana batanasisya myaka yakuzwalwa iili 16 balakonzya kugwasya abalo kwiinda mukubeleka kabasololelwaa bazyali naa bamwi bapati.
▪ Majwi Aakucenjezya: Amubone kwaamba kuti mootokala wanu ulikkiidwe ciindi coonse, alimwi mutasiyi cintu cilicoonse kacilibonya cikonzya kusunka umwi kuti abbe. Aaya majwi aakucenjezya alabeleka akuli basimacinga. Ibabbi babikkila kapati maanu mubungana bantu banji. Inga tacibi cabusongo ikusiya zintu ziyandika kapati acuuno canu. Tamukonzyi kuzyiba naa boonse bali munsi lyanu Mbanakristo. Ino nkaambo nzi ncomunga mwababikka mumusunko boobu bantu? Imalipooti atambulwa aabantu bakunze basoleka kubba bana. KAMUBABWENE BANA MPOBABEDE CIINDI COONSE.