Muswaangano Wacooko wa “Ijwi lya Leza Lyabusinsimi” wa 1999
1 Ibana Israyeli nobakali kwaamba kunjila Munyika Yakasyomezegwa, Musa wakalomba kuti babikkile maanu kumalailile aa Leza. Wakabaambila kuti: “[Majwi aya] tacili cintu ciniini buyo pe, mbobuumi bwanu.” (Dt. 32:45-47) Sena tatumulumbi Jehova akaambo kakuti buumi bwesu ncintu ciyandika kulinguwe akuti ulazumanana kutusololela kwiinda mu Jwi lyakwe ilyampindu iitakonzyi kweelanisigwa? Aboobo tulangila Muswaangano Wacooko wamazuba otatwe wa “Ijwi lya Leza Lyabusinsimi,” tukamvwe ncaatubambila Jehova.
2 Mwaka uno miswaangano iyoobeda mumasena aali 55 mucisi coonse ca Zambia. Muswaangano uyoocitwa mu Chichewa amu Chitonga amu Cibemba amu Cingisi amu Cilubale amu Cilozi amu Ciswahili alimwi amu Citumbuka.
3 Tusyoma kuti mulilibambilide kale kuyoobako mazuba oonse aamuswaangano nkaambo mulizi kuti Jehova ulangila kuti muyoojanika nkuko. Ulabona babelesi bakwe boonse mbobasola ambobalisungula kujanika kumuswaangano, elyo ulabayeeya akutondezya kulumba. (Heb. 6:10) Ikuti katujanika buzuba bumwi abumwi bwamuswaangano ikuzwa ciindi calwiimbo lwakutalisya kusikila ciindi camupailo wamamanino, tutondezya Jehova kuti tulaayanda majwi aakwe. (Dt. 4:10) Alimwi tutondezya kulumba kumulimo bakwesu banji ngobabeleka wakubamba muswaangano.
4 Ikubaa bubambe bwakuti bantu ba Leza bali zyuulu-zyuulu bakabungane kubusena bumwi abumwi bwamuswaangano ciyanda kulibambilila limwi alimwi akweendelezya kabotu zintu. Ikuziba kuti bubambe bwamuswaangano bwacitwa aluyando acitupe kubelekela antoomwe kutegwa “zintu zyoonse buyo zicitwe kabotu akucililana.” (1 Kor. 14:40) Makani aaya aalaansi kubikkilizya aziyeezyo ngakumugwasya kuti mukaboole kumuswaangano kamulibambilide kabotu kuzikulya cilyo cakumuuya alimwi akuyanzana kwa Bunakristo.
Muswaangano Kautanatalika
5 Sena aabo mbomuyiisya Bbaibbele alimwi abamwi ibantondezya luyandisisyo kukasimpe bayandika kugwasya kulibambila kuyoojanika kumuswaangano? Ncobayoobona akumvwa nobanooli nkuko inga cabakulwaizya kuba bakombi ba Jehova. (1 Kor. 14:25) Ibaalu beelede kabazi naa kuli uuyandika kugwasya kujana kwakoona naa cakweendela, ikapati bacembeede mumbungano, ababone kwaamba kuti aaba bagwasigwa caluyando.—Gal. 6:10.
6 Sena mwakacita kale boonse bubambe bwakujana kwakoona? Ikusikila lino oonse mafoomu aajatikizya Kulomba Kwakoona (Room Request) aasainwa aba Kkomitii Yeendelezya Mulimo Wambungano ayelede kaatumidwe kale amulembi wambungano kucibeela nkwaayelede kuunka. Ikuti naa mwakapegwa kwakoona kwiinda mububambe obu, elyo tamuciyandi kwakoona amuzibye baku Cibeela Cilanga Kwakoona ibakumuswaangano nkomubede cakufwambaana kutegwa busena bupegwe umbi muntu.
7 Mbwaanga Cibeela Calugwasyo Lutaanzi cakumuswaangano ncakugwasya babaya bayandika lugwasyo lwakufwambaana balo, tumukulwaizya kuti mukaletelezye amusamu wanu wakulisilika, amabbandeji, alimwi azimwi zintu nzyomuyeeya kuti zilayandika kumuswaangano. Ikuti nywebo naa umwi musazinyoko ujisi bulwazi mbuli bwamoyo, bube bwasuga (diabetes) naa kasuntu, amukaletelezye amusamu uuyandika kumuswaangano wakusilika malwazi aya mbweena mbuli mbomucita nomuli kuŋanda naa nomwaunka kuyooswaya. Inga cagwasya kuti umwi wamumukwasyi naa mweenzinyina aamuntu uuciswa uuzi bulwazi mbwaciswa kuti lyoonse kalaa mulwazi nkaambo nguukonzya kuziba mbwagwasigwa.
8 Izyoolwe zyakucita bumboni bwamukwiizya zilalangilwa kubako nomuli mulweendo lwakuya kumuswaangano anomuzwa nkuko. Sena munoolibambilide kukambaukila bamwi makani aakasimpe? Toonse kubikkilizya abana baniini tulakonzya kutola lubazu kwiinda mukumwaya matulakiti kubabelesi mumasena aakunywisizya myootokala mungwimba akuli bamwi mbomuswaanganya mulweendo. Kulaba zyoolwe zyakumwaya mamagazini, mabroshuwa naa mabbuku aambi kubantu bayanda. Kamunoolibambilide kucita bumboni bwamukwiizya kubantu baindwa coolwe cakukambaukilwa kucitwa munzila nzyotubelesya.
Ciindi Camuswaangano
9 Muswaangano unootalikaa ciindi ca 8:45 hrs mumazuba oonse otatwe. Izyuuno inga mwabambila buyo banamukwasyi naa mbomweenda limwi. Ibakwesu abacizi bacembeede bayoobambilwa masena aakukkala aali kabotu alimwi kunooli masena aabikkidwe aambali aabaabo balemene abaabo ibayandika zyuuno zyakukkuba. Tacikonzeki kubikkaa mbali maanda kumuswaangano aabaabo bakakoola. Ibuzuba abuzuba nomuzwa aabusena mpomukkede, kamubona kwaamba kuti taakwe ncomwasiya pe.
10 Notubungana mubunji mumiswaangano yesu tweelede kutobela milawo yoonse kujatikizya ayeeyo yakulikwabilila kumulilo akuntenda zimbi. Tweelede kuyeeya bamwi tutasiyi zintu zyesu aabusena mpozinga zyabasinkila naa kubaleba. Mbotuli bantu bacisi ibatobela milawo tulizi kuti ncintu cipati kutobela milawo yamumigwagwa. Ibakwesu ibabelesya myootokala yabo kuyumuna bakwesu ibaya kumuswaangano akuzwa nkuko beelede kutobela milawo yamumigwagwa. Eeci cilajatikizya akubona kwaamba kuti mootokala uubelesegwa uleelela kweenda mumugwagwa. Bamwi babbadela myootokala yakubatola kumuswaangano. Mukusola kucesya mali aakubbadela, basikutanta myootokala eyi balaindizya kuzula mulinjiyo. Eeci cilengwa icizizilwe alimwi iciletela ntenda cilajatya kumapulisa mumasenaa migwagwa mobaimizizya myootokala. Ino ‘kwiindizya kuzuzya mootokala’ caamba nzi? Caamba kulongela mweelwe wazintu naa wabantu mootokala ngowatakabambilwa kuti kuuyumuna. Ikuti naa acuuno cikkala muntu omwe mwakkala nobanji alimwi kuti naa mwakkala kusyule lyamootokala naa kubikka zintu zyanu kakuli oyo mootokala taujisi busena kusyule bwakukkazika kabotu bantu azintu, eci caamba kuti mootokala oyo waindizigwa kuzula alimwi eco ciletela ntenda. Ikutatobela milawo yamumigwagwa ciletela mapenzi aatayandiki alimwi inga capa kuti twaalilwe kujanika kumapulogilamu amwi naa oonse aamuswaangano. Aboobo, mootokala ngotutanta ube wamukwesu naa wakubbadelela, ikutobela malailile aaya cipa bulemu kuli Jehova alimwi citondezya kuti tulamulemeka cini-cini alimwi tulailemeka mfwulumende acipego cabuumi.—Rom. 13:2-4.
11 Sena muyoobbapatizigwa kumuswaangano wacooko? Mubuzuba bwabili, cifwumofwumo kuyoobambwa busena bwabasikubbapatizigwa, elyo basikugwasilizya bayoomutondezya kubusena obu. Ikuti kakukonzeka mukajanike mulikkede cibeela capulogilamu kacitanatalika. Mukaletelezye a Bbaibbele lyanu abbuku lyanyimbo, acisani cakulipukutya alimwi azisani zyabulemu nzyomuyoobbapatizigwaa zyalo. Itusikipa itujisi bulembo-lembo alimwi azisani zimbi zyamusyobo oyo taziyandiki pe ciindi eci cabulemu. Ibaalu balanga-langa mibuzyo abasikubbapatizigwa mubbuku lya Mulimo Wesu beelede kubona kwaamba kuti makani aaya ateelelwa kuli umwi aumwi. Mbwaanga lubbapatizyo ncitondezyo cakulyaaba kwamuntu amuntu kuli Jehova Leza, basikubbapatizigwa tabeelede kujatana mumaanza nobabbapatizigwa.
12 Mulakonzya kubelesya zifwotozyo alimwi amincini yakubweza zipekupeku alimwi amawailesi aakulekkoodela kumuswaangano. Pele aabusena mpomuzibikka naa mpomuzibelesezya zintu ezi zitasinkili nzila nokuba kusinkila bamwi naa kupa kuti bantu bataswiilili kabotu pulogilamu. Zyeelede kazibelesya magesi aazyo naa bubambe bwazyo bwakubwezela majwi, zitaswaanganizigwi amincini yakumuswaangano pe.
13 Mbwaanga bayabuvwula babelesya mafooni aamunkomo, amubone kwaamba kuti mincini eyi itamunyonganyi kuswiilila pulogilamu naa kunyonganya baabo mbomukkede limwi. Eeyi mincini tayeelede kumvwugwa kulila nomukkede akati kabaswiilizi. Ikuti naa muyandika kubelesya fooni yamunkomo mukati kamapulogilamu amucitile kunze aabbuwa lyamuswaangano.
14 Ikutegwa tutasowi ciindi alimwi tuubye-ubye zintu, iba Sosaiti batulomba kuletelela acakulya cesu kumuswaangano buzuba abuzuba. Ibakwesu banji ibatobela malailile aaya bajana kuti balakonzya kukkala akulya antoomwe amukwasyi wabo icilyo ncobaletelela buzuba obo ciindi cakulyookezya camasikati nocasika. Ibanji baamba kuti iciindi ncobabaancico cakulyookezya masikati alimwi aciindi cinji ncobayanzana ababunyina abacizi cilakkomanisya. Eeci ciyanda kuti mwaulila limwi zyakulya azyakunywa akuzibikka muciyumwido cisyoonto naa muciyumwido citontozya zyakulya icikonzya kweela kunsi acuuno. Tulomba kuti boonse basimuswaangano bakaatobele malailile aaya. Mazubaano basambazi bazyakulya mumasena motucitila miswaangano babona kuti bamwi bakwesu balazwa abusena aacitilwa muswaangano kuya kukuula cakulya kubasambazi bamumigwagwa alimwi amutuntoolo tuniini-niini tulaafwaafwi itwazyakulya zitayandiki kujikwa. Bamwi basambazi bazyakulya ibasambalila mumbalaa busena bwamuswaangano akaambo kakuti bazibila lino balomba kuti bazumizigwe kujula tuntoolo twabo akuuzizya basimuswaangano. Ikuti naa eci cazumizigwa, ibantu banyika banji balatalika kusangana andiswe masikati. Kunze lyaboobo, lilatalika alimwi penzi lyakwaatikizyanya alimwi alyamilongo milamfwu mumbalaa tuntoolo mobauzizya, eci cilapa kuti tutaliibi mumiswaangano yesu. Aboobo tumulomba kuti umwi aumwi kaletelela cakulya azyakunywa zyakwe kumuswaangano buzuba bumwi abumwi. Ibapya ibaunka andinywe kumuswaangano abalo beelede kuletelela cakulya cabo. Ibukoko tabuyandiki kumuswaangano pe.
15 Sena tamukonzyi kulisungula kugwasya kusalazya busena nowamana muswaangano wabuzuba bumwi abumwi? Naa kubeleka mucibeela cimwi camuswaangano? Ikuti kamukonzya kugwasya, amuboole ku Cibeela ca Basikulisungula kumuswaangano. Ibana batasiki aciimo camyaka yakuzyalwa iili 16 balakonzya kugwasya abalo kufwumbwa kuti kababelekela antoomwe amuzyali naa amuntu mupati. Muntu oonse ulakonzya kugwasya kusalazya busena kwiinda mukubwezelela tombe lyoonse akulisowela kubusena bwatombe.
16 Twapegwa malailile aatugwasya kuziba nsamino yeelede alimwi akulibamba kuyandika kumiswaangano yesu. Mucikozyanyo: Tulipedwe malailile aajatikizya kaambo aka mumapepa aamukati aa Mulimo Wesu Wabwami, alimwi kuli zitondezyo azifwanikiso mumabbuku eesu, ikapati tulijisi malailile ngaatupa Jehova mu Bbaibbele. (Rom. 12:2; 1 Tim. 2:9, 10) Ibantu balituzi alimwi balizi ncotwabunganina. Aboobo insamino yesu lwayo ipa bumboni bupati. Ibunji bwabantu ba Jehova bapa citondezyo cibotu kumakani aya. Nokuba boobo kuli ziindi notubona muuya wanyika munsamino alimwi anzila njobalibamba bamwi ibajanika kumiswaangano yesu. Insamino iili yoonse iitondezya cintanda ipa kuti muntu uulyaamba Bunakristo adoonekwe. Insamino yabulemu yabulondo njiilibonya kabotu. Aboobo basilutwe bamukwasyi beelede kulingula zisani nzyobayanda kusama banamukwasyi. Eeci cilajatikizya aciindi notutali abusena bwamuswaangano. Ikusama mabbaaji eesu ciindi notuya kumuswaangano alimwi anotuzwa nkuko acalo cituzibya kuti tuli bantu ba Jehova akuti tulaakati kabantu bakwe ibasalala.—Amweezyanisye Marko 8:38.
17 Mwami musongo Solomoni kwiinda mumuuya uusalala wakaamba kuti “bufubafuba bulaangidwe mumoyo wamwana” akuti “mwana uulekelelwa buyo ulausya banyina insoni.” (Tus. 22:15; 29:15) Iciindi camuswaangano, ibana baniini Bakamboni ibatalangwi, banyonganya bakwesu abacizi ibasola kuswiilila pulogilamu. Mbwaanga bazyali bayoobetekwaa Jehova kujatikizya mbobalilemeka bana babo, cilikke cinga cagwasya kuti mutumbu naa wisi abone kwaamba kuti bana balalilemeka alimwi balaswiilila malailile aa Jehova nkukkala aambabo. Basikugwasilizya bayoosikila kufwumbwa muntu uunyonganya bamwi akumulomba kuti aleke kucita boobo akumuyeezya cabulemu kuti aswiilile pulogilamu.
18 Akaambo kakuti tulatamba buleya kumiswaangano yesu, tweelede kubikkila maanu kubana besu akuzintu zyesu. Ibana besu ncipego icibotu kapati cizwa kuli Jehova. Pele tulizi kuti bantu banyika bajisi muuya wa Saatani wabujayi. Aboobo kamubalanga bana banu lyoonse. Alimwi zifotozya ampotomona zyamali azimwi mbono zyanu kamuzijisi lyoonse mutazisiyi acuuno. Amubone kwaamba kuti mootokala wanu wakkiigwa alimwi zintu zyanu amuzibikke kubbuuti yamootokala naa kuzitolelela. Eeci cipa kuti muntu atasunkwi kunjila mumootokala wanu. Alimwi macinga aanu amwaakwabilile aalo.
19 Cilakulwaizya kubona bakwesu abacizi kabalemba twaambo ciindi camuswaangano. Ikulemba twaambo mubufwaafwi cilamugwasya kuswiilila akuyeeya twaambo tupati-pati. Ikubandika twaambo ntomwalemba amukwasyi naa abeenzinyoko kwamana waawo cilamugwasya kuzinzibala kuyeeya twaambo tupati-pati twamuswaangano kutegwa mutatulubi.
20 Ibantu ba Jehova lyoonse bali baabi caboola kukusanga mbono zyakugwasilizya bubambe bwateokrasi. (Kul. 36:5-7; 2 Mak. 31:10; Rom. 15:26, 27) Imali aanu ngomusanga cakuliyandila kumulimo wanyika yoonse abelesegwa kubbadelela masena aacitilwa miswaangano. Ikuti naa mwasanga mali kubelesya cheki, ailembwe kuti ibbadelwa ku “Watch Tower.”
21 Kweelana amajwi aalembedwe ku Amosi 3:7, Jehova wakati “taciti cintu, atana kuyubunwida balanda bakwe basinsimi maseseke aakwe.” Mbwali Leza ‘uuyubununa maseseke,’ Jehova wacita kuti businsimi ibwakazuzikizigwa boonse mbobubede ibusika kumyaanda bulembwe mu Bbaibbele. (Dan. 2:28, 47) Izisyomezyo zipati ziyoozuzikizigwa aakale. Imuswaangano Wacooko wa “Ijwi lya Leza Lyabusinsimi” wa 1999 uyooyumya lusyomo lwanu muzisyomezyo zya Leza. Amukaswiililisye majwi ngayoomukananina Jehova. Amukatobele nzyomuyoobona akumvwa—mukazibelesye mumulimo amumbungano alimwi amubukkale bwanu. Tulapaila kuti Jehova akamulongezye kapati nomulibambila kuyoojanika mazuba oonse aapobwe eeli pati lyakumuuya!
Majwi aakwelelezya sikubala aali apeeji 3]
Amulibambile kuyoojanika mazuba oonse otatwe!