Muswaangano Wacooko wa “Lusyomo mu Jwi lya Leza” wa 1997
1 Imwaapostolo Paulo wakayeezya Timoteo kuti “magwalo aya oonse akazwa kuli-Leza.” (2 Tim. 3:16) Mbwaanga Jwi lya Leza lyakazwa kulinguwe, tulijisi kaambo kakulisyoma. Imutwe wamakani wamuswaangano wacooko wamwaka uno waamba kuti “Lusyomo mu Jwi lya Leza.” Iprogilamu iyooyumya lusyomo lwesu mu Bbaibbele kufwumbwa naa twakkala myaka minji mukasimpe naa twazwaa kuswaangana lino ambunga ya Jehova. Toonse tweelede kulibambila kuyoojanika kuprogilamu yoonse. Ciyootuyumya-yumya kaka kuti bapya, ikapati abo mbotwiiya ambabo Bbaibbele bakajanike!
2 Muswaangano Wamazuba Otatwe: Uno mwaka iprogilamu yamuswaangano wacooko yamazuba otatwe yabambwa kuti ikatugwasye. Kunze lyamiswaangano iili 47 iilembedwe mu Mulimo Wesu Wabwami wa March 1997 iiyoba mu Zambia, kunooli amuswaangano wa Cibemba mu Lusaka. Aciindi awa mulizi kale muswaangano ikuyoojanika mbungano yanu alimwi mweelede kuti mwakalibambila kale kuyoojanika mazuba oonse otatwe aa progilamu. Sena mwakabasikila kale bapati bamulimo kuti mulombe mazuba? Ikuti kamujisi bana basicikolo, abalo beelede kujanika kucibeela eci ciyandika kapati cakuyiisigwa kwabukombi bwabo mbwaanga miswaangano iyooba ciindi zikolo nozijalidwe. (Dt. 31:12) Imiswaangano ili mu Chichewa, Chitonga, Cibemba, Cingisi, Cilubale a Cilozi.
3 Iprogilamu inootalika aciindi ca 8:45 hrs abuzuba. Sena tuyootondezya luzyalo kubakwesu bacembeede abalema kwiinda mukubasiila zyuuno mumasena aatakatazyi kwiinda alimwi aali kabotu? Amuyeeye kuti ‘luyando . . . talulilangilili cintu.’—1 Kor. 13:3, 5; Flp. 2:4.
4 Amuswiililisye: Imwaapostolo Petro wakayeezya Banakristo bamumwaanda wakusaanguna kuti inga babotya kuti bateya matwi abo kujwi lyabasinsimi mbuli kulampi limunika mumudima. (2 Pet. 1:19) Eco cili masimpe akulindiswe. Ikupona munyika eyi yakale mubweendelezi bwa Saatani cili mbuli kuba mumudima. Tulalumba kuti twakaitwa kuzwa mumudima wakumuuya. (Kol. 1:13; 1 Pet. 2:9; 1 Joh. 5:19) Ikutegwa tucaale mumumuni, tweelede kuyumya lusyomo lwesu kwiinda mukuswiililisya Jwi lyakazwa kuli Jehova. Imuswaangano wesu wacooko mwaka uno uyootuyumyayumya kucita boobo.
5 Tweelede kusolekesya kutegwa tukabikkile maanu kuprogilamu elyo tuyoolongezyegwa ncobeni akaambo kakucita boobu. Tweelede kukanza kuboola kucilawo camuswaangano katukatalukide kutegwa katupakamene ciindi camaprogilamu. Mweelede kusika kucilawo camuswaangano ciindi kaciciliko buzubaa buzuba kutegwa kamukkede progilamu kaitana talika. Mpoonya amutole lubazu mukwiimba lwiimbo lwakujula amupailo kumatalikilo aaprogilamu yabuzuba bumwi abumwi. Ibapati beelede kupa cikonzyanyo alimwi bazyali beelede kuyiisya bana babo.—Ef. 6:4.
6 Ikuti twalanga mitwe yazibeela kaitana talika progilamu yabuzubaa buzuba, tulakonzya kulangila twaambo tukonzya kwaambwa mucibeela eco. Eci ciyooyungizya luyando lwesu kumakani ciindi naambwa. Tulakonzya kuswiililisya twaambo tuyootugwasya kupanduluda bamwi ncotusyomena muli Leza acisyomezyo cakwe cakasimpe cakuti uyoolumbula baabo bamuyandaula cakasimpe. (Heb. 11:1, 6) Cilakulwaizigwa kuti katulemba twaambo mubufwaafwi ikutegwa catugwasya kuyeeya twaambo tupati-pati twa progilamu. Ikuti katulemba twaambo tunji tulakonzya kwiindwa twaambo tupati-pati nkaambo twajata bubi kulemba.
7 Mumasena amwi mwakali, ibapati abana bakabonwa alimwi kabaile kweenda kakunyina ancobaya kukucita anze alimwi kababandika ciindi caprogilamu muciindi cakuswiilila nzyaatupa “muzike musyomesi uucenjede” kuti zitugwasye. Jesu wakasyomezya kutupa zilyo zyakumuuya aciindi ceelede. (Mt. 24:45-47) Aboobo tweelede kujanika kutegwa tugwasigwe acakulya kutali kutondezya kutalumba. (2 Kor. 6:1) Alimwi kuboneka kuti ciindi bana nobakatala, kanjikanji balomba kuunka kucimbuzi kutegwa banyamuke akutalika kweendeenda. Ikuyiisigwa kuli kabotu kwakumunzi kanjikanji kulakonzya kucesya nyendo ezi zyakucimbuzi ciindi aciindi. Zimwi ziindi, bakubusi balakkala antoomwe mumasena aazandukide kabaambaula, kupetekesya alimwi akutuminana tugwalo. Ibantu bacili bana balo ibajisi mapenzi manji sunu beelede kubikkila maanu kumakani aabandikwa kutali kunakucita zintu zimbi ciindi caprogilamu. Izisusi zyabukubusi iziteendelani anjiisyo zya Bbaibbele zyeelede kutantamukwa. (Amweezyanisye 2 Timoteo 2:22.) Ikubikkila maanu kwaboonse ibapati abakubusi kuyoolemeka Jehova akumukkomanisya.
8 Ikuti kwayandika kuti umwi wabagwasilizyi ape lulayo kuli umwi kujatikizya makani aya, lweelede kubonwa kuti ncipego caluyando kuzwa kuli Jehova. (Gal. 6:1) Toonse tweelede kuyeeya kuti ikaambo ncotusolekela kujanika kumuswaangano nkuti ‘tuswiilile akwiiya.’ (Dt. 31:12) Alimwi “muntu musongo awalo aswiilile ayungizizye lwiiyo.” (Tus. 1:5, Bbaibbele yamu Chitonga yamu 1996.) Amusoleke kulyookezya mbuli mbomukonzya lyoonse masiku. Iciindi cicaala kamutanaunka kumuswaangano amubandike amukwasyi mbokuyandika kukkala antoomwe mubuleya, ikukkede ciindi caprogilamu alimwi akuswiililisya kutegwa tugwasigwe kapati aprogilamu.
9 Ikusama Kukkomanisya Jehova: Ibantu ba Jehova balalangililwa aboonse bamunyika. (1 Kor. 4:9) Kanjikanji tulazibwa akaambo kakusama akulibamba kwesu kusumpukide. Ikutobela njiisyo zyamu Magwalo zijanwa kubbuku lya 1 Timoteo 2:9, 10 alimwi akuli 1 Petro 3:3, 4 kwapa kuti kube kucinca kupati mukuboneka kwabantu banji kubeelanya ambobakali kuboneka nobakatalika kuyanzanaa mbungano ya Banakristo. Oku nkwiimpana kapati akuyaansi kapati kwansamino akulibamba nkotubona munyika. Tuyanda kucenjela kapati kuti tutataliki kulibonya mbuli banyika—ikusama zisani zinyongene, ikusumpula nzila zyanyika mukukamuna masusu naa kusama kutali kwabulemu. Ikusama kwesu alimwi akulibamba kuli kabotu kweelede kugwasya bapya ibajanika kumuswaangano ikubona mbobeelede kusama Banakristo.
10 Nokuba kuti mwakali kumiswaangano ikusama kwabakwesu abacizi kwakali kabotu, ipenzi lyakusama akulibamba kwanyika lyazumanana kuli bamwi kapati ciindi cakulyookezya. Notulibambila kuyoojanika kumiswaangano, tweelede kuyeeyesya kumakanaa mbotuyoosama akulibamba. Nobazyali amuzilange cabusongo nzyobayoosama bana banu basyoonto abakubusi. Amubone kuti tatulekeli zilengwa zyanyika kunyonganya kuboneka kwesu kwa Banakristo.
11 Amukujatisye Kulilemeka Kabotu: Ikulilemeka kabotu ncizibisyo ca Banakristo bakasimpe. (1 Pet. 2:12) Ikulilemeka kwesu kufwumbwa nkotubede—kumiswaangano, kumasena aakulida alimwi amukweenda—kulakonzya kupa bumboni buli kabotu akugwasya bamwi ikubona ncolunga lwacita lusyomo muli Leza alimwi a Jwi lyakwe kubantu. Eci inga capa kuti bamwi bamuzibe Jehova. (Amweezyanisye 1 Petro 3:1, 2.) Tulijisi coolwe cakulemeka Leza kwiinda mukulilemeka kwesu. Beendelezi ba hotela limwi mu Alabama bakaamba kuti basimuswaangano besu “mbebabotu kwiinda alimwi nenkamu iililemeka kabotu njobabaayo.” Bakayungizya akuti: “Ciyooba coolwe kuti mukaboole alimwi kumbele aamazuba.” Icibeela cilanga miswaangano abeenzu mu northwestern United States cakalemba kuti: “Mwaka amwaka muswaangano wa Watchtower Society ulalangilwa cakukkomana abuleya boonse. Basimuswaangano banu balakkomanisya kapati; balalilemeka munzila mbotu kapati alimwi yabulemu. Tulabalemeka mumakwebo eesu aboobo tulayandisya kuti kaupiluka ‘mukwasyi’ wabo wabeenzu mwaka amwaka.” Imalipooti aali boobu alakkomanisya kubala, embo na? Nokuba boobo kulayandika kuzumanana kucenjela kutegwa bantu ba Jehova bacaale kabalaa mpuwo mbotu.
12 Tulayeekezyegwa lyoonse kujatikizya kweendelezya bana ikutabalekela kulunduka-lunduka kumuswaangano kakutakwe uubalanga, kabanyonganya bamwi. Mwaka amwaka iba Sosaiti balatambula malipooti aakuti bana inga tabajisi uubalanga mukati alimwi aanze aazilawo zimwi ezyo zilombedwe zyalo zinga tazyeelede kuti kazisikwa abasimuswaangano. Nokuba kuti miswaangano itupa coolwe cakuswaya akubaa antoomwe ababunyina, ibazyali beelede kabauyeeyede lyoonse mulimo wabo wakweendelezya bana babo ciindi coonse. Oyu ngomulimo Jehova ngwapede muzyali oonse. (Tus. 1:8; Ef. 6:4) Ikuteendelezya micito yabana kulakonzya kunyonyoona mpuwo mbotu Bakamboni ba Jehova bamwi njobabelekela canguzu kuti tubaayo.—Tus. 29:15.
13 Ikugwasya Kubbadela Mali Aabelesyegwa Kumuswaangano: Kuyooyandika mali kutegwa toonse tukajanike kumiswaangano. Kuli azimbi ziyandika mali nzyotweelede kuyeeya. Izilawo zibelesyegwa kucita miswaangano ziladula. Kuli azimbi ziyanda mali zyeelede kulanganizigwa. Ikusanga kwesu kwabwaabi kwakulisungula kumiswaangano kulalumbwa kapati.—Inc. 20:35; 2 Kor. 9:7, 11, 13.
14 Aakukkala: Imalailile aalikupegwa kwamyaka iili mbwiibede alazumanana kubeleka aakuti, ZYUUNO ZILAKONZYA KUBIKKILWA BUYO BANAMUKWASYI ALIMWI ABAABO MBOMWEENDA LIMWI MUMOOTOKALA WANU. Calikukondelezya kubona kuti banji balaatobela malailile aya mumyaka eyi yalino elyo eci cayungizya luyando lutondezyegwa kumiswaangano. Muzilawo zinji ncuuba-uba kusika mwakukkala mumwi kwiinda mumwi. Mwalombwa mutondezye luse akusiila masena aatakatazyi kujana kuli baabo balaabuyumuyumu.
15 Imakkamera, ma Camcorder alimwi ama Audiocassette Recorder: Imakkamera alimwi aimwi mincini iibelesya kulekkooda ilakonzya kubelesyegwa kumiswaangano. Nokuba boobo, ikuzibelesya kwesu takweelede kusinkila basimuswaangano. Tatweelede kunooendeenda ciindi caprogilamu ikufotola nkaambo eco inga canyonganya bamwi basoleka kuswiililisya progilamu. Kunyina ntambo zyamincini yakulekkooda iliyoonse zyeelede kubikkwa kumagesi naa kumincini yakwaambauda nokuba kusinka mwiindwa naa kusinkila bamwi kuti bataboni kabotu.
16 Ilugwasyo Lutaanzi: Icibeela ca Lugwasyo Lutaanzi ncakusilika kuyandika kufwambaana kwalo. Tacikonzyi kulanganya baabo ibaciswa lyoonse. Nkakaambo kaako mweelede kulanganya zyabuumi bwanu abwamukwasyi wanu ciindi kaciciliko. Mwalombwa mukaletelezye mapiilusi aa asprini, misamu yamwida, mabbandeji, mapini azimwi-zimwi zyanu nobeni nkaambo zintu ezi tazinooliko kumuswaangano. Boonse abo balaa malwazi mbuli kasuntu, insulin shock, moyo azimwi-zimwi beelede kulibambilila limwi kulizyeezyo zyobayandika mbuli mbobakonzya. Beelede kabajisi misamu iiyandika alimwi munamukwasyi naa wamumbungano uulizi penzi lyabo weelede kuti kali afwaafwi ambabo ciindi coonse kutegwa kagwasya kuti kwayandika. Mapenzi alikuba kumiswaangano ciindi bantu baciswa-ciswa nobalikusiigwa balikke mpoonya baciswa. Beendelezi ba muswaangano bali kubweza mukuli oyu akubabalisya bantu aba kucibbadela. Ikuti bamwi bayandika busilisi bwaalubazu kabatajisi banamukwasyi bakubagwasya ibaalu bamumbungano yabo beelede kwaambilwa kujatikizya bukkale obu kutegwa bacite bubambe buyandika bwakugwasilizya. Kunyina bubambe buyoocitwa kumuswaangano bwamaanda aalubazu aakupa baabo ibaciswa.
17 Izyakulya Kumuswaangano: Ikulesya kujika zyakulya zyakuulisya kumiswaangano kwapa kuti banji kabaliibide ciindi camaprogilamu akubikkila maanu kucakulya cakumuuya. Ikulumba kunji kujatikizya kuubya-ubya zintu oku kwatambulwa kuzwa ciindi nobwakatalikwa bubambe obu. Boonse beelede kulibambila kuleta zyakulya zyabo zili kabotu zyamasikati mbuli zyeezyo zyakaambwa mupepa lyamukati lya Mulimo Wesu Wabwami wa July 1995 muncali 25. Kunyina bukoko bweelede kuletwa mubusena bwamuswaangano. Kabbokesi muyobodwa zyakunywa kutegwa kazitontola keelede kuti kakali kasyoonto kakakkwana ansi acuuno canu. Bamwi balabonwa kabalya akunywa ciindi caprogilamu. Ikucita boobu citondezya kubula bulemu. Mumasena mumwi muli basikuulisya anze aabusena bwamuswaangano, bamwi bakwesu balabonwa kabagwasilizya baaba ciindi caprogilamu. Eci taceelede pe.
18 Masimpe, tulaliyanda pobwe eli lyakumuuya alimwi abukkale bwaluumuno akuliiba bwa kubaantoomwe abakwesu ciindi cakulyookezya masikati. Ikutobelesya makanze aabubambe obu, muciindi cakuzwaa cilawo eci ciindi cakulyookezya kuyakuula zyakulya, mwalombwa muletelezye zyakulya. Mumiswaangano yamuminzi bamwi bayanda kujika aciindi awa calo cipa kuti kabamuka kuya kucibeela camasikati. Sena cilakonzyeka kujika buyo kumazuba? Izyakulya zijikilwa limwi mbuli zitende, zimbwali azimwi-zimwi zilakonzya kumupa kuti muswiilile maprogilamu aamasikati. Aboobo muyoojana ciindi cipati cakubandika abakwesu abacizi.
19 Tulikkomene kaka kuti Miswaangano Yacooko ya “Lusyomo mu Jwi lya Leza” iyootalika lino-lino! Toonse tuyanda kuba masimpe kuti kulibambila kwesu kwacitwa kwakuya kujanika kuprogilamu yoonse kutegwa tukakkomane cakumaninina kucakulya cakumuuya Jehova ncaatubambila kwiinda mumbunga yakwe. Munzila eyi ‘tuyoozulila kukumana milimo mibotu yoonse’ mumazubaa boola kumbele.—2 Tim. 3:17.
Kabbokesi kali apeeji 5]
Ziyeezyo Zyamuswaangano Wacooko
Kubbapatizigwa: Basikubbapatizigwa beelede kuti kabakkede abusena bweelede kaitana talika progilamu yacifwumofwumo mubuzuba bwabili. Cisani cakusambila cabulemu alimwi acakulipukutya zyeelede kuletwa aomwe-omwe uukanza kubbapatizigwa. Musule bamwi bakali kusama zyakusama ziteelede alimwi zyakali kunyonganya ciindi eci. Ibaalu baindulula mibuzyo abasikubbapatizigwa mubbuku lya Uministala Wathu beelede kubona kuti umwi aumwi watuteelela twaambo otu. Aakumana makani aalubbapatizyo alimwi amupailo asikupa makani, sicuuno wacibeela uyoolomba kuti kwiimbwe. Kwaakumana muzila wamamanino, bagwasilizyi bayoosololela basikubbapatizigwa kubusena nkobayoobbapatizigwa. Ikubbapatizigwa ikutondezya kulyaaba kwaumwi ncintu cicitwa akati kamuntu oyo alimwi a Jehova. Aboobo taceelede kuti basikubbapatizigwa kabajatana kumaanza ciindi nobabbapatizigwa.
Mabbaaji: Mwalombwa amwaasame mabbaaji aa 1997 ciindi coonse nomuli mudolopo lyamuswaangano alimwi anoomweenda kuunka nkuko alimwi aciindi nomuzwa. Kanjikanji eci citupa coolwe cakupa bumboni. Imabbaaji atukwese twangawo zyeelede kujanwa kwiinda mumbungano yanu nkaambo tazinooliko pe kumuswaangano. Mutalindili pe limwi kwacaala mazuba masyoonto akuunka kumuswaangano nomuyamulombe bbaaji lyanu aamukwasyi wanu. Amuyeeye kubweza kkaadi yanu mpya ya Advance Medical Directive/Release card.
Ikulembya: Tuzibya basikumwaya bamuminzi kuti kuyooba desiki iyoolanganya kulembya kupya alimwi akulembya kwakwiindulula kwa Galamukani! alimwi a Ngazi Yamulindizi.
Mulimo Wakulisungula: Sena inga mwaaba ciindi kumuswaangano cakugwasya mucibeela cimwi? Ikubelekela bakwesu, kwamaoola masyoonto buyo kuyoogwasya kapati alimwi kuletela lukkomano kumuntu uucita boobo. Kuti kamukonzya kugwasya mwalombwa musike ku Cibeela Camulimo Wakulisungula kumuswaangano. Ibana batanasisya myaka yakuzyalwa iili 16 balakonzya kugwasya abalo kwiinda mukubeleka kabasololelwa abazyali naa bamwi bapati.
Majwi Aakucenjezya: Amupakamane kumapenzi aakonzya kumusikila kutegwa mutantamuke buyumuyumu buteelede. Kanjikanji babbi alimwi abampelenge balayanda kubbida bantu beenzu. Amubone kuti mootokala wanu ulikkiidwe ciindi coonse, alimwi mutasiyi cilicoonse kacilibonya cikonzya kukwelelezya umwi kuti abbe. Aaya majwi alabeleka akuli basimacinga. Ibabbi babikkila kapati maanu mubungana bantu banji. Inga tacibi cabusongo kusiya zintu ziyandika acuuno canu. Tamukonzyi kusyoma kuti boonse bali munsi lyanu Mbanakristo. Ino ncinzi ncomunga mwakwelelezela boobu? Imalipooti atambulwa aabantu bakunze basoleka kubba bana. KAMUBABWENE BANA MPOBABEDE CIINDI COONSE.
Kabbokesi kali apeeji 5]
Ciindi Cama Progilamu
Buzuba bwakusaangunaabwabili
8:45 hrs. -16:50 hrs.
Buzuba bwatatu
8:45 hrs.-15:50 hrs.