‘Amuswiilile Akuliyungizizya Lwiiyo’
1 Ibbuku lya Tusimpi lipandulula kuti busongo buli mukwiita kuti: “Amuswiilile, nkaambo ndaamba makani malemu; Mukanwa lyangu mulazwa zintu ziluleme. Ndijisi lulayo alwiiyisyo. . . . Amundiswiilile, bali acoolwe boonse babamba inzila zyangu. Nkaambo kufumbwa uundijana ulajana buumi, nkabela ulaba acoolwe kuli-Jehova.” (Tus. 8:6, 14, 32, 35) Imajwi aayo alapandulula kabotu-kabotu malailile ngotulangila Kumuswaangano Wacooko wa “Bamayi ba Jwi lya Leza.”
2 Izintu nzyobayandika ibabunyina nyika yoonse mbwiizulwa zyalangwa-langwa, aboobo ipulogilamu yamuswaangano yabambwa kutegwa izilanganye. Imalailile aakumuuya alimwi anzila zigwasya ziyoopegwa, ikuti zyabelesyegwa kabotu zitupa kuba bantu bakkomene, kubamba bulongwe bubotu a Jehova alimwi akuzumanana munzila iisololela kubuumi butamani. Masimpe, tulijisi kaambo kabotu ncotweelede ‘kuswiilila akuliyungizizya lwiiyo.’—Tus. 1:5.
3 Kaitanatalika Pulogilamu: Ikutegwa tugwasigwe atwaambo tuli mukupegwa, tweelede kuti katukkede mumaseneesu alimwi amizeezo yesu kiikalikide muciimo cibotu ciindi mapulogilamu naatalika. Eeci ciyanda kuti swebo katulibambile kabotu. Ikaambo kapati kayandika kutegwa eeci cikonzyeke nkakufwambaana kutalika kucita zintu. Amufwambaane koona kulibambila buzuba butobela. Amufwambaane kubuka kutegwa umwi aumwi munkamu yanu ajane ciindi cakulibambila alimwi akubaa cakulya. Amufwambaane kusikaa busena bwamuswaangano kutegwa mujane akukkala alimwi akulanganya zintu zimwi ziyandika kapati mapulogilamu kaatanatalika. Mapulogilamu anakutalikaa ciindi ca 8:45 hours buzuba bumwi abumwi.
4 Mbwaanga ikaambo kapati kakuswaanganina nkakutembaula Jehova “akati kambungano,” icibeela cimwi acimwi ceelede kutalika munzila iipa bulemu kuli Leza. (Int. 26:12) Akaambo kaako, toonse twakulwaizigwa kuti katukkede lwiimbo lwakujalula kalutana kwaambwa. Eeci cileendelanaa lulayo lwamu Magwalo lwaamba kuti: “Zintu zyoonse buyo zicitwe kabotu akucililana.” (1 Kor. 14:40) Ino eci caamba nzi kuli umwi aumwi wandiswe? Mwabona buyo sicuuno kakkede kucibumbili nyimbo zitalika nozicilila, cakufwambaana amukkale. Eeci ciyoomugwasya kutola lubazu camoyo woonse mukwiimba lwiimbo lujalula cibeela cimwi acimwi, akupa ntembauzyo kuli Jehova.—Int. 149:1.
5 Mumapulogilamu: Ezara “wakapangika moyo wakwe kukuyandaula mulao wa-Jehova, akuucita.” (Ezr. 7:10) Mbuti mbotukonzya kupangika myoyo yesu kuti tutambule malailile Jehova ngapa? Mbomuyaabulanga mitwe yamakani iisiyene-siyene iindandamikidwe aapulogilamu iisimbidwe, amulibuzye kuti, ‘Ino ncinzi Jehova ncali mukundaambila kwiinda mupulogilamu eeyi? Mbuti mbondikonzya kutubelesya twaambo ootu kutegwa ndigwasigwe antoomwe amukwasyi wangu?’ (Is. 30:21; Ef. 5:17) Amuzumanane kulibuzya mibuzyo eeyo mane muswaangano ukamane. Amulembe twaambo ntomukanza kuyoobelesya. Amujane ciindi cakutubandika camana cibeela cabuzuba bumwi abumwi. Eeci ciyoomugwasya kuyeeya alimwi akutubelesya twaambo ooto.
6 Kusitikizya mizeezo kwamawoola manji cilakonzya kuba ciyumu kapati. Ino ncinzi cikonzya kutugwasya kutazumizya mizeezo yesu kuyeeya zimbi? Amuzibelesye kabotu nguzu zyameso aanu. Ikapati, kufwumbwa nkotwalazya meso eesu, cipa kuti tubikkile nkuko maanu. (Mt. 6:22) Akaambo kaako, amweelebe cilengwa cakulanga kufwumbwa nkomwamvwa casabila naa muntu weenda. Meso aanu kaalangide buyo kumwaambi. Amutobelezye mu Bbaibbele lyanu magwalo naabalwa alimwi kamujalude Bbaibbele lyanu lugwalo noluli mukupandululwa.
7 Luyando lwa Bunakristo luyootukulwaizya kweeleba kunyonganya bamwi ciindi camapulogilamu. (1 Kor. 13:5) Eeci “[n]ciindi cakuumuna” akuswiilila. (Muk. 3:7) Aboobo, amweelebe kukanana ziteelede alimwi akweendeenda. Amucesye nyendo zyakuya kucimbuzi kwiinda mukulibambilila limwi. Mutataliki kulya naa kunywa ciindi cibikkidwe kacitanasika ccita kuti kamuciswa bulwazi bupati buyanda kucita boobo. Kulibaabo baleta mafooni amunkomwe, tuncini tuzibya kuti muntu ulayandika kumwi, muncini wakulekooda majwi avidiyo alimwi awakufwotozya, tabeelede kuzibelesya munzila iikonzya kunyonganya bamwi. Bazyali beelede kubona kuti mukwasyi wabo woonse—kubikkilizyaa bakubusi—bakkala antoomwe kutegwa babalanganye kabotu bana babo.—Tus. 29:15.
8 Imwakali, imwaalu walo wali kujanika kumiswaangano kwamakumi amyaka minji wakati: “Ndakabona kuti muswaangano ooyu wali mubotu kapati akaambo kakaambo komwe. Ibantu banji munkamu kubikkilizyaa bana bakali kulemba twaambo. Cakali kukondelezya kubona ceeci. Ma Bbaibbele akali kubelesyegwa kabotu ciindi mwaambi naakali kulomba kuti ajalulwe kuzibalo zimwi.” Ikuswiilila cakubikkila maanu kuli boobu masimpe kulalumbaizigwa. Takugwasyi buyo ndiswe alimwi abasimuswaangano beenzuma, pele kwiinda zyoonse kulemeka Mwiiyi wesu Mupati, Jehova Leza.—Is. 30:20.