Amwaabikkile Maanu Makani aa Leza
1 Tazili zyoonse zyaambwaa muntu zyeelede kubikkilwa maanu. Pele Leza naambaula, kuli kaambo ikayandika kapati ncotweelede kuswiilila. (Dt. 28:1, 2) Tulalumba kuti basikulemba bakasololelwaa muuya bakalemba “makani aa-Leza” kutegwa atugwasye. (Rom. 3:2) Muswaangano wacooko uboola uyootupa coolwe cakuteelela kumakani aaya anoobalwa alimwi akubandikwa. Ino mbuti mbomunga mwaabikkila maanu nywebo lwanu kumugama?
2 Amufwambaane Kusika Buzuba Bumwi Abumwi: Amuyeeye buyo ilukkomano ndobakajisi bana Israyeli eelyo nobakaambilwa kuyooswaanganaa Jehova ku Cilundu ca Sinai kuyooteelela Mulawo wakwe! (Kul. 19:10, 11, 16-19) Ikuti kakuli mbomulimvwa oobu andinywe kujatikizya kutambula malailile a Jehova kumuswaangano wacooko, muyoolibambila kutegwa kamusika cakufwambaana buzuba bumwi abumwi. Tatukaiswiilili pulogilamu yoonse ikuti katuccelwa kusika alimwi akunyonganya bamwi eelyo notuyandaula aakukkala. Pulogilamu inootalikaa 8:45 hrs. buzuba bumwi abumwi.
3 Nokuba baabo, ibafwambaana kuboola bunji bwaziindi inga tabakkede muzyuuno zyabo pe noitalika pulogilamu. Nkaambo nzi ncocili boobo? Balalindila kusikila eelyo sicuuno naamba lwiimbo lwakujula nkokuya baleke kwaambaula abeenzinyina akweenda kuya kooko nkobeelede kukkala. Atuzibe kuti sicuuno unookkede kucibumbili nyimbo zyamalimba zya Bwami nozicilila kakucili maminiti masyoonto kuti twiimbe lwiimbo lwakujula mucibeela cimwi acimwi. Eci nceciyeezyo cakuti tweelede kukkala muzyuuno zyesu! Mpoonya lwiimbo lwakujula lwatalika buyo, tunoolibambilide kale ikutola lubazu mukwiimbila Jehova intembauzyo.
4 Amuswiilile Antoomwe Amukwasyi: Eelyo makani aa Leza naakali kubandikwa kubana Israyeli kababungene, mikwasyi alimwi kubikkilizya “abana” bakali kuswiilila alimwi akwiiya. (Dt. 31:12) Amiswaangano yesu bana tabeelede ‘kulekelelwa buyo.’ (Tus. 29:15) Nobazyali, amubone kuti mwakkala amukwasyi wanu woonse—kubikkilizyaa bakubusi. Bazyali bamwi inga kabakkede kusikila ciindi cakwiimba lwiimbo lwakujula nobaya bayeeye kutola bana babo kucimbuzi. Pele ikucita boobo takuyiisyi bana ikuzyiba mbokuyandika kwiimba nyimbo alimwi akupaila mubukombi bwesu. Cilainda kubota kaka ikuti naa mwazicitila limwi nzyomuyanda kucita kacitana talika cibeela cimwi acimwi ikuti kacikonzyeka!
5 Ciyootugwasya ikuswiilila ikuti naa katupumuna kabotu lyoonse masiku alimwi akutalya zyakulya zinji kapati nobwaca. Amubikkile maanu kuzintu zili mukwaambwa amwaambi. Mutazumizyi mizeezo yanu kuyeeya zimbi. Amutobelezye mu Bbaibbele lyanu magwalo naabalwa. Amulembe twaambo tupati-pati mubufwaafwi. Makani amwi aamwi naali mukubandikwa, amutelaike ncaamba mwaambi alimwi akuyeeyela nzila mbomukonzya kwaabelesya makani. Wamana muswaangano amubandike nzyomwaiya mupulogilamu amukwasyi wanu. Ntwaambo nzi umwi aumwi ntwaabona kuti tulagwasya? Ino mbuti mukwasyi wanu mboukonzya kutubelesya munzila mbotu twaambo ootu?
6 Amulilemeke Jwi lya Leza: Miswaangano itupa coolwe cakwaambaula abeenzuma alimwi akuyanzana kukulwaizya. Ikwiinda mukufwambaana kusika, tuyoobaa ciindi cakubandika kaitana talika pulogilamu. Pele bamwi balabandika mukati kapulogilamu kabayeeya kuti kuyobeka kwabo takunyonganyi bantu kapati nkaambo mpaamuswaangano mupati. Noliba leelyo nomuswaangana mubunji, mweelede kuswiilila mbubwenya buyo mbuli leelyo nomuli kumuswaangano mu Ŋanda ya Bwami. Mafooni amunkomwe, tuncini tuzibya kuti muntu ulayandika kumwi, muncini wakulekooda majwi avidiyo alimwi awazifoto tazyeelede kunyonganya bantu mukati kapulogilamu.
7 Musa naakali kutambula Mulawo kuzwa kuli Jehova, “taakwe naakalya insima nekuba kunywa maanzi.” (Kul. 34:28) Mbubwenya buyo tacili cibotu ikulya naa kunywa mukati kamuswaangano. Ccita kuti kamuli balwazi, amulindile “ciindi cazyo” nomulaacite boobo.—Muk. 3:1.
8 Kumiswaangano imwi, ibakwesu abacizi kubikkilizyaa bana bacijisi penzi lyakweendeenda mapulogilamu kaaciyaambele. Basikugwasilizya bayoopegwa malailile akubapilusya nkobakkede aabo ibacita boobo. Basikulisungula aabo ibabeleka muzibeela zyaandeene-andeene beelede kukkala mukkede baswiilizi boonse bamanizya buyo mulimo ngobali kucita. Ccita kuti basikulisungula aaba kabacita mulimo umwi waalubazu uuyandika kucitwa mukati kamapulogilamu, beelede kukkala oomo muswaanganinwa kutegwa baswiilile kupulogilamu. Tabeelede kwiingaila muzibeela mobabelekela, kababandika abeenzinyina mapulogilamu kaatalikide kale.
9 Tatuyandi kuba “akazilukwa” mukuswiilila kwesu kwa Jwi lya Leza. (Heb. 5:11) Aboobo atukanze kuyoolilemeka kwiinda mukuswiilila cabusungu makani aa Leza ayoobandikwa kumuswaangano wacooko uboola alo aazwa kuli Jehova.