Ikubungana Antoomwe Kuti Tutembaule Jehova
1. Ino muswaangano ujisi mutwe nzi, alimwi nkaambo nzi Jehova ncotweelede kumukomba?
1 Jehova ulijisi nguzu kapati, busongo butalivwulili, bululami bulondokede alimwi ndoluyando. Mbwali Mulengi, Sikupa Buumi alimwi Mwami Wakujulu Aansi, walo alikke ngotweelede kukomba. (Int. 36:9; Ciy. 4:11; 15:3, 4) Muswaangano Wacooko wa “Amumulemeke Leza,” mwaka uuno uyooyumya makanze eesu akumutembaula mbwali ngo Leza mwini-mwini alikke.—Int. 86:8-10.
2, 3. Ino mbuti ikulibambila kabotu mbokuyoopa kuti tugwasyigwe kapati?
2 Ikulibambila Kabotu: Ikutegwa tugwasyigwe kapati kupobwe lyakumuuya Jehova ndyatubambilide, kulayandika kulibambila kabotu. (Ef. 5:15, 16) Sena mwakalibambila kale nkomuya kukkala, zyakweendela alimwi akulomba ciindi kumilimo naa kucikolo? Amutubambe twaambo ootu tuyandika kapati kakucili ciindi. Ikuti mwamuka kulomba ciindi, mulakonzya kwiindwa cibeela cimwi cabubambe oobu bukondelezya kapati. Toonse tweelede kujanika kucibeela cimwi acimwi.
3 Amulibikkile mbaakani yakufwambaana kusika abusena bucitilwa muswaangano abuzuba. Eeco ciyoomugwasya kujana aakukkala kalutana talika lwiimbo lwakujula alimwi ciyoomugwasya kuba amizeezo ikkalikene kutegwa muswiilile malailile aali mukupegwa.
4. Ino nkaambo nzi toonse ncotwalombwa kuti tukaletelele cakulya camasyikati kumuswaangano?
4 Toonse tuli mukulombwa kuti tukaletelele acakulya camasyikati, muciindi cakuzwa abusena bwamuswaangano akuya kuula cakulya kuli babaya basambala mumbali aamugwagwa ciindi camasyikati. Lukamantano lwanu mububambe oobu lulagwasya kusumpula luumuno alimwi akupa ciindi cinji cakuyanzana abasyomima. (Int. 133:1-3) Amuyeeye kuti bukoko tabuzumizyigwi pe abusena bucitilwa muswaangano.
5. Ino mbuti mbotunga twatalika kubamba myoyo yesu kumuswaangano?
5 Amuswiilile Akwiiya: Ezara camoyo woonse wakabamba moyo wakwe kuti atambule jwi lya Leza. (Ezr. 7:10) Wakabikka moyo wakwe kukuyiisya kwa Jehova. (Tus. 2:2) Tulakonzya kutalika kubamba myoyo noliba leelyo katutanazwa aŋanda, kwiinda mukuzinzibala kuyeeya mutwe wamuswaangano alimwi akuubandika amukwasyi wesu.
6. Ino ncinzi cikonzya kutugwasya kutegwa tubikkile maano kupulogilamu? (Amubone kabbokesi.)
6 Abusena aabungene bantu banji, kuli zintu zinji nzyotukonzya kubona alimwi acoongo izikonzya kutupa kutabikkila maano. Izintu zinyonganya zili boobo zilakonzya kutupa kuyeeya zimbi akuleka kuswiilila mwaambi. Ikuti cili boobo cacitika, tulakonzya kwiindwa makani aayandika. Inzila zipedwe mukabbokesi kali mucibalo eeci, zilakonzya kutugwasya kubikkila maano kukuswiilila.
7, 8. Ino mbuti mbotukonzya kutondezya kuti tulababikkila maano bamwi?
7 Amubabikkile Maano Bantu Bamwi: Makkamela alimwi amincini yakulekkooda mavidiyo zilakonzya kubelesyegwa ciindi camapulogilamu. Pele ikutegwa mutanyonganyi bamwi, amucite boobo abusena mpomukkede. Mafooni amunkomwe alimwi atuncini tuzibya kuti muntu ulayandika kumwi, zyeelede kuteegwa kabotu kutegwa zitanyonganyi bamwi. Kunyina cibelesyo camuntu ceelede kuswaanganizyigwa kumagesi naa mincini yakwaambauda yakumuswaangano.
8 Elo kaka tulakulangila kuyooswaangana antoomwe kuti tutembaula Jehova! Atukanze kuyoomulemeka kwiinda mukujanika kuzibeela zyoonse, kuswiililisya alimwi akwiinda mukuzibelesya nzyotuyooyiya.—Dt. 31:12.
[Kabbokesi kali apeeji 3]
Ikuswiilila aa Miswaangano Yacooko
▪ Amuzinzibale kuyeeya mitwe yamakani
▪ Amwaalange-lange magwalo
▪ Amulembe twaambo mubufwaafwi
▪ Amutubikkile maano kapati twaambo ntomuyanda kuyoobelesya
▪ Amuziinduluke nzyomwaiya