“Atusumpule Izina Lyakwe Toonse”
1. Ino ncoolwe nzi ncotuyooba aancico cakutembaula Leza antoomwe, alimwi ncinzi ncotukonzya kucita lino mukulibambila?
1 “Amulemeke Jehova antoomwe ambebo, atusumpule izina lyakwe toonse.” (Int. 34:3) Muswaangano Wacooko wa “Amweende a Leza” uuboola, uya kutupa coolwe cakusumpula zina lya Jehova antoomwe abakwesu abacizyi kuzwa mumbungano zinji. Sena mwakacita kale bubambe bwakujana kwakoona, zyakweendela alimwi akulomba ciindi kuli bakamulemba milimo? Cili kabotu kuti twazicitila limwi zintu eezyi kakucili ciindi.—Tus. 21:5.
2. Nkaambo nzi ncociyandika kapati kulibambila kusika abusena bwamuswaangano kakucili ciindi?
2 Kusika Kubusena bwa Muswaangano: Kuli zintu zinji zyeelede kulanganyizyigwa notujanika kumuswaangano. Kufwambaana kusika kuyootugwasya kulanganya zintu zitayeeyelwi izimunsya alimwi kuyootugwasya kujana aakukkala kakucili ciindi kutegwa tutole lubazu camoyo woonse mulwiimbo amupailo wakujalula muswaangano. (Int. 69:30) Kwaakusyaala maminiti masyoonto kuti cibeela camuswaangano citalike, sicuuno uyookkala kucibumbili ciindi nyimbo zyantalisyo nozili mukulila. Toonse tweelede kuti katukkede aciindi eeco kutegwa ipulogilamu italike munzila mbotu.—1 Kor. 14:33, 40.
3. Mbuti mbotukonzya kubalanganya bamwi notuyandaula aakukkala?
3 Ijwi lya Leza litukulwaizya kuti ‘zyoonse nzyotucita zibe muluyando.’ (1 Kor. 16:14) Ikubalanganya bamwi kuyootupa kutabalika-balika, kubindaana naa kutonkana kutegwa tujane zyuuno naa busena bwakukkala mbotuyanda nobatana kusika bamwi. Zyuuno antela busena bwakukkala zilakonzya kuyobodwa buyo aabo mbomweenda limwi mumootokala naa mbomukkala limwi.—1 Kor. 13:5; Flp. 2:4.
4. Ino mbubambe nzi bweelede kucitwa kujatikizya ciindi cakupumuna camasyikati, alimwi mbuti eeci mbociyandika?
4 Mwalombwa kuletelela cakulya camasyikati muciindi cakusiya busena bwamuswaangano kuti mukayandaule cakulya. Eeci ciya kupa kuti boonse babe akuyanzana kukulwaizya alimwi akujanika kuzwa kumatalikilo kwini kwacibeela cakumazuba. Ikuti kacikonzyeka, amubelesye mutaanga weelela uukonzya kubikkwa munsi lyacuuno. Pele zyakubikkila zyakulya zipati mbuli zeezyo zibelesyegwa kumapobwe, zyakubikkila zyamagilazi alimwi abukoko tazizumizyigwi kubusena bwamuswaangano.
5. Ino mbuti mbotunga twapangika myoyo yesu kumalailile ngotuyootambula?
5 Pobwe Lyakumuuya Libambilidwe Ndiswe: Mwami Josafati ngumwi ‘wakapangika moyo wakwe kukuyandaula Leza.’ (2 Mak. 19:3) Mbuti mbotunga twapangika myoyo yesu kautanatalika muswaangano? Zibalo apeeji yamamanino mu Awake! yamu May 22 alimwi a June 8 zilabandika twaambo mubufwaafwi twapobwe lyakumuuya liyoocitwa. Inga cainda kubota ikujana ciindi cakuzinzibala kuyeeya azibalo eezyo akuyungizya luyandisisyo lwazintu zyakumuuya Jehova nzyatubambilide. Alimwi ikupangika myoyo yesu kubikkilizya kulomba Jehova kuti atugwasye kumvwisya malailile ngotuyootambula alimwi akwaabelesya.—Int. 25:4, 5.
6. Ino ncinzi ncotulombozya, alimwi nkaambo nzi?
6 Toonse tulombozya kuya kwiiya zinji kuzwa mu Jwi lya Leza, katuzyi kuti kwiinda mulindilyo tulakonzya kufwutuka. (1 Pet. 2:2) Aboobo, atukajanike ku Muswaangano Wacooko wa “Amweende a Leza” alimwi ‘akusumpula zina lya Jehova antoomwe.’—Int. 34:3.
Kabbokesi kali apeeji 3]
Inzila Zyakusumpula Izina lya Leza
◼ Kulibambilila limwi
◼ Kutondezya luyando kubantu
◼ Kupangika moyo wanu