Ipulogilamu Mpya Yamuswaangano Wabbazu

Ino nimpindu nzi nzyomujana lino mukweendaa Jehova? Ino inga mwalikasya buti kusunkwa kulekela zintu zitali zyateokrasi kubweza busena bwazintu zya Bwami ibweelede kuba bwakusaanguna mubuumi bwanu? (Mt. 6:33) Sena cilamukatazya kwaandaanya cintu cibotu acibi munyika eyi iipa kuti cintu cibi cibaange ncibotu? (Heb. 5:14) Ootu twaambo tuyookananwa kumuswaangano wabbazu uuyootalika mu September 1999 wamutwe wakuti “Amugwasigwe Lino Akweenda Munzila zya Leza.”—Int. 128:1.

Icintu cipya mumuswaangano wabbazu oyu ncakuti mu Mujibelo kuyoocitwa Muswaangano Wamulimo wacitondezyo. Mulangizi wanu wabbazu uyoozibya mbungano bubambe bwacitwa kutegwa boonse bakaboole kabalibambilide kuzoogwasigwa apulogilamu.

Icibeela camutwe wakuti “Nobapainiya—Amucenjele Mbomweenda” ciyootutondezya mbotunga twabelesya busongo amaanu kutegwa tujane ciindi cakucita mulimo wabupainiya. (Ef. 5:15-17) Imutwe wakuti “Amucenjelele Nzila Zibonekaanga Zililuzi” uyootuyiisya mbotunga twasinizya kuti ncotucita cilamukkomanisya Leza mubukkale bwesu boonse. Imakani aakuti “Mbobutujatikizya Businsimi Bwakazuzikizigwa” ayootugwasya kuti tuyande Jwi lya Leza mumizeezo yesu alimwi amumyoyo. Imakani aabuleya aakuti “Inzila zya Leza—Zilagwasya!” Ayookankaizya mpindu izijanika lino kuzwa mukutobela milawo ya Jehova iiluleme.

Sena mulombozya kuyootondezya kubuleya kwiinda mukubbapatizigwa amaanzi kuti muyanda kweenda munzila zya Leza mukabe umwi wabalanda bakwe balyaabide? Amukanane amulangizi weendelezya kutegwa bubambe buyandika bucitwe.

Amukanze kuyoojanika kumuswaangano oyu uyoocitikila aciindi ceelede. Mukajanike mazuba oonse obile amuswaangano nkaambo “ngusicoolwe uuyoowa Jehova, uuenda munzila zyakwe.”—Int. 128:1.