Kuyungwa Abeenzinyoko Alimwi Acoolwe Cakukambauka Ncomujisi
1 Kuyungwaa beenzinyoko ncintu cisungilizya kapati—kukucita zintu zibotu naa zibi. Babelesima ba Jehova balatukulwaizya munzila iigwasya kwiinda mukutusungilizya kucita milimo mibotu ya Bunakristo. (Heb. 10:24) Nokuba boobo, ibanamukwasyi bamwi ibatali Bakamboni, mbomubeleka limwi, basicikolonyoko, basimukobonyoko naa ibeenzinyoko bambi buyo balakonzya kumusungilizya kutobela nzila iimpene anjiisyo zya Bunakristo. Balakonzya ‘kutusendaula mukweenda kwesu kubotu kwa Banakristo.’ (1 Pet. 3:16) Ino inga twazumanana buti amakanzeesu akuzumanana kukambauka mbokunga ibeenzuma balakonzya kutuyunga munzila mbyaabi?
2 Ibanamukwasyi: Zimwi ziindi, imulumi alimwi awisi bana uutali umwi wa Bakamboni ba Jehova inga katayandi kuti mukaintu wakwe alimwi abana bakwe kabatola lubazu mumulimo wabuleya. Oobu mbocakabede kumukwasyi umwi ku Mexico. Mulumi umwi, ibakaintu alimwi abana bakwe ibali ciloba bakatambula kasimpe. Kumatalikilo wakali kubakasya akaambo kakuti tanaakali kuyanda kuti mukwasyi wakwe kaukambauka akumwaya mabbuku aamba zya Bbaibbele kuŋandaa ŋanda. Wakali kubona kuti mulimo ooyu wakali mulimo uutako mpindu, iwaansi kapati naa uutapi bulemu. Nokuba boobo, mukaintu wakwe alimwi abana bakwe bakayuma mukusala kwabo kubelekela Jehova alimwi akutola lubazu lyoonse mumulimo. Mukuya kwaciindi, mwaalumi oyu wakatalika kubona mpindu yakuzumina bubambe mbwabikkide Leza bwamulimo wakukambauka mpoonya awalo wakalyaaba kuli Jehova. Cakamutolela myaka iili 15 kuti akazumine kasimpe, pele sena naakakatambula kasimpe ikuti mukwasyi wakwe nowatakakatila mumulimo wabo wakukambauka?—Lk. 1:74; 1 Kor. 7:16.
3 Mbomubeleka Limwi: Akaambo kakukambauka mulumbe wa Bwami, inyika yoonse ilitusulide. Ibamwi balausulaika naa kutaukkomanina mulimo wesu. Ibamwi balaufwubaazya alimwi akuukazya. Ikukazya ooku kulakonzya kucitwaa bantu mbomubeleka limwi, basimukobonyoko naa banamukwasyi. Mumeso aabantu aaba tulakonzya kuboneka mbuli kuti tulisweekede alimwi akuti tuli bafwubafwuba. (Joh. 15:19; 1 Kor. 1:18, 21; 2 Tim. 3:12) Majwi aabo aatali kabotu ngakuyanda buyo kuti tutyompwe alimwi akututolwaazya naa kuti tucileke kubeleka mulimo ooyu mubotu. Mucizi umwi ku Lusaka wakali kweendelezya ciiyo ciindi camasikati nobakali kulyokezya acikobokelo kumilimo. Naakali kwiingula mubuzyo ngwaakabuzyigwa kujatikizya ciyoobacitikila aabo bayoofwa lya Harmagedoni kabelesya Jeremiya 25:33, sikukazya umwi wakali muofesi mumonya iwakali kubala muteende wakatamikizya mucizi wesu kuti wakali kupindawula cakali kwaamba Bbaibbele kutegwa zyeendelane anzyotuyiisya. Mucizi wesu kunyina naakalekela muzeezo ooyu uutali kabotu kujatikizya mulimo wesu wakukambauka kumunyonganya. Sikukazya wakazumina kuyooleta Bbaibbele lyakwe lya King James Version buzuba bwakali kutobela. Cakacitika ncakuti ciiyo ca Bbaibbele cakatalisigwa. Imukaintu ooyu mucizi wesu uubbapatizidwe lino, muciindi camuntu uulya wakasaanguna kwiiya.
4 Basicikolonyoko: Tacigambyi pe ikubona Bakamboni bakubusi nkobayungwaa beenzinyina kucikolo alimwi ankobayoowa kutola lubazu mumulimo wakukambauka akaambo kakuti bakubusi bamwi balabafwubaazya. Mukubusi umwi Munakristo ku United States wakati: “Ndakali kuyoowa kupa bukamboni kubakubusi bamwi akaambo kakuti bakali kunoondifwubaazya.” Aboobo kunyina naakacibelesya ciindi ncaakajisi cakucita bukamboni kubeenzinyina kucikolo alimwi amucilawo ncapedwe. Ino mbuti mbomunga mwaliyumya mukukazya cilengwa cakuyungwa abeenzinyoko? Amusyome Jehova lyoonse akuyanda kumukkomanisya. (Tus. 29:25) Amulukkomanine luzibo ndomujisi mukubelesya Jwi lya Leza mumulimo wanu. (2 Tim. 2:15) Mukubusi ooyu waambwa aawa wakatalika kupaila kuli Jehova, akumulomba kuti amugwasye kubaa luyando lwakuti kakananaa basicikolonyina. Wakatalika kukambauka kucikolo abantu boonse mbakazyi kwiinda mukwiizya, zyakacitika kuzwa waawo zyakali zibotu kapati. Wakamanizya kati: “Aabaya bana bayandika kubaa bulangizi bwakumbele alimwi Jehova uli mukubelesya ndiswe kuti tubagwasye.”
5 Basimukobonyoko: Ambweni tulijisi basimukoboma naa beenzuma batatuyandi akaambo kambotubede alimwi anzyotusyoma. Ikuti naa kamuyoowa nzyobamuyeeyela, amulibuzye kuti: ‘Sena baliluzi luzibo lusololela kubuumi butamani? Ino ime inga ndacita nzi kutegwa ndibagwasye?’ Mulangizi wabbazu umwi wakabona kuti, ikutegwa umwi azwidilile ikukambaukila basimukobonyina aaba, weelede kucita oobo bucebuce. Amumulombe Jehova kuti amupe nguzu alimwi abusongo buyandika kutegwa muzumanane ikuyandaula baabo ibabombe myoyo.—Flp. 4:13.
6 Ikuti naa twazumina kuyungwa abeenzuma munzila mbyaabi, eci ciyoobakkomanisya basikutukazya, pele sena ikucita boobo kuyoobagwasya balo naa kuyootugwasya swebo lwesu? Jesu wakakazigwaa bantu bamumunzi ookwabo. Mane wakaliyumya mumajwi mabyaabi akali kwaambwa abanabokwabo. Pele wakalizi kuti nzila ilikke mbwaakali kukonzya kubagwasya nkwiinda mukuzumanana kusyomeka mububambe mbwakabikkilidwe a Leza. Aboobo Jesu “wakazyandamana mukukazyanya kuli bobuya kwabantu abamubisizya.” (Heb. 12:2, 3) Aswebo tweelede kucita mbubwenya. Amukanze kucibelesya kabotu coolwe ncomujisi ikukambauka mulumbe wa Bwami. Kwiinda mukucita boobo, “inga ulalifutula omwini, abalo bakumvwa ulabafutula.”—1 Tim. 4:16.