Mutabi Nomweenkeenka!
1 Iciindi notwalibambila kuunka kuyookambauka kuŋandaa ŋanda, ibuyumuyumu mbotujana kapati bujatikizya kunyamukaa ŋanda yesu akuyookambauka. Ikulimvwa kuti taakwe ncotukonzya kucita kulakonzya kupa kuti tweenkeenke kuyookanana kasimpe “[ku]bantu boonse.” (1 Tim. 2:4) Pele tatweelede kweenkeenka ikukambauka makani mabotu. Ino nkaambo nzi?
2 Mulumbe wa Jehova: Jehova wapa jwi lyakwe kwiinda mu Bbaibbele. Notutola mulumbe ooyu kubantu bamwi, tutola mizeezo yakwe, ikutali yesu pe. (Rom. 10:13-15) Ibantu nobakaka mulumbe wa Bwami, mubwini bakaka Jehova. Nokuba boobo, kunyina notutyompokelwa pe. Tusyoma kuti mulumbe ooyu uyakutambulwa kabotu mumyoyo yabaabo balombozya kucinca mubukkale bwamunyika alimwi bacete munzila yakumuuya.—Ezk. 9:4; Mt. 5:3, 6.
3 Jehova Ulabakwela Bantu: Imuntu wakakakide kutuswiilila kaindi ulakonzya lino kuswiilila akaambo kabukkale bwakwe bwacinca alimwi amoyo wakwe wabomba. Jehova lino ulakonzya kukondwaa muntu ooyu ‘akumukwela.’ (Joh. 6:44, 65) Nokwaba boobu, tuyanda kuti katulibambilide kubelesyegwaa Jehova alimwi akutobela busolozi bwamungelo notuyandaula bantu bali boobu.—Ciy. 14:6.
4 Leza Ulatupa Muuya Wakwe: Muuya uusalala utupa kuti tukanane ‘cabusicamba muli Jehova.’ (Mili. 14:1-3, Ci) Ikuti katuyeeya kukulwaizya kapati ooku nkotujisi mumulimo wesu, kunyina notuyoowayawaya kukanana kasimpe kuli basimukoboma, mbotubeleka limwi, basicikoloma, basazima abantu bayiide naa bavwubide kapati.
5 Jesu Wakatuyiisya Bwakucita: Jesu wakabelesya mibuzyo iipa kukkalaansi ikuyeeya, zitondezyo zigaminide, atwaambo twamu Magwalo. Wakapandulula kasimpe munzila nguba-uba, iikondelezya kuzwa mumoyo wakwe. Eezi zicili nzila zibotu kapati asunu. (1 Kor. 4:17) Ibukkale motukambaukila bulakonzya kusiyana, pele inguzu zyamulumbe wa Bwami tazicinci pe.
6 Tulaacoolwe cakubelesyegwaa Jehova kugwasya bantu munzila iilibedelede alimwi iigwasya kapati. Tutabi notweenkeenka! Atube basicamba alimwi akuzumizya Jehova kuti “atujulile mulyango” kutegwa tukanane makani mabotu kuli bamwi.—Kol. 4:2-4.