Ikwiiya Bbuku lya Muntu Mupati Kwiinda Iwakaponede
1 Ikutalikila munsondo yamu July 30, tuyootalika alimwi kwiiya bbuku lya Muntu Mupati Kwiinda Iwakaponede ku Ciiyo Cabbuku Cambungano. Elyo cinookkomanisya kaka kwiindulula buumi amulimo wa Jesu Kristo alimwi! Mbwaanga bbuku eeli liliindene munzila imwi kumabbuku aambi ngotwakaiya, imalailile masyoonto alakonzya kugwasya.
2 Ibbuku eeli talijisi manamba aamapeeji pe, aboobo imulongo uuli mu Mulimo Wesu Wabwami uyoondandamika zibalo ziyooyiigwa, ikanjikanji zyotatwe naa zyone ansondo. Izibalo 35, 111 alimwi 116 nzilamfwu, aboobo ziyoocimbaulwa cimwi acimwi muziiyo zyobile. Imukwesu weelela amana kubala cibalo coonse (naa katwe kamakani kasyoonto koonse, mbuli muzibalo 35, 111 alimwi 116), sikucitya ciiyo uyoobuzya mibuzyo iili kumamanino aacibalo iyeendelanaa cibalo naa cibeela cazwaa kubalwa. Ibwiinguzi kanjikanji tabutobelene mucibalo. Kwiingula mubufwaafwi alimwi bugaminide bweelede kakuyeeme amakani aali muciiyo.
3 Mwamana buyo, ikuti ciindi kacizumizya, oonse magwalo aapedwe kumamanino aacibalo ayeelede kubalwa. Magwalo malamfwu aapedwe alakonzya kwaabanwa muzibeela zisyoonto ikutegwa basikumwaya basiyene-siyene batole lubazu mukubala alimwi twaambo tulakonzya kupegwa kujatikizya zyazwaa kubalwa. Imibuzyo iisalidwe iibambidwe asikucitya ciiyo iyoogwasya kubikka antangalala twaambo tugwasya tutondezya mbuli magwalo aazwa kubalwa mbwaayendelanaa twaambo tutondezyedwe mubbuku. Mibuzyo yoonse alimwi atwaambo tupegwa zyeelede kubagwasya aabo bajanika kubikkila maanu kapati kuli Jesu Kristo, buumi bwakwe alimwi akuyiisya kwakwe.
4 Ibbuku lya Muntu Mupati lilalanga-langa buumi bwa Jesu munzila iitobelene kweelanaa mbuzyakali kucitika. Ikweezeezya zyakali kucitika alimwi akubikka mumizeezo nkozyakali kucitikila kulakonzya kugwasya kapati kuziyeeya. Aboobo, amubone kuti mwazilanga-langa zifwanikiso zyeebeka alimwi kwaciindi aciindi amulange kumaapu iili kumatalikilo aabbuku amana buyo makani aantalisyo.
5 Imatalikilo aabbuku ayoolangwa-langwa munsondo ntaanzi. Mwamana kubala mincali yoonse iili amutwe wamakani musyoonto, sikucitya ciiyo uyoobuzya mibuzyo yeelede njaakabamba. Ikulanga-langa ooku kwamatalikilo kuyoojula nzila kuziiyo ziyootobela mumwaka uuboola. Ikuzwidilila kujanika mukumanizya kulanga-langa makani kuyooyama kapati akulibambila kulibaabo boonse bajanika. Sikucitya ciiyo kwaambisya weelede kalibambilide kabotu-kabotu nsondo ansondo kutegwa agwasye nkamu kumuziba kabotu muntu mupati kwiinda boonse bakaponede, Mwami wesu alimwi Mufwutuli, Jesu Kristo.