Balangizi Basololela—Basikucitya Ciiyo Cabbuku Cambungano
1 Ncoolwe cipati kumwaalu naa mukutausi uuyelela kuba Sikucitya Ciiyo Cabbuku Cambungano. Ikulanga baabo bali munkamu yakwe munzila yakumuuya mmukuli mupati. Milimo yakwe njamisyobo yotatwe.
2 Ikuyiisya Kabotu: Sikucitya Ciiyo Cabbuku Cambungano uyandika kulibambila kabotu kuyiisya nkamu nsondo ansondo. Usola kugwasya kuti makani aayiigwa ateelelwe. Muciindi cakwaambaula walo alikke ciindi caciiyo, nokwayandika ulabuzya imbi mibuzyo iileta antangalala twaambo tupati twaciiyo. Mulimo ngwajisi ngwakucita kuti ciiyo kacikondelezya alimwi kaciyiisya alimwi akukulwaizya boonse kwiingula mumubandi. Mbaakani yakwe njakuyaka munzila yakumuuya, akutondezya mbocigwasya ciiyo alimwi akucita kuti makani abanjile baswiilizi.—1 Tes. 2:13.
3 Ibweembezi Bugwasya: Sikucitya Ciiyo Cabbuku Cambungano uli mbuli “macijilo aakulivuna kumuuwo aciyubilo cakucijila ciindi cakuwidwa imvula yamuyoba.” (Is. 32:2) Boonse bamunkamu yakwe ulabalanganya akubona kwaamba kuti lugwasyo lwakumuuya lwapegwa ciindi umwi naatyompwa.—Ezk. 34:15, 16; 1 Tes. 2:7, 8.
4 Kukambauka Cabusungu: Sikucitya Ciiyo Cabbuku Cambungano ulasola canguzu kucita bubambe bwakuti boonse munkamu yakwe bakatole lubazu munzila izwide mumulimo wamumuunda. Ulasololela mumulimo wakukambauka kazi kuti muuya wabusungu ngwatondezya wakuya mumulimo lyoonse ulabakulwaizya bamwi bamunkamu. (Kol. 4:17; 2 Tes. 3:9) Muciindi ulasola kubeleka aumwi aumwi wabamunkamu yakwe. Ikuti katuyanda kuciziba kabotu kukambauka akuyiisya mumulimo wamumuunda, Sikucitya Ciiyo Cabbuku Cambungano inga watugwasya kucita boobo.—1 Tim. 4:16; 2 Tim. 4:5.
5 Tulilelekedwe kapati kubaa zipego ezi kubantu lyoonse ibalibambilide kutugwasya munzila yakumuuya alimwi akututabilila caluyando. (1 Tes. 5:14) Atutondezye kulumba kucipego eci cibotu cizwa kuli Jehova kwiinda mukutola lubazu lyoonse muciiyo cabbuku alimwi akugwasilizya cakusyomeka mumulimo wakukambauka.—Heb. 10:25.