Ibalangizi Basololela—Sikucitya Ciiyo ca Ngazi Yamulindizi
1 Ngazi Yamulindizi Yaambilizya Bwami bwa Jehova ncibelesyo cipati ncabelesya “muzike musyomesi uucenjede” kumwaya cakulya cakumuuya kulindiswe “kuciindi ceelede.” (Mt. 24:45) Imwaalu uucitya Ciiyo ca Ngazi Yamulindizi ujisi mukuli mupati kapati wakuba mwiiyi uucibwene uupa cikozyanyo cibotu mubukkale bwa Bunakristo.—Rom. 12:7; Jak. 3:1.
2 Ikutegwa kayiisya kabotu, sikucitya Ciiyo ca Ngazi Yamulindizi weelede kubeleka canguzu kulibambila nsondo ansondo. Ulacita oobo cabusungu alimwi kabotu-kabotu. Iluyando ndwajisi kumbungano ulalutondezya mukusola camoyo omwe kucita kuti makani aayiigwa abanjile baswiilizi. Ubikkila kapati maanu kutwaambo tupati twaciiyo akutugwasya toonse kuti tubone mbotuswaangene amutwe wacibalo.
3 Ikulibambila koonse kuyandika nkwalibambila kujatikizya kwaalangila-langila limwi magwalo kutegwa abone mbwaabeleka. Ijwi lya Leza ulalisyoma kapati, elyo ukulwaizya mbungano kulibelesya bweelede ciindi caciiyo. Ikuti naa kaambo kapati teekaambwa ambungano, naa lugwalo teelwapandululwa, ulabuzya mubuzyo umwi wakuyungizya kukulwaizya kwiingula kuyandika. Munzila eyi, ulagwasya kuti tuzibe twaambo tuluzi alimwi ambotunga twatobela ncotwiiya mubukkale bwesu.
4 Sikucitya Ciiyo ca Ngazi Yamulindizi ulasola kuyaambele muluzibo lwakuyiisya. Taambaulisyi acibalo cimwi acimwi pe—utukulwaizya kwiingula—mumajwi eesu, mubufwaafwi alimwi cacigaminina. Ulakonzya kutuyeezya cimwi ciindi kuti sikwiingula wakusaanguna mumuncali aingule mubufwaafwi, cacigaminina kumubuzyo uulembedwe. Mpoonya kwiingula kwakuyungizya kuzwa kubaswiilizi kulakonzya kujatikizya kupandulula lugwalo alimwi ambolugwasya, kwaamba makani aagwasilizya, alimwi ambotunga twaatobela makani aabandikwa. Sikucitya Ciiyo ca Ngazi Yamulindizi ulasola kukulwaizya boonse kuyanda kutola lubazu kwiinda mukukulwaizya kulibambila kwamuntu umwi aumwi alimwi acaantoomwe mumukwasyi.
5 Mbotuli bantu ‘bayiisigwa Jehova,’ tulalumba kubaa “zipego kubantu,” mbuli zyabasikucitya Ciiyo ca Ngazi Yamulindizi, “bajisi mulimo . . . wakufundisya.”—Is. 54:13; Baefeso 4:8, 11 [BT]; 1 Tim. 5:17.