Amwaabelesye Kabotu Mabbuku Aakaindi
1 Muntu walikuyobola tuulunzuma twamabbuku aakaindi mumalaibbulali nyika yoonse mbwiizulwa. Nokuba boobo, nimpindu nzi iitamani njobajana bantu kumabbuku aya? (Muk. 12:12) Imabbuku aagwasya kapati ngaayo aabandika Bwami bwa Leza ancobuyakucitila bantu. Imbungano zinji zilijisi mabbuku aasiyene-siyene aali boobu aakamwaigwa musyule lyamwaka wa 1985. Mu January tunoomwaya mabbuku aya kubuleya.
2 Alaa Mpindu Iini-Ini: Nokuba kuti bamwi bandiswe inga bayeeya kuti mabbuku aaya ngakaindi taacigwasyi mbuli mabbuku ngotujisi mapya, tutalubi kuti ajisi kasimpe kamu Magwalo. Mulumbe wa Bwami ngaapandulula uciyandika sunu, elyo kuti naa wamvwugwa ulakonzya kufwutula. (Joh. 17:3) Aboobo, atubeleke cangunzu kwaabelesya mabbuku aaya aakaindi.
3 Ikutondezya mpindu yamabbuku aya, kuli mukaintu umwi wakakona mabbuku aa Watch Tower kuzwa kuli banyinakulu. Umwi Kamboni wakamubuzya mukaintu oyu naa wakalizi mpindu iini-ini yamabbuku aya. Mukaintu wakaingula kuti: “Tandizi mpindu yawo, pele ino inga ndaziba buti?” Mukaintu oyu wakacizumina ciiyo ca Bbaibbele, wakanjila mukasimpe, elyo kuzwawaawo wakaayandisya mabbuku aya ngaakasiilwa abanyinakulu. Akamugwasya ikaka mabbuku aya aakaindi ngaakakona!
4 Amwaabe Mabbuku Aya: Kunze lyakumwaya mabbuku aya aakaindi nomuli mumulimo waŋanda aŋanda, amwaamwaye nomucita nyendo zyakupilukila kubantu mbomuzi kuti balayanda kubala mabbuku eesu, kubikkilizya abaabo balembya Ngazi Yamulindizi a Awake! alimwi mbomutolela mamagazini lyoonse. Kuli baabo mbomuyiisya Bbaibbele, mabbuku masyoonto aakaindi inga abapa luzibo ilunga lwabapa kuteelela makani manji aajatikizya kasimpe. Mutalubi kuyungizya mabbuku aakaindi ngomutajisi akati kamabbuku aanu. Munzila eyi, mulabaa mabbuku mabotu aanga amugwasya kapati nomubala.
5 Muciindi cakwiide kwaayobola buyo mabbuku eesu aakaindi, atwaabelesye kukulwaizya bantu mbotuswaanganya kuti ‘balemeke Leza akubamba milazyo yakwe.’—Muk. 12:13.