Sena Ncecimulesya Kukambauka?
1 Bantu banji bali bbaatidwe mubuumi bwabo. Bakamboni ba Jehova bali akati kabaabo babbaatidwe kapati—ikwiiya Jwi lya Leza, kujanika kumiswaangano yambungano alimwi akutola lubazu mukukambauka. Kuyungizya waawo, tuli bbaatidwe amilimo yakumubili, yaaŋanda niiba yakucikolo alimwi amikuli iimwi minjaanji yalo iitumanina ciindi. Eeci ncintu cikatazya ikapati kuli basilutwe bamikwasyi.
2 Akaambo kakukatazya kwamali mumasena aasiyeni-siyeni, basilutwe bamikwasyi cabapa kubeleka mawoola manji alimwi amilimo miyumu kutegwa bajane ziyandika mubuumi. Iciindi mulimo wakumubili nuubatolela ciindi cilamfwu alimwi anibabelesya nguzu zinji, balaakucaalilwa buyo ciindi cisyoonto camumulimo wakukambauka. Mbwaanga mukuli wakubamba mukwasyi nguwabo, ibamwi balimvwa kuti bajisi buyo ciindi cisyoonto cakutola lubazu mumulimo. (1 Tim. 5:8) Tacikazyiki buya pe, mazubaano kuli zintu zinji zijatikizyidwe mubuyumuyumu buliko kumakani aakujana ziyandika mubuumi. Pele mulimo wakumubili taweelede kumulesya kukambauka makani mabotu. (Mk. 13:10) Aboobo, tweelede kubulanga-langa bukkale bwesu mbobubede.
3 Akaambo kakuti micito yanyika ilacinca-cinca, silutwe wamukwasyi ulakonzya kubaa cilengwa cakutola ciindi cilamfwu kumulimo wakumubili kumwi kajisi muzeezo wakuyungizya naa kubaa mali ambali ayandika akwaakubelesya kuzintu zimwi zilangilwa kucitika kumpela. (1 Kor. 7:31) Nokuba kuti kuyungizya mawoola kumulimo wakumubili inga kwalibonya kugwasya mukubaa zintu zinji zyakumubili naa kuyungizya ziindi zyakweebelela zintu alimwi azyakulikondelezya, sena eeci inga cakonzya kuleta lukomano lwini-lwini kumukwasyi akukkalwa moyo ikuti naa mwatalika kubelesya ciindi ceelede kulibambila zintu zyakumuuya alimwi akujanika kumiswaangano? Tweelede kuceeleba cintu cili coonse cilangilwa kubikka muntenda zintu zyesu zyakumuuya. Kumvwida lulayo lwa Jesu ‘lwakuyobola lubono kujulu’ akuba “bavwubi kuli Leza” [NW] ninzila yamaano.—Mt. 6:19-21; Lk.12:15-21.
4 Amusaangune Kulangaula Bwami: Jesu wakabayiisya basikumutobela kubikka zintu zyakumuuya mubusena butaanzi. Wakabakulwaizya kuti: “Mutalibiliki cakwaamba kuti, Tukalyenzi? Tukanywenzi? Tukasamenzi?” Nkaambo nzi ncaakambila boobu? Wakapandulula kuti: “Usowanu uuli kujulu ulizi kuti zintu ezi zyoonse zilayandwa kulindinywe.” Ikuti naa ncobeni tulasyoma, taakwe ciyakutusinkilila naa kutulesya kucita zintu Jesu zyaakaamba ziccilila zyakuti: “[Amuzumanane] kuyandaula Bwami bwa-Leza abululami bwakwe, elyo zintu ezi zyoonse [zyakumubili] mulaziyungizizigwa azyalo.” Ziyume zibe buti, Leza uyootupa zintu zyakumubili. (Mt. 6:31-33) Eeci tacili ciindi cakutalika kulibilika kujatikizya mbomunga mwajana ziyandika kumubili naa koongwa lubono kutegwa mube abuumi bubotu munyika eeyi yabweende bubyaabi yalo iilaafwaafwi kunyonyoonwa.—1 Pet. 5:7; 1 Joh. 2:15-17.
5 Ikaambo keni kapa kuti katubeleka mulimo wakumubili nkakuti katucikonzya kujana zyakumubili. Pele ino zyeelede kuti kazili zinji buti? Mwaapostolo Paulo wakalemba kuti: “Kufumbwa twanoojisi cakulya acakulivumba, nciconya eco mbubo ncinji.” Sena muyanda kuti kubota mwajana zinji kwiinda waawa? Ikuti kacili boobo, elo nkokuti muli mukutebula bubi Paulo mbwaakacenjezya kuti: “Abo bayandisya kuvuba balawida mukutepaulwa amukuteegwa amuzisusi zibi zinji zyabufubafuba zibisizya buumi akubbizya bantu mukunyonyauka amukusweeka.” (1 Tim. 6:8, 9; Mt. 6:24; Lk. 14:33) Ino mbuti mbotunga twazyiba kwaamba kuti lubono ndolutulesya kukambauka ?
6 Ikuti naa kuyandisya zintu zyakumubili kwacita kuti mubule ciindi cakuya mumulimo wamumuunda, ambweni tamukabwenyi buya ikaambo ncomweelede kulyaaba kukambauka makani mabotu, nkokuti tweelede kucinca kujatikizya zintu nzyotubikkide mubusena butaanzi. (Heb. 13:15, 16) Kuubya-ubya bukkale besu kuyootugwasya kubaa ciindi cakukambauka. Caboola kumakani aakubelesya ciindi alimwi anguzu zyesu, Bwami mbotweelede kubikka mubusena butaanzi lyoonse.
7 Milimo IitaIi Yabuyo: Majwi aa Paulo lyoonse alatukulwaizya ‘kubikka myoyo yesu lyoonse mumilimo ya Mwami nkaambo tulizyi kuti milimo yesu ku Mwami tiili yabuyo pe.’ (1 Kor. 15:58, Ci) Icitaanzi ‘mumulimo wa Mwami’ nkukambauka zya Bwami alimwi akugwasya bantu kuba basikwiiya. (Mt. 24:14; 28:19, 20) Kutegwa katutola lubazu mumulimo wakukambauka, tweelede kubamba ciindi cakukambauka amvwiki alimwi akutasola kucibelesya muzintu zimbi. (Ef. 5:15-17) Ikuti twacita oobo, nuuba mulimo wakumubili naa ncintu cimbi buyo tacikatulesyi kutola lubazu mumulimo wesu.
8 Ciindi notulyaaba kuyiisya bantu kasimpe ka Bbaibbele, tulatangala citaambiki kwiinda mukupa. (Inc. 20:35) Kwiinda mukuyandisya mulimo wakukambauka zya Bwami, tulakonzya kulanga kumpela akuba bantu basinizyide “nkaambo Leza tali sikampenda, takonzya kuluba milimo [yesu] akuyanda nko[twa]tondezya nkaambo k[a]zina lyakwe.”—Heb. 6:10.