“Ino Inga Ndacijana Kuli Ciindi?”
1 Bunji bwandiswe oobu mbotutongooka akaambo kakuti tujisi bubi mubuumi bwesu. Kwaambwa kuti, iciindi ncintu ciyandika kapati alimwi icifwambaana kumana akati kazintu zigwasya nzyotujisi. Aboobo, ino nkuukuli nkotunga twajana ciindi cakucita zintu ziyandika kapati mbuli kubala alimwi akwiiya Jwi lya Leza?—Flp. 1:10.
2 Icikonzya kutugwasya, nkusala nzyotuyanda kucita muciindi eeco ncotujisi ikutali kulombozya kubaa ciindi cinji pe. Toonse tujisi mawoola aali 168 mumvwiki, ambweni aali 100 tulakonzya kwaabelesya mukoona alimwi akukutauka milimo imwi. Aboobo, mbuti mbotunga twaabelesya munzila iigwasya mawoola aacaala? Ibbuku lya Ba-Efeso 5:15-17 litukulwaizya kuti tatweelede kweenda ‘mbuli bafwubafwuba pe, pele mbuli basimaanu akujatisya loko ciindi cesu coonse, akuti tweelede kumvwisya mbulubede luyando lwa-Jehova.’ Eeci citutondezya kuti tuyandika kucibelesya kabotu ciindi cili coonse ncotukonzya kujana mukucita zintu eezyo Jehova nzyaamba kuti nzyeziyandika kapati.
3 Jesu wakeezyanisya mazuba eesu kumazubaa Nowa. (Lk. 17:26, 27) Ibantu kuciindi eeco bakajisi bubi abukkale bwabo bwabuzubaa buzuba. Nokuba boobo, walo Nowa wakajana ciindi cakuyaka bwato bupati alimwi akuunka mukukambauka. (Heb. 11:7; 2 Pet. 2:5) Ino wakacijana buti ciindi? Nkwiinda mukubikka kuyanda kwa Leza mubusena bwakusaanguna alimwi akumumvwida kwiinda mukucita zintu “obo.”—Matl. 6:22.
4 Ino Ncinzi Ceelede Kusaanguna Kucitwa? Jesu wakati: “Teensi insima ilike njaaponena muntu, ulaponena amajwi oonse aazwa kumulomo wa-Leza.” (Mt. 4:4) Imvwiki amvwiki, tulatambula ‘zilyo zyakumuuya muciindi ceelede.’ (Lk. 12:42) Aboobo, ikutegwa tugwasigwe kapati tuyandika kubaa mulongo wesu tobeni wakubala alimwi akwiiya walo uyootugwasya kuti nzyotulya kazitugwasya mumubili. Akaambo kakulumba nkotujisi kucakulya cakumuuya, tatuciboni mbuli kuti ncakulya cuuba-uba ceelede kuligwa cakufwambaana mbuli muntu umwi mbwakonzya kulya cakulya cakumubili cakumena buumbulu. Muciindi caboobo, kulumba nkotucita kulatukulwaizya ikutola ciindi cili mbocibede ikwiiya alimwi akukkomanaa zintu zyakumuuya.
5 Ikulya cakulya cakumuuya kulakonzya kusololela kubuumi butamani. (Joh. 17:3) Kweelede kubikkwa mubusena bwakusaanguna muzintu nzyotucita buzubaa buzuba. Sena inga twajana ciindi cakubala Bbaibbele abuzuba alimwi akulibambila miswaangano ya Bunakristo? Inzya, tulakonzya kucijana. Twacita boobo, tuyootambula “bulumbu bupati” bwalo buboola kwiinda mukuziba alimwi akucita kuyanda kwa Leza.—Int. 19:7-11.