Kukambauka Bwami Kupa Kuti Bantu Bafwutuke!
1 Ooyu ngomulimo mupati naa uuyandika kapati uucitwa munyika ciindi cino. Jehova Leza, Jesu Kristo alimwi amakumi-makumi aazyuulu zyabangelo balibikkilide maano kumulimo ooyu. Ino mulimo nzi ooyu, alimwi ino nkaambo nzi ncouyandika kapati? Mmulimo wakukambauka Bwami alimwi uupa kuti bantu bafwutuke!—Rom. 1:16; 10:13,14.
2 Bantu bamwi bayeeya kuti balakonzya kubafwutula bantunyina kwiinda mukutola lubazu mukubambulula nyika. Ibanji balibbaatidwe mukusoleka kuleta luumuno, kusola kuponya malwazi naa kumana buyumuyumu bwakujana mali. Pele ino ncinzi cini-cini cinga cagwasya bantu?
3 Kukambauka Bwami Mmulimo Uuyandika Kapati: Mulumbe wa Bwami olikke nguupandulula ncontaponena, ncotupengela alimwi mbobulangizi bolikke bukozya kutuzyibya zyakumpela. Makani mabotu apa kuti bantu babe balongwe ba Jehova, alimwi abapa kubaa “luumuno lwa-Leza lwiinda miyeeyo yoonse yabantu.” (Flp. 4:7) Olikke mulumbe wa Bwami nguupa bantu busolozi bugwasya kutegwa baliyumye kumapenzi aabacitikila mubuumi bwamazuba aano alimwi ulapandulula mbuli bantu mbobayoofwutulwa iciindi nyika eeyi yaakunyonyoonwa kumbele. (1 Joh. 2:17) Sena tacikonzyi kugwasya kuti twasoleka canguzu kukambauka zya Bwami?
4 Mucikonzyanyo: Ino inga mwabagwasya buti bantu balangilwa kuba muntenda yadamu lilangilwa kupanduka? Sena inga cagwasya kupompa meenda kuzwa mudamu eelo litali kabotu? Antela sena inga mwaile kubotezya-botezya buyo munzi uuli muntenda? Nee! Basimunzi beelede kubusyigwa akubacenjezya kulunyonyooko lulaafwiifwi kucitika itegwa bazwe cakufwambaana! Aabo boona munzila yakumuuya mazuba aano bali muntenda mpati. (Lk. 21:34-36) Mbwaanga nyika eeyi mbyaabi iyoonyonyoonwa ino-ino, aboobo kaka atubeleke canguzu alimwi akubinda kukambaukila baabo boonse mbotukonzya kusikila!—2 Tim. 4:2; 2 Pet. 3:11, 12.
5 Atukakatile Kumulimo Ooyu: Atulange-lange nzila mbuli mbotukonzya kusikila bantu babombe myoyo akubaambila makani mabotu—mumaanda aabo, mumigwagwa, ikubaumina luwaile alimwi amukwiizya. Mulimo ooyu Jehova ngwaatupa kuti tubeleke, ngomulimo mupati ngotukonzya kucita. Ikuti naa twaucita cabusungu, ‘inga twalifwutula tobeni alimwi abaabo batuswiilila.—1 Tim. 4:16.