Amuzumanane Kugwasyigwaa Ngazi Yamulindizi Alimwi a Galamukani!
Mbwaanga kulembya mamagazini aa Ngazi Yamulindizi alimwi a Galamukani! cakalekwa, kuyandika kusoleka canguzu kubona kwaamba kuti swebo alimwi abaabo mbotukambaukila tulijisi mamagazini.
Mamagazini Aanu: Iciindi mamagazini ngimwakooda aakuleka kusika, amukayungizye mweelwe wamamagazini aanu ngimuyakooda ciindi ciccilila. Bazyali beelede kooda mamagazini manji kutegwa boonse mumukwasyi kakutabi uubulila. Ikulemba izina lyanu amagazini inga camugwasya kutegwa mutayaabili muntu ciindi nomuli mumulimo. Iciindi mamagazini naasika, bakwesu baalanganya banakubona kuti mamagazini oonse atambulwa cakufwambaana ku Ŋanda ya Bwami.
Musiigwa Mamagazini Lyoonse: Basikumwaya beelede kusoleka canguzu ikujana bantu bajisi luyandisisyo lwakutambula mamagazini kutegwa kababasiila lyoonse. Ikwiinda mukubatolela mamagazini, ciya kutupa ciindi cakukomezya luyando lwatondezyegwa akutalika ziiyo zya Bbaibbele.—Amubone Mulimo Wesu Wabwami wamu October 1998 apeeji 8.
Aabo Bayandika Lugwasyo Lwaalubazu: Ikuti muntu watondezya luyando, pele kakkala mucilawo citabelekwi-belekwi, kulakonzya kucitwa bubambe bwaalubazu kutegwa katambula mamagazini kwiinda mukubelesya kkeyala yakubusena ooko. Ikuti kakuli muntu uukkala mucilawo cambungano uutakonzyi kusikilwa, pele kajisi luyandisisyo lwakubala mamagazini mulakonzya kubazyibya iba Kkomitii Yamulimo Yambungano. Ikuti naa bazumina mulakonzya kumoodela muntu ooyo. Mafoomu ngomukonzya kubelesya nomooda mamagazini ngaaya (M-1 alimwi M-101).
Tulisinizyide kuti Jehova uya kuzumanana kutulongezya mukusoleka kwesu nkotucita mukwaambilizya Bwami kubantu kwiinda mukubelesya Ngazi Yamulindizi alimwi a Galamukani!