‘Amulilesye’
1 Iciindi naakali kwaambaula kuli basikwiiya zyamakani aalukwatano, Jesu wakati ikutakwata naa ikutakwatwa, ‘ncipego.’ Mpoonya wakati: “Oyo uukonzya kutambula atambule.” (Mt. 19:10-12) Mumyaka yakatobela kumbele, imwaapostolo Paulo wakalemba ibubotu bwakutakwata naa kutakwatwa alimwi akukulwaizya bamwi mukutobela cikozyanyo cakwe cakutakwata. (1 Kor. 7:7, 38) Banji mazubaano ‘balilesya’ kukwata naa kukwatwa alimwi bagwasyigwa abubotu bujanika. Ino mbubotu nzi bumwi bujanika?
2 Ikubeleka “Cakutalipakasizya”: Paulo wakalizyi kuti ikutakwata cakamupa kuti abe aciindi cakubelekela Jehova “cakutalipakasizya.” Mbubwenya buyo asunu, ibakwesu batakwete balakonzya kusika azyeelelo zyakukonzya kunjila Cikolo Cakwiiya Mulimo, alimwi imuntu uutakwete naa utakwetwe ulaangulukide kubeleka mulimo wabupainiya, kwiiya mulaka uumbi, kuunka kooko kubulide, kubeleka ku Beteli antela kubaa zyoolwe zimwi zyamulimo uumwi uulibedelede. Ulakonzya kubaa ciindi cinji cakubala, ikuzinzibala kuyeeya alimwi akupaila kuli Jehova camoyo woonse. Imuntu uutakwete naa uutakwetwe, lyoonse ulijisi ciindi cinji cakugwasya bamwi. Imilimo yoonse eeyi ‘iyoomugwasya.’—1 Kor. 7: 32-35; Inc. 20:35.
3 Ikutanyonganizyigwa kuli boobo mumulimo wa Leza, kuletela bulumbu butalivwulili. Nakamana myaka iili 27 ku Kenya, imucizyi uutakwetwe uumwi wakalemba kuti: “Ndilijisi beenzuma banji cakuti ndijisi mulimo mupati. Twakali kucita zintu antoomwe [alimwi] akuswayana. . . . Ndakali angulukide kuunka kufwumbwa nkondakali kuyanda akaambo kakuti tiindakakwetwe alimwi ndakajisi bubi mumulimo walo wakandiletela lukkomano kapati.” Wakayungizya kwaamba kuti: “Mumyaka yoonse eeyi, icilongwe cangu a Jehova cakakomena.”
4 Cipego Cakutakwata naa Kutakwatwa Amucibelesye: Jesu wakati, imakanze aakutambuda cipego cakutakwata naa kutakwatwa, ayelede kuba ‘akaambo ka Bwami bwakujulu.’ (Mt. 19:12) Mbubonya mbuli cipego cimwi, kutakwata naa kutakwatwa kweelede kubelesyegwa munzila iyooleta lukkomano ampindu. Ikwiinda mukubelesya coolwe cakutakwata naa kutakwatwa alimwi akusyoma Jehova kutegwa ape busongo anguzu, ibantu banji batakwetene baibona impindu yakutakwata naa kutakwatwa.