Amwiiye Ibubotu bwa Jehova
1 Notwamana kulanga kubbila kwazuba ikubotu naa notwamana kulya cakulya cabudodoodo, sena tatukulwaizyigwi ikulumba Jehova Intalisyo yabubotu boonse? Ibubotu bwa Jehova butukulwaizya kuti tumwiiye. (Int. 119:66, 68; Ef. 5:1) Ino mbuti mbotukonzya kutondezya bube bwabubotu?
2 Amutondezye Bubotu Kuli Baabo Batasyomi: Inzila iimwi motunga twaiya bubotu bwa Jehova, nkwiinda mukubabikkila maano aabo mbotutaswaangene limwi kulusyomo. (Gal. 6:10) Ikutondezya bubotu munzila iigwasya kulakonzya kubagwasya bantu kubalanga kabotu Bakamboni ba Jehova amulumbe ngobakambauka.
3 Mucikozyanyo, imukubusi mukwesu umwi mupainiya wakali kulindila kuti babonane adokotela kucibbadela. Wakakkede munsi aabacembele bakali kulibonya kuciswa kapati akati kabantu bakaliko. Ciindi cakwe nocakasika mupainiya ooyu kuti abonane adokotela, wakalekela bacembele aaba kuti babonane adokotela. Kumbele bakaswaangana alimwi, ooku kwakali kumusika. Ibacembele aaba bakakkomana kubonana amukubusi ooyu. Nokuba kuti musyule bacembele aaba bakali kukaka makani mabotu, pele lino bakabazyiba camasimpe kuti Bakamboni ba Jehova balabayanda basimukobonyina kapati. Ciiyo ca Bbaibbele calyoonse cakatalisyigwa kulimbabo.
4 Amutondezye Bubotu Buli Boobo Kubakwesu Abacizyi: Alimwi tulabwiiya bubotu bwa Jehova notugwasya basyomima. Nokuli ntenda, tuli akati kabaabo bafwambaana kugwasya bakwesu. Tulautondezya imuuya ooyu ngoonya notugwasya baabo batajisi zyakweendela kumiswaangano, notuswaya bakompeme alimwi akubasangalizya kabotu aabo mbotutazyi kabotu mumbungano.—2 Kor. 6:11-13; Heb. 13:16.
5 Inzila aimbi Jehova mwatondezya bubotu bwakwe, ‘njakufwambaana kujatila.’ (Int. 86:5) Ikwiiya nguwe kuyootugwasya kutondezya luyando lwabubotu kwiinda mukubajatila bantu. (Ef. 4:32) Eeci cilagwasya kutegwa kuyanzana kwesu abasyomima ‘kakuli kubotu kapati.’—Int. 133:1-3.
6 Ibubotu bwa Jehova butalivwulili abutugwasye akutupa kuti tumutembaule kapati akutukkomanisya. Alimwi ibubotu bwakwe abutukulwaizye kuzumanana ikwiiya bubotu bwakwe muli zyoonse zyotucita.—Int. 145:7; Jer. 31:12.