Kubamba Cilongwe Cini-Cini a Jehova
1. Ino mbuti mucizyi umwi mbwaakatalika alimwi akuyeeya bubambe bwakwe bwakucita zintu zyakumuuya lyoonse?
1 Mucizyi Munakristo umwi wakaamba kuti: “Ndakali mukasimpe kwamyaka iisika ku 20 naa iinda waawo kanduunka buyo kumiswaangano akutola lubazu mumulimo wamumuunda.” Nokuba boobo wakayungizya kuti: “Ndakazikuziba kuti nokuba kuti zintu eezyi zilayandika, zyalo zilikke tazikonzyi kundigwasya ciindi zintu nizyatalika kubija. . . . Lino ndabona kuti ndeelede kucinca kuyeeya kwangu akutalika pulogilamu yakuba aciiyo cigwasya kutegwa ndimuzibe ncobeni Jehova, ndimuyande akulumba ncaakatupa Mwanaakwe.”
2. Nkaambo nzi ncokuyandika kubamba cilongwe cini-cini a Jehova?
2 Kubamba cilongwe cini-cini a Jehova kuyandika kusolekesya. Takuli kutobela buyo cilengwa cakucita zintu zya Bunakristo. Ikuti katutambauli a Jehova lyoonse, mukwiinda kwaciindi inga ulaba mbuli muntu iwakali mulongweesu, pele lino ngututacaambauli limwi. (Ciy. 2:4) Atulange-lange mbuli ciiyo cesu tobeni ca Bbaibbele alimwi amupailo mbozikonzya kutugwasya kubamba cilongwe cini-cini a Jehova.—Int. 25:14.
3. Ino tweelede kucicita buti ciiyo cesu tobeni kutegwa tubambe cilongwe a Leza?
3 Mupailo Akuzinzibala Kuyeeya Zilayandika: Ciiyo cesu tobeni cikulwaizya takuli buyo kweenga twaambo tupati-pati tuli muciiyo alimwi akulanga magwalo atondezyedwe. Kuyandika kuti tuyeeyesye makani aayo ncaayubununa kujatikizya nzila zya Jehova, zyeelelo zyakwe alimwi abube bwakwe. (Kul. 33:13) Ikwaamvwisya kabotu makani aakumuuya kulajatikizya mbotulimvwa alimwi kutupa kuyeeya bukkale bwesu. (Int. 199:35, 111) Ciiyo cesu tobeni ceelede kucitwa katujisi makanze aakuyanda kubamba cilongwe a Jehova. (Jak. 4:8) Iciiyo cini-cini ciyandika ciindi akuba mubusena bubotu. Ikucita ciiyo lyoonse kuyandika kulizibizya kubutobela bubambe lyoonse. (Dan. 6:10) Nokuba kuti mujisi bubi kapati mubuumi bwanu, sena mulabikka ambali ciindi abuzuba icakuzinzibala kuyeeya bube bubotu bwa Jehova?—Int. 119:147, 148; 143:5.
4. Ino mupailo kubikilizya aciiyo cesu tobeni zitugwasya buti kubamba cilongwe cini-cini a Jehova?
4 Kupaila camoyo woonse ncibeela cimwi ciyandika kuciiyo cesu tobeni cigwasya. Kutegwa kasimpe kamu Bbaibbele katukulwaizye akutupa ‘kulumba akumanina Leza milimo mibotu yakumubotezya, cakulemeka acakuyoowa,’ tuyandika muuya uusalala wa Leza. (Heb. 12:28) Aboobo, tweelede kutalika ciiyo cili coonse kwiinda mukulomba muuya wa Jehova. (Mt. 5:3) Notuyeeyesya zili mu Magwalo akubelesya zibelesyo zigwasya zipegwa ambunga ya Jehova, tulatula moyo wesu kuli Jehova. (Int. 62:8) Kwiiya munzila eeyi ncibeela cakukomba calo citondezya kulipa kwesu kuli Jehova alimwi akugwasya kuyumya cilongwe cesu kulinguwe.—Jud 20, 21.
5. Nkaambo nzi ncokuyandika kuti katuzinzibala kuyeeya zili mu Jwi lya Leza abuzuba?
5 Mbuli zilongwe zyoonse, cilongwe cesu a Jehova ceelede kubambwa kabotu lyoonse kutegwa cikomene mubuumi bwesu boonse. Aboobo, atujane ciindi abuzuba icakubamba cilongwe a Leza, katuzi kuti awalo ulabamba cilongwe andiswe.—Int. 1:2, 3; Ef. 5:15, 16.