Amwiiye Ciimo Ncaakajisi Jesu
1. Ino nciimo nzi ncaakatondezya Jesu?
1 Nokuba kuti kunyina notwakamubwene Mwana a Leza, kwiinda mumakani aalembedwe aabuumi amulimo wa Jesu, mmasimpe tulamuyanda. (1 Pet. 1:8) Kwiinda mukutobela kuyanda kwa Bausyi, wakasiya cuuno cakwe cakujulu cisumpukide akuboola anyika. Kali muntunsi, wakabelekela bamwi cakutaliyanda amane wakaaba buumi bwakwe kubantu. (Mt. 20:28) Jwi lya Leza litukulwaizya kuti: ‘Amube aciimo nciconya ncaakajisi Kristo Jesu.’ Ino mbuti mbotunga twaiya muuya wakwe wakulyaaba?—Flp. 2:5-8.
2. Mbuyumuyumu nzi mbobajisi Banakristo banji, alimwi ino ncinzi cinga cabagwasya kubulwana?
2 Nomukatede: Nokuba kuti Jesu wakalilondokede, wakali kukatala. Cimwi ciindi ‘naakakatede mulweendo lwakwe,’ wakapa bumboni cakulomya kumwanakazi umwi muna Samariya. (Joh. 4:6) Banakristo banji sunu bajisi penzi ndimunya eeli. Mvwiki yamilimo iilemya noyagola, inga cakatazya ikutola lubazu mumulimo wakukambauka akaambo kakukatala. Pele ikuti katutola lubazu lyoonse, tuyoojana kuti imulimo wa Bunakristo ulatukatalusya kumuuya.—Joh. 4:32-34.
3. Mbuti mbotunga twaiya kulisungula nkwaakajisi Jesu mukuyiisya?
3 Alimwi iciindi cimbi, Jesu abasikwiiya bakwe bakeenda kuya kubusena bwakanyina bantu ikutegwa bakalyookezye asyoonto. Nokuba boobo, nkamu yabantu yakababona, eelyo yakafwambaana kuyoosika nkobakali kuya. Muciindi cakucimwa, Jesu “wakabafwida luzyalo” alimwi wakatalika “kubaiisya makani manji.” (Mk. 6:30-34) Ikutalisya akweendelezya ziiyo zya Bbaibbele kuyandika ciimo cili boobu. Kuyandika kuzumanana kusoleka alimwi akuba aluyando lwini-lwini kubantu. Ikuti lino kamuteendelezyi ciiyo ca Bbaibbele, mutaleki kusoleka kujana nociba comwe.
4. Ino mbuti bupainiya bwakugwasyilizya mbobukonzya kutugwasya kwiiya ciimo ncaakajisi Kristo?
4 Amuzibikke Kumbele Zintu Zyakumuuya: Bupainiya bwakugwasyilizya bulakonzya kutugwasya kubikkila maanu kapati kumilimo yakumuuya. Imucizyi mukubusi umwi wakalemba kuti: “Banyina bamweenzuma umwi bakakulwaizya mweenzuma andime kuti tucite bupainiya bwakugwasyilizya ambabo kwamwezi omwe. Ndilikkomene kapati kuti twakazumina. Ndakabazyiba kabotu bakwesu abacizyi, alimwi tiilyakalampa pe bakaba mbuli banamukwasyi kulindime. Alimwi ndakaba aciindi cinji cakwaambila bamwi kujatikizya Jehova alimwi akubayiisya makani aataliboteli aakasimpe ka Bwami. Eezyi zyoonse zyakandipa kulimvwa kuti ndilijisi cilongwe cibotu a Jehova alimwi ambunga yakwe.”—Int. 34:8.
5. Nkaambo nzi ncotweelede kuzumanana kusolekesya kwiiya ciimo ncaakajisi Jesu?
5 Toonse tulapenga akukazyanya kuliko akati kamubili wesu uutalondokede alimwi akulombozya kwesu kwakukkomanisya Jehova. (Rom. 7:21-23) Tweelede kuukazya muuya wanyika wakulilendekezya. (Mt. 16:22, 23) Jehova ulakonzya kutugwasya kuzwidilila kwiinda mumuuya wakwe uusalala. (Gal. 5:16, 17) Mbotulindila kufwutulwa akunjila munyika ya Leza mpya iiluleme, atwiiye ciimo ncaakajisi Jesu kwiinda mukubikka ziyandika zya Bwami azyabamwi kumbele lyazintu zyesu.—Mt. 6:33; Rom. 15:1-3.