Amulumbe
1 Nokuba kuti tupona ‘muziindi zikatazya,’ tulijisi twaambo tunji ncotweelede kumulumba Jehova. (2 Tim. 3:1) Tulalumba ikapati akaambo kacipego citaliboteli ca Mwanaakwe ncaakatupa. (Joh. 3:16) Kunze lyaboobo, nokuba kuti aabo ibali mubukombi bwakubeja bali munzala yakumuuya, swebo tulijisi cakulya cinji cakumuuya. (Is. 65:13) Tuli cibeela cabunyina bwanyika yoonse alimwi tulijisi coolwe cilibedelede cakutola lubazu mukutola ambele bukombi bwakasimpe. (Is. 2:3, 4; 60:4-10, 22) Ino mbuti mbotukonzya kulumba kuli Jehova akaambo kazilongezyo nzyatupa?—Kol. 3:15, 17.
2 Mulimo Uucitwa Calukkomano Acamoyo Woonse: Naakali kubandika zyakupa zintu zyakumubili, imwaapostolo Paulo wakalemba kuti: “Uupa calumwemwe nguuyandwa kwa-Leza.” (2 Kor. 9:7) Alimwi njiisyo eeyi ilabeleka kumulimo wesu kuli Leza. Ikulumba kwesu kulibonya munzila mbotuli basungu kukasimpe, kukondwa kwesu kumiswaangano ya Bunakristo, busungu mbotujisi mumulimo wamumuunda alimwi alukkomano ndotujisi mukucita kuyanda kwa Leza.—Int. 107:21, 22; 119:14; 122:1; Rom. 12:8, 11.
3 Mu Israyeli yansiku, Mulawo kunyina nowakali kwaamba mweelwe uugaminide kuzyakusanga zimwi. Aumwi mukombi wakali kukonzya kulumba kwiinda mukupa “mbubonya mbuli Jehova Leza . . . mbwamupa coolwe.” (Dt. 16:16, 17) Ncimwi buyo asunu, ikulumba nkotujisi kuyootukulwaizya kucita kusikila mpotukonzya kweelana abukkale bwesu mumulimo wakukambauka Bwami akugwasya bantu kuba basikwiiya. Ikanji-kanji ciindi cacilimo citupa zyoolwe zinji zyakuti tumulumbe. Bamwi balabweza mazuba aakupumuna kumilimo yakumubili naa kulekezya milimo imwi kuti bayungizye ciindi ncobatola lubazu mumulimo wamumuunda, nokuba kucita bupainiya bwakugwasyilizya. Sena mulakonzya kuyungizya ciindi ncomubeleka mumulimo wanu?
4 Kufwasuka Akulumba: Inzila iiyandika kapati mbotunga twalumba kuli Jehova nkwiinda mumupailo. (1 Tes. 5:17, 18) Jwi lya Leza litukulwaizya ‘kufwasuka akulumba.’ (Kol. 2:7) Noliba leelyo notujisi bubi kapati antela notutyompedwe, lyoonse tweelede kubikkilizya amajwi aakulumba mumipailo yesu yabuzuba abuzuba. (Flp. 4:6) Masimpe, kwiinda mumulimo wesu antoomwe amipailo yesu, ‘atumulumbe kapati Leza.’—2 Kor. 9:12.