Nyimbo Zikatalusya
1 Ikwiimba ncibeela cipati cabukombi bwesu bwakasimpe. Mu Israeli yansiku, Asafu alimwi ababunyina bakaimba kuti: “Amulumbe Jehova, mukwiilile izina lyakwe. . . . Amumwiimbile, amumutembaule. Amusekelele milimo yakwe yoonse iigambya.” (1 Mak. 16:8, 9) Mazubaano tulamwiimbila Jehova kumiswaangano yesu yambungano iicitwa amvwiki. (Ef. 5:19) Elo taciliboteli coolwe eeci cakutembaula zina lyakwe!—Int. 69:30.
2 Ikuswiilila Nyimbo zya Bwami, eezyo zyakaimbwa kwiinda mukubelesya malimba kulakonzya kuzuzya mizeezo yesu azintu zyakumuuya. Mucizyi umwi wakapandulula kuti: “Nyimbo nozilila, ndilaamvwa majwi mumizeezo yangu. Elo tailiboteli nzila yakuyeeya Jehova nondili mukuswiilila nyimbo!”—Flp. 4:8.
3 Ziindi Zyakuswiilila Nyimbo: Ikulizya Nyimbo zya Bwami kuŋanda kupa kuti kube ibukkale bwakumuuya bubotu ibupa kuti kube luumuno mumukwasyi. Mukwasyi umwi wakalemba kuti: “Tulalizya nyimbo eezyi cakwiinduluka-induluka kuŋanda yesu alimwi amumootokala kakunyina kukatala kuswiilila akaambo kakuti nyimbo zilakulwaizya. Kanji-kanji Nyimbo zya Bwami zitupa kuba amizeezo mibotu notulibambila kuunka kumiswaangano ya Bunakristo naa notuunka kumuswaangano mupati.” Mucizyi umwi wakati: “Ikuziswiilila nyimbo eezyi nondili mukucita milimo yaaŋanda kulandikkomanisya kapati. Nguni wakazyi kuti ndilakonzya kukkomana ciindi nondivwunga zisani ndamana kucapa? Ndiyeeya kulizya nyimbo eezyi ciindi nondityompedwe. Elo kaka nyimbo eezyi zilakulwaizya! . . . Inyimbo imwi aimwi ilakkomanisya.” Sena kuli ziindi nyimbo zikatalusya eezyo nozyinga zyamugwasya?
4 Bunji bwanyimbo mazubaano zitondezya muuya wanyika. Bazyali balakonzya kubagwasya bana babo kuyandisisya nyimbo zigwasya kwiinda mukuswiilila Nyimbo zya Bwami. Basikwiiya Bbaibbele banji alimwi abantu bajisi luyandisisyo abalo balakonzya kukkomana kuswiilila kujatikizya nyimbo zibotu eezyi izitembaula Jehova alimwi izikulwaizya.—Int. 47:1, 2, 6, 7.