Amwiiye Bululami bwa Jehova
1 “Jehova ulayandisya bululami.” (Int. 37:28) Nokuba kuti wakaamba kuti nyika eeyi iinyina bululami inyonyoonwe, wabikka bubambe bwakuti kucenjezya kucitwe cakusaanguna. (Mk. 13:10) Eeci cipa ciindi cakuti bantu beempwe akufwutulwa. (2 Pet. 3:9) Sena tulasolekesya kwiiya bululami bwa Jehova? Sena macise akupenga kwamukwasyi wabantu kulatupa kupya moyo akuyanda kubakambaukila makani aabulangizi bwa Bwami? (Tus. 3:27) Ikuyandisya bululami kuyootukulwaizya kutola lubazu cabusungu mukukambauka.
2 Kukambauka Cakutasalulula: Kwiinda mukukambauka makanze aa Leza kumuntu aumwi kakunyina kusalulula, ‘tucita bululami.’ (Mik. 6:8) Tweelede kukazya cilengwa ncotujisi cakutalondoka cakulanga ziimo zyabantu. (Jak. 2:1-4, 9) Kuyanda kwa Jehova nkwakuti “bantu boonse bafutulwe akuboola kuluzibo lwakuziba lusinizyo.” (1 Tim. 2:4) Ijwi lya Leza lyakasimpe lilakonzya kupa kuti bantu bacince kapati mubuumi. (Heb. 4:12) Ikuzyiba kaambo aaka kulakonzya kutukulwaizya kubasikila bantu alusinizyo, nokuba baabo bakali kukaka kuswiilila kasimpe kaindi.
3 Mucizyi umwi uubeleka mucintoolo wakayoowa ambwaakali kulibonya muntu umwi wakali kuula lyoonse. Nokuba boobo, bumwi buzuba wakalisungula, eelyo wakamukambaukila zya Paradaiso Leza ngwaakasyomezya. Cabukali wakaingula kuti tanaakali kusyoma twaambo twakulengelela alimwi wakali muntu uutasyomi nzyobasyoma boonse alimwi wakali kubelesya misamu iikola. Pele mucizyi tanaakatyompwa pe. Ibuzuba bumwi, wakabuzya mucizyi ooyo mbwaakali kuyeeya kujatikizya masusu aakwe malamfwu. Aboobo mucizyi camaano wakapandulula Bbaibbele ncolyaamba kumakani aayo. (1 Kor. 11:14) Icakali kukkomanisya alimwi akugambya ncakuti, ibuzuba bwakaccilila wakaanyoola malezu alimwi amasusu wakaagela! Wakayanda kwiiya Bbaibbele, aboobo mucizyi wakabamba bubambe bwaciiyo. Alimwi imukwesu wakakkomana kusololela ciiyo kumuntu ooyu walo wakayaambele eelyo wakalyaaba akubbapatizyigwa. Mbwenya mbuli mulombwana ooyu, banji babelekela Jehova mazubaano balalumba akaambo kakutasalulula akusolekesya kwabaabo bakatola mulumbe wa Bwami.
4 Jehova ino-ino uyoogusya kutalulama anyika. (2 Pet. 3:10, 13) Muciindi buyo cisyoonto ciceede, atwiiye bululami bwa Jehova kwiinda mukupa coolwe boonse ikutija lunyonyooko luboola kunyika ya Saatani iitaluleme.—1 Joh. 2:17.