Mbotukonzya Kukambauka Mucilawo Camakwebo
1. Ino mbubotu nzi buliko bwakukambaukila mucilawo camakwebo?
1 Sena mulayanda kukambauka kubusena kwalo bantu nkobatambula beenzu ankobajanika bantu kanjikanji? Mulakonzya kucita oobo mucilawo cambungano yanu. Munzila nzi? Kwiinda mukusika kumantoolo aajanika ooko. Kanjikanji basikumwaya ibakambaukila kucintoolo acintoolo bazwidilila.
2. Ino mbuti kukambauka mucilawo camakwebo mbokukonzya kweendelezyegwa?
2 Imbungano zimwi zilijisi zilawo zyamakwebo kazili zilawo zyayo zyakubelekela. Imukwesu uulanganya cilawo cambungano ulakonzya kubamba Territory Map Cards (S-12) (Kkaadi Iijisi Maapu Yazilawo Zyakubelekela (S-12) aajisi maapu yamasena aaya aamakwebo. Kufwumbwa maapu iitondezya nkomponi yakubelekela iijatikizya abusena bucitilwa makwebo yeelede kutondezya kabotu-kabotu kuti aaya taayelede kubelekwa mbuli cibeela cankomponi. Muzilawo zimwi, masena aamakwebo alakonzya kubelekwa antoomwe ankomponi. Ikuti naa tamuna kambaukide mucilawo camakwebo, amutalike kwiinda mukukambauka mumantoolo masyoonto.
3. Ino ncinzi ciyootugwasya kuzwiidilila notukambauka kucintoolo acintoolo?
3 Amubelesye Nzila Iitakatazyi: Nomukambauka kucintoolo acintoolo, ncibotu kusama kabotu kweelana ambomukonzya kusama nomuya kumiswaangano ku Ŋanda ya Bwami. Alimwi ncibotu kusala ciindi nobatajisi bubi. Ikuti kacikonzyeka, amunjile nokutako baula. Amulombe kwaambaula amweendelezi wacintoolo naa manijala. Amwaambe kaambo mubufwaafwi nkomuyanda kwaamba. Ino ncinzi ncomunga mwaamba?
4-6. Ino ncinzi ncotukonzya kwaamba notukambaukila mukamwini wacintoolo naa manijala?
4 Nomwaambaula amwini wacintoolo naa manijala, mulakonzya kwaamba kuti: “Basimakwebo bajisi bubi cakuti tabajaniki-janiki aŋanda, aboobo twamuswaya nkomubelekela. Mamagazini eesu abandika makani aacitika munyika yoonse.” Mpoonya amwaambe kaambo komwe mubufwaafwi kuzwa mumagazini iimwi.
5 Antela mulakonzya kusola nzila eeyi iitakatazyi yakuti: “Bantu banji balakonzya kuyanda kuzyiba zinji kujatikizya Bbaibbele, pele bajisi ciindi cisyoonto. Tulakiti eeyi ilapandulula bubambe bwakwiiya ciiyo citabbadelwi ibuliko bwakumugwasya kujana bwiinguzi kumibuzyo njomujisi yamu Bbaibbele.” Mpoonya amwaambe zili apeeji 4-5 mutulakiti yakuti, Sena Mulayanda Kuzyiba Zinji Kujatikizya Bbaibbele?
6 Ikuti uulisya mucintoolo kalibonya kuti ujisi bubi, mulakonzya kumwaabila buyo tulakiti akwaamba kuti: “Ndiya kuboola alimwi ciindi nomutajisi bubi. Ndiyanda kuti nkazyibe mbomuyeeya kujatikizya tulakiti eeyi.”
7. Ino mbuti mbotukonzya kubabikkila maano aabo bayanda kwiiya ibali muzilawo zyamakwebo?
7 Ikubabikkila Maano Aabo Bayanda Kwiiya: Mulakonzya kutalisya ciiyo ca Bbaibbele mucilawo camakwebo. Mupainiya waalubazu wakali kutola mamagazini lyoonse kumwaalumi simakwebo. Mwaalumi ooyu naakatondezya luyandisyisyo kuzintu nzyaakali kubala, mupainiya wakamutondezya bubambe bwaciiyo ca Bbaibbele kabelesya ibroshuwa ya Ncayanda. Ciiyo cakatalisyigwa mpoonya mpaakali kubelekela. Kweelana abukkale, mupainiya wakacifwiinsya ciiyo kusika kumaminiti aali 10 naa 15 mulweendo alumwi. Andiswe mbubonya, atuzumanane kuyandaula baabo beelela kwiinda mukukambaukila muzilawo zyamakwebo.