Sena Mulijisi Cilawo Cimugeme?
1. Ino cilawo cimugeme ncilawo cili buti?
1 Cilawo cimugeme nciceeco ncomupedwe kumugama. Cilakonzya kuba afwaafwi kutegwa kamufwambaana kusika nkuko alimwi akukambauka ambweni kamuli nyolikke naa asikumwaya umwi. Nokuba kuti ncibotu kugwasyilizya kububambe bwambungano bwabukambausi bwamukakamu ciindi nocakonzyeka, kuba acilawo cakubeleka aziindi zimwi kulakonzya kugwasya mukupa bumboni cakulomya, ikwaambisya mumbungano zijisi cilawo cipati.—Inc. 10:42.
2. Ino nimpindu nzi zimwi izijanwa mukuba acilawo cimugeme?
2 Mpindu Zyakuba Acilawo Cimugeme: Bamwi bajana mpindu azimwi mukukambaukila mucilawo cibageme cili afwaafwi ankobabelekela ciindi cakususula naa mbobakotokela buyo. Ibamwi babelekela antoomwe mbuli mukwasyi mucilawo mobakkala kwawoola lyomwe naa kwiinda waawo kacitanasika ciindi ca Ciiyo Cabbuku Cambungano. Aboobo, bantu nkobapilukila alimwi aziiyo zya Bbaibbele nzyobajana zili mubusena buli aafwaafwi, calo capa kuti babelesye kabotu nguzu, ciindi alimwi amali. Akaambo kakuti nzinji zikonzya kucitwa muciindi cisyoonto, kuba acilawo cimugeme kulakonzya kugwasya bamwi kucita bupainiya bwakugwasilizya ciindi aciindi nokuba kulilembya kuba bapainiya baciindi coonse. Kuyungizya waawo, kubelekela mucilawo cimugeme alimwi akuzibilana abakkala mumo kulakonzya kupa kuti batalike kutusyoma alimwi kulatugwasya kucinca mubandi wesu kweelana anzyobayandika, calo ciyoopa kuti mulimo wesu uzwidilile kapati.
3. Ino ncakuluula cili buti cakacitikila mupainiya umwi iwakaba acilawo cimugeme?
3 Umwi mucizi painiya walo iwakakulwaizigwa amulangizi wabbazu kuti abe acilawo cimugeme waamba kuti: “Ndakauzumina muzeezo ooyu alimwi muciindi cisyoonto buyo ndakazibilana akuba mulongwe kubantu bali mucilawo cangu. Ndakacinca ciindi ncondakali kubaswaya kweelena abukkale bwabo. Akaambo kaceeci, mweelwe wabantu nkondakali kupilukila amwezi wakayungizigwa kuzwa ku 35 akuyooindilila ku 80, alimwi ndijisi ziiyo zya Bbaibbele zili ciloba.”
4. Ino mbuti mbomukonzya kuba acilawo cimugeme alimwi ino inga mwacibeleka buti?
4 Mbomukonzya Kuba Acilawo Cimugeme: Ikuti kamuyanda kuba acilawo cimugeme, amubandike amukutausi uulanganya cilawo. Amwaanguluke kulomba sikumwaya umwi kuti mubeleke anguwe, alimwi kamwiilemba minzi aatajanika bantu. Mweelede kusolekesya kucimanizya kucibeleka cilawo mumyezi yone. Ikuti kamujisi penzi kucita boobo, mulakonzya kulomba lugwasyo kuzwa kumulangizi wa Ciiyo Cabbuku Cambungano naa bamwi buyo. Kumamanino kwamyezi yone, mulakonzya kukapilusya kapepa kacilawo ncomwamanizya kubeleka naa kulomba kuti mucibeleke alimwi. Nokuba boobo, tamweelede kunoobelekela mucilawo nciconya myaka yoonse pele amukapilusye kapepa kacilawo kutegwa bamwi bakacilombe. Ikuti kamuli mumbungano iijisi cilawo cisyoonto alimwi tacikonzyeki kuba acilawo cimugeme, ambweni mulakonzya kulomba cibeela cacilawo kuzwa kumulangizi waciiyo cabbuku.
5. Ino ncinzi ciyandika kutegwa tuuzuzikizye mulimo wesu wakukambauka?
5 Mulimo wesu wakukambauka “munyika yoonse” mmukuli uuyoosya. (Mt. 24:14) Uyandika kulibambila kabotu. Kuyungizya kubukambausi bwamukakamu, kukambaukila mucilawo citugeme kulakonzya kutugwasya kukambaukila bantu banji makani mabotu.