Ciindi Bantu Nobatajaniki Aŋanda
1. Ino ndipenzi nzi kanji-kanji lijanwa notubeleka mumulimo wakuŋanda-aŋanda?
1 Mumasena manji ciya bwiindila buya kukatazya kujana bantu aŋanda. Mu “ziindi zikataazya” ezino, bantu banji balasinikizyigwa kubeleka mawoola manji kutegwa bajane ziyandika mubuumi. (2 Tim. 3:1) Bamwi balakonzya kuzwa aŋanda akaambo kakubeleka kutegwa bajane mali aakuula zintu naa aakulikondelezya. Mbuti mbotukonzya kubakambaukila makani mabotu bantu bali boobu?
2. Mbuti mbotukonzya kuba masimpe kuti aabo batajaniki aaŋanda tuyoobabona alimwi?
2 Kamuziyobola Kabotu Nzyomulemba Kujatikizya Baabo Bajisi Luyandisisyo: Ntaamu yakusaanguna nkulemba baabo batajaniki aŋanda. Eeci cilayandika kapati ikuti kamubeleka mucilawo canu cakwiinduluka-induluka. Sena mulaakulemba izina lyamugwagwa, namba yacilawo, izina lyanu alimwi abuzuba? Mulakonzya kusiya busena bwakulemba nzyomuyanda ikuti nywebo naa sikumwaya umwi waakupilukila kuyoobelekela mucilawo bantu mobatajaniki aŋanda. Mwaakumanizya kukambauka, amukasiye nzyomwakalemba kumuntu uujisi kkaadi yacilawo, ccita kuti wazumina kubelekela mucilawo mobatajaniki bantu aŋanda. Amubelesye pepa limbi kulemba bantu bali boonse batondezya luyandisisyo aabo mbomuyanda kuyoobona alimwi.
3. Ino ninzila nzi zyapegwa zikonzya kutugwasya kusikila baabo batajaniki aŋanda?
3 Amukasoleke Aciindi Cimbi: Ambweni aabo batakaliko aŋanda mukati kansondo balakonzya kujanwa aŋanda kumazuba naa kumamanino aansondo. Sena inga mwabamba mulongo wakupilukila aciindi ceelede? (1 Kor. 10:24) Ikuti kamutakonzyi kuunka, mulakonzya kupa mazina aabantu batajaniki aŋanda kuli sikumwaya uukonzya kuunka aciindi cimbi. Ambweni, mulakonzya kubalembela lugwalo aabo batakajanika aŋanda naa kusola kubaumina luwaile. Basikumwaya bajisi penzi lyakuciswa-ciswa batakonzyi kuunka mumulimo wakuŋanda aŋanda balakonzya kumugwasya kucita boobo.
4. Ncitondezyo nzi citondezya mbociyandika kupilukila kubantu batajaniki aŋanda?
4 Nzila imwi itondezya mbociyandika kusoleka kusikila bantu aabo batajaniki aŋanda. Basikumwaya nobakali kuswaya aŋanda imwi cakwiindulula-induluka kwamyaka yotatwe, mukuya kwaciindi bakamujana uuli aŋanda. Cakajanika kuti mukaintu ooyo wakali kulindila ciindi coonse eeco kutegwa Kamboni asike kutegwa atalike alimwi ciiyo ca Bbaibbele ncaakali kuba ancico katanalongela kubusena ooko.
5. Ino ndilili notunga twaamba kuti cilawo camanizyigwa kubelekwa?
5 Amucimanizye Kucibeleka Cilawo: Ino ndilili notunga twaamba kuti twacimana kucibeleka cilawo? Kanji-kanji ndileelyo notwasoleka kubandika amuntu aŋanda aimwi. Cilakonzya kuba kabotu kusiya katulakiti naa magazini yakaindi kiitalibonyi aŋanda aatajaniki muntu, ikapati muzilawo zitabelekwi-belekwi. Cilawo ceelede kumana kubelekwa kwamyezi iili yone. Mpoonya ceelede kulangwa-langwa kutegwa mukwesu uulanganya cilawo alembe kuti camanizyigwa kubelekwa.
6. Nkaambo nzi ncotweelede kukambauka makani mabotu kumuntu woonse uuli mucilawo cesu?
6 Tuyanda kuti bantu banji babe acoolwe cakwiiya kwiita azina lya Jehova akufwutuka. (Rom. 10:13, 14) Eeci cilabikkilizya abaabo batajaniki aŋanda notukambauka kuŋanda aŋanda. Mbweena mbuli mwaapostolo Paulo, amukanze ‘kulungulula makani mabotu aaluzyalo lwa Leza.’—Inc. 20:24.