Mulimo Waalubazu October 16–November 12!
1 “Mamanino aa Bukombi Bwakubeja ali Afwaafwi!” Ooyu ngomutwe wakatulakiti ka Makani aa Bwami Na. 37, kalo kayooabilwa munyika yoonse kutalikila mwezi uuboola. Munsondo zyobile zyakusaanguna zyamwezi wa October, tuyooabila mamagazini aa Ngazi Yamulindizi a Awake! Kutalikila mu Muhulo, October 16 kuyoosika mu Nsondo, November 12, tuyootola lubazu kapati mukwaabila tulakiti ya Makani aa Bwami Na. 37. Mumazuba aamu Mujibelo amu Nsondo aamulimo ooyu, tuyooyaabila antoomwe amamagazini aamyezi eeyi.
2 Ibakonzya Kutola Lubazu: Boonse aabo basungweede mukumwaya makani mabotu bayooyanda kutola lubazu kusikila mpobakonzya. Bamwi bayoocita mulimo wabupainiya bwakugwasilizya. Sena mulijisi bana naa basikwiiya Bbaibbele ibayaambele kumuuya? Amubagwasye kubandika abaalu kutegwa babone naa baleelela kuba basikumwaya batabbapatizidwe. Baalu beelede kubweza ntaamu yakubandika abasikumwaya batacisungweede kutegwa babakulwaizye kutola lubazu, ambweni kwiinda mukubelekela antoomwe abasikumwaya bazibide mumulimo.
3 Matulakiti aa Makani aa Bwami Na. 37 ali mukutuminwa kumbungano zyoonse kutegwa basikumwaya bakaabilwe aasika ku 24. Bapainiya baciindi coonse bayooabilwa aasika ku 48. Basikumwaya boonse beelede kunoolemba mweelwe wamatulakiti ngobaabila alimwi akuulemba kunze kwatupepa ntobalembela lipooti yamulimo wamumuunda kumamanino aamwezi wa October a November. Mulembi uyooulemba mweelwe woonse wamatulakiti mbungano ngoyakaabila akuutumina kuofesi yamutabi kumamanino aamwezi aumwi. Matulakiti oonse aa Makani aa Bwami aayoosyaala waakumana mulimo alakonzya kubelesyegwa mucibeela cili coonse camulimo.
4 Ncomweelede Kwaamba: Kamuufwiinsya mubandi wanu lyoonse, calo ciyoomupa kumwaya mulumbe mubusena bupati kapati. Mulakonzya kwaamba kuti: “Kuba mulimo uucitwa mukugwasya banamaleya, nditola lubazu mukwaabila mulumbe ooyu uuyandika, walo uuli mukucitwa munyika yoonse. Aaka nkatulakiti kakumupa buyo. Ndamulomba kuti mukabale.” Ambweni inga cabota kutayumuna bbeeke lyamubukambausi nomuswaya minzi. Amube masimpe kuti mwabalemba bantu bajisi luyandisisyo mbomwajana.
5 Mbomukonzya Kucibeleka Cilawo Canu Coonse: Muciindi cakwaabila buyo matulakiti aa Makani aa Bwami mubukambausi bwamumugwagwa, amubikkile maanu kapati kubukambausi bwanu bwakuŋanda aŋanda alimwi acilawo camakwebo ikuti kamukonzya. Amwiilembe minzi aatajanika muntu alimwi akusoleka kupilukila ciindi cimbi naa buzuba bumbi mukati kansondo. Kutalikila mu Muhulo, November 6, katulakiti kalakonzya kusiigwa aŋanda aatajanika muntu. Nokuba boobo, ikuti mbungano kaijisi cilawo cipati kapati citakonzyi kubelekwa coonse mumazuba aabikkidwe, baalu inga basala kuti katulakiti ka Makani aa Bwami kakasiigwa aŋanda aatajanika muntu mumazuba oonse aamulimo ooyu.
6 Kunyonyoonwa kwa “Babuloni Mupati” kuyaabuswena kapati. Bantu bayandika kuzwa mulinguwe katana kuyoonyonyoonwa cakumaninina. (Ciy. 14:8; 18:8) Amulibambilile limwi lino kuyootola lubazu kusikila mpomukonzya mumulimo ooyu uuyoocitwa munyika yoonse kucita kuti bantu boonse bazibe kuti mamanino aabukombi bwakubeja ali afwaafwi!