“Icuulu Camyaka Cipya—Ino Mbukkale Buli Buti Mbomulangila Kumbele?”
1 Mubuzyo ooyu bantu bali kuubuzya munyika yoonse mbwiizulwa. Nokuba kuti muntunsi wayaambele muzintu zinji mumyaanda yamyaka yainda, ibantu tabacijisi abulangizi buli boonse akaambo kakuti mapenzi manji alo aapenzya bantu kwazyuulu zyamyaka nkwaacili aino. (Job. 14:1; Int. 90:10) Nkukuli muntu nkwakonzya kujana lugwasyo?
2 Mumwezi wa October alimwi a November, tuyoobaa coolwe cilibedelede cakubapa bwiinguzi kumubuzyo ooyo basimukoboma. Munzila nzi? Kwiinda mukumwaya Makani aa Bwami No. 36. Alaamutwe wakuti “Icuulu Camyaka—Ino Mbukkale Buli Buti Mbomulangila Kumbele?” Munsondo zyobilo zyakusaanguna mumwezi wa October, tuyoomwaya mamagazini aa Ngazi Yamulindizi alimwi a Awake! Mpoonya kuzwa mu Muhhulo, October 16 kusikila muli Bwasanu, November 17, tuyoosangana mumulimo wakumwaya Makani aa Bwami No. 36. Mumulimo ooyu, tuyoobikkila maanu ikapati mukumwaya Makani aa Bwami No. 36 mukati kamvwiki. Kumamanino aamvwiki, tunooamwaya antoomwe amamagazini mapya.
3 Sena Muyootola Lubazu Luzwide? Baalu, bakutausi alimwi abapainiya bayoolisungula ikusololela mumulimo ooyu akaambo kakuti mbebali kumbele mumulimo ooyu. Basikumwaya banji bacinca zintu nzyobacita buzubaa buzuba kutegwa bakabeleke mulimo wabupainiya bwakugwasilizya mwezi omwe naa yoonse yobile yakumwaya ooku. Ibamwi babikka bubambe bwakuyooyungizya ciindi cakubeleka mumulimo kwiinda aali ceeco ncobali kutola lyoonse.
4 Ibeendelezi ba Ciiyo Cabbuku Cambungano balakonzya kubaambele mukukulwaizya umwi aumwi wamunkamu yabo ikutola lubazu luzwide mukumwaya Makani aa Bwami No. 36. Kulakonzya kuba basikumwaya bamwi ibatacisungweede mumulimo wakukambauka. Baalu beelede kubaswaya aaba kutegwa bazibe ncobakonzya kucita kutegwa babagwasye. Ambweni mulakonzya kucita bubambe bwakuti sikumwaya uulaa luzibo akabeleke amuntu ooyo utacisungweede mumulimo wamumuunda mumyezi eeyi. Ambweni inga kwayandika buyo ntalisyo yamakani nguba-uba yambokumwaigwa Makani aa Bwami No. 36 iikulwaizya basikumwaya aabo ibatacisungweede kuti basungwaale alimwi.
5 Alimwi eeci ciyoopa coolwe cibotu kuli basikwiiya Bbaibbele ibayandoomanizya bbuku lya Luzibo alimwi ibeelela kuba basikumwaya batanabbapatizigwa ikuti batalike kutola lubazu mumulimo. Abalo bana baniini balakonzya kutola lubazu mumulimo ooyu uukondelezya.
6 Kuyandika buyo ntalisyo yamakani nguba-uba. Mulakonzya kwaamba kuti:
◼“Ndalisungula ikubelesya ciindi cangu kuti ndigwasilizye kumwaya mulumbe ooyu uuyandika kapati kumikwasyi yoonse iijanika omuno mucilawo. Eeli pepa ndilyanu ndamupa. Amulibale.” Inga cainda kugwasya ikutanyamuna cibbeeke camubukambausi eelyo nomwaabila Makani aa Bwami No. 36.
7 Ikulibambila Kabotu Miswaangano ya Mulimo Wamumuunda: Baalu beelede kubona kwaamba kuti bubambe bwakukambauka bwabikkwa buli kabotu kuli boonse alimwi bulabeleka. Ikwaambisya, mulangizi wamulimo weelede kubona kuti kuli cilawo cipati cakubelekela mulimo waŋandaa ŋanda alimwi amumasenaa makwebo kutegwa boonse banooliko bakatole lubazu luzwide mumulimo. Kufwumbwa kuti kacikonzyeka, amube abubambe bwamiswaangano yamulimo buzuba buli boonse mukati kamvwiki, kumamanino aamvwiki imwi aimwi alimwi amangolezya. Mulakonzya kubaa bubambe bwakuswaangana kuya mubukambausi mangolezya kutegwa aabo balakuunka kucikolo abaabo babeleka mulimo wakumubili wakucincana buya alimwi abamwi buyo bagwasigwe.
8 Ncomweelede Kucita Kujatikizya Baabo Batajaniki a Maanda: Mbaakani yesu njakuti twaambaule abamuka mwini ŋanda banji mbuli mbotukonzya. Ikuti kakutakwe uuliko aŋanda eelyo nomuswaya, amwiilembe namba yaŋanda eeyo akupilukila aciindi cimbi buzuba mbubwenya. Ikuti mwasika mumvwiki yamamanino yamulimo ooyu kamutabajani balaaŋanda aba, mulakonzya kubasiila pepa lya Makani aa Bwami No. 36 abusena mpolitakonzi kubonwa abantu bainda buyo. Baalu balakonzya kupa mbungano malailile aakusiya pepa lya Makani aa Bwami No. 36 kuli baabo batajaniki amaanda mulweendo lwakusaanguna eelyo nobabelekela mumasenaa muminzi alimwi azyeezyo zijisi cilawo cipati cakunga tacikonzyi kubelekwa coonse kuciindi eeci camulimo ooyu.
9 Atubeleke Canguzu! Mbungano zyoonse zyeelede kusoleka ikumanizya cilawo cazyo kabutanasika buzuba bwakumanizya mulimo bwa November 17. Ikuti cilawo canu kacili cipati, basikumwaya bamwi balakonzya kubeleka balikke kumasena ooyo aatakatazyi alimwi aatalangilwi ntenda iili yoonse. Bubambe oobu buyoopa kuti cuube-ube ikusikila bantu banji ibeelela. Amubone kwaamba kuti mwabalemba aabo boonse ibatondezya luyandisisyo.
10 Takuyandiki kwaoda buya Makani aa Bwami No. 36 mbwaanga mbungano imwi aimwi iyootuminwa mukuli wayo. Ibapainiya baalubazu, baciindi coonse alimwi abakugwasilizya bayoopegwa aumwi makkopi aali 100 kuti bakamwaye, pele basikumwaya bamumbungano bayoopegwa aumwi makkopi aali 30. Sena mulilibambilide kuyoobeleka canguzu mumulimo ooyu uulibedelede? Tulaa coolwe kaka cakuzibya basimukoboma eeco Leza ncasyomezyede kumbele!