Ikuyungizya Luyandisisyo Lwakajanwa Kwiinda mu Makani aa Bwami No. 36
1 Sena mwakamanizya ikumwaya Makani aa Bwami No. 36 ngomwakapegwa? Alijisi mubuzyo waaciindi ceelede walo bantu boonse ngobeelede kubikkila maanu: “Icuulu Camyaka Cipya—Ino Mbukkale Buli Buti Mbomulangila Kumbele?” Katutananjila mumwaka wa 2000, ibunji bwabantu bakalijisi bulangizi busiyene-siyene kujatikizya icuulu camyaka cipya. Makani aa Bwami No. 36 alanga-langa zimwi zyazintu eezyo zyakali kulangilwa alimwi atwaambila kuti bukkale sunu munyika bulatyompya, takwe abulangizi bwakuti zintu ziyooba kabotu pe. Ilikke myaka iili Cuulu ya Bulelo bwa Kristo Jesu njiiyooleta luumuno alimwi akuliiba, zyalo bantu banji nzyobalombozya. Ilusyomo lwesu mukubako kwa Bwami bwakwe ndolwaatukulwaizya ikumwaya Makani aa Bwami No. 36 kubantu boonse mbotwali kujana.
2 Mbobaateelela Bantu Makani Mabotu: Ikumwaya Makani aa Bwami kwamusyule kwatondezya kuti ncintu citukulwaizya mumulimo wesu. Kujatikizya Makani aa Bwami No. 35, mutabi waku Canada wakalemba kuti: “Mulimo uulibedelede ooyu bakaucita cabunkutwe basikumwaya abapainiya mumuunda alimwi bakakkomana kapati, aboobo balijisi zyakuluula zinji nzyobakajana nobakali kumwaya makani aaya.” Kakunyinaa kudooneka, andinywe mwatondezya busungu mukumwaya Makani aa Bwami No. 36.
3 Mulimo ooyu wakumwaya Makani aa Bwami uyoomana mu November 17, 2000. Sena busena bupedwe mbungano yanu bwakabelekwa boonse? Ikuti naa tebwakabelekwa boonse, ambweni baalu balakonzya kumulomba kuti muzumanane amulimo oyu kusikila kumamanino amwezi wa November.
4 Ino bantu baatambula buti Makani aa Bwami No. 36 aamwaigwa kusikila lino mumasenaanu? Ibamwi bayoolemba ziyandika kupepa lyakunze akulomba broshuwa ya Ncayanda antela ciiyo ca Bbaibbele caaŋanda. Pele tabali boonse bakatondezya luyandisisyo mumakani acuulu camyaka balangilwa kuyoobweza ntaamu, ccita kuti umwi wa Bakamboni ba Jehova wapilukila kuli mbabo. Boonse aabo bakatondezya luyandisisyo beelede kuswaigwa alimwi. Ino ndilili nokuyandika kucita boobo? Ikuswaya oku kweelede kucitwa cakufwambaana.
5 Amubone zyakuluula eezi zyakacitika kwiinda mukupilukila ooko kwakamwaigwa Makani aa Bwami No. 35. Mupainiya umwi ku Ireland wakasiya Makani aa Bwami kumwini cintoolo muulwa akulidwa zyakulya. Mwanakazi ooyo wakaukkomanina mulumbe mpoonya wakamwiita mucizi kuti akapilukile. Mucizi wakapilukila nokwakainda mazuba obile, mpoonya wakatalisya ciiyo ca Bbaibbele. Ku Denmark, aŋanda imwi aatakali muntu uli woonse kwakasiigwa pepa lya Makani aa Bwami. Ibuzuba oobo mbubwenya mwanakazi wakali kukkala mpawo wakatuma kapepa ikalembedwe zina lyakwe kuofesi lyamutabi kalo kakatumwa kumbungano ili mubusena mumona mwakkala. Kaitanamana mvwiki, bacizi bobile bakamuswaya akubikka bubambe bwakwiiya alimwi mwanakazi oyo wakajanika kumuswaangano ku Ŋanda ya Bwami ciindi cakusaanguna!
6 Ncomweelede Kwaamba Mwapilukila: Ikupilukila nkotwakasiya Makani aa Bwami tacikatazyi alimwi ncintu cikondelezya mumulimo wesu. Nomupilukila, cili kabotu ikubwezelezyaa pepa lya Makani aa Bwami No. 36 ambweni mwiniŋanda tacilijisi pepa eli. Mulakonzya kusoleka nzila eezi.
7 Mwamana kulipandulula kumwiniŋanda, mulakonzya kwaamba kuti:
◼“Ndakamusiila pepa limwi lilaamutwe wakuti ‘Icuulu Camyaka Cipya—Ino Mbukkale Buli Buti Mbomulangila Kumbele?’ Sena mwakakulwaizyigwa ikubala kuti ino-ino myaka iili Cuulu ya Bulelo bwa Kristo Jesu iyootalika akuleta bukkale bwamu Paradaiso? [Amutondezye zifwanikiso zya Paradaiso zili mu Makani aa Bwami No. 36.] Kupeeji lyamamanino mwaambilwa kulomba kkopi yabroshuwa ya Ncinzi Leza Ncayanda Kulindiswe?” Amulitondezye broshuwa akuvwununaa ciiyo 5, mubale mubuzyo wakusaanguna alimwi amuncali 1 alimwi a 2, mpoonya akulomba mwiniŋanda kuti aambe ncaamvwa. Amubale lugwalo lomwe naa obile akwaabandika. Ikuti kacikonzyeka, amulange mubuzyo aumwi alimwi amuncali mpoonya amumwaambile kuti muyoopilukila kutegwa mukazumanane amubandi.
8 Mbwaanga broshuwa lya Ncayanda naa bbuku lya Luzibo ngamabbuku aakumwaya mumwezi wa November, mulakonzya kwaamba kuti:
◼“Nondakamuswaya mazuba masyoonto ainda, ndakamusiila pepa lya ‘Icuulu Camyaka Cipya—Ino Mbukkale Buli Buti Mbomulangila Kumbele?’ Ipepa eli lilijisi makani aamutamba kwiiya Bbaibbele aŋanda yanu kakunyina kubbadela. Ndaboolela kuti ndizikumutondezye cibelesyo ncotubelesya mukwiiya. [Amubatondezye broshuwa ya Ncayanda kucivwumbyo cakusyule; naa kubatondezya bbuku lya Luzibo akuvwununa kumapeeji 188-9.] Icuulu camyaka icaambwa mu Bbaibbele ciyooleta bukkale buli boobu mbumubonaa cifwanikiso eeci. Ikutegwa tukajanike mu Paradaiso, tweelede kubaa luzibo lwini-lwini lwa Leza. Andimutondezye asyoonto buyo mbotwiiya Bbaibbele.”
9 Ikumwaya Makani aa Bwami No. 36 kwatukulwaizya kuyungizya ciindi ncotutola lubazu mumulimo akupa bukamboni kubantu banji. Tusyoma kuti eci cabakulwaizya bantu banji mubusena oobo ikubaa luyandisisyo. Ikusoleka kwesu nkotucita antoomwe ikuyungizya luyandisisyo olu kumwi Jehova katugwasilizya, ciyootupa kuti tujane bantu banji ibali mbuli mbelele.—Mt. 10:11; Inc. 13:48, 49, 52.