Amupilukile Kuli Baabo Bakatondezya Luyando mu Makani aa Bwami
1 Mumvwiki zisyoonto zyainda, twajisi coolwe cakumwaya Makani aa Bwami No. 35, aalaa mutwe wakuti “Mwati Kuli Nobayooyandana Buya Bantu Boonse?” Basikumwaya munyika yoonse bali mukusoleka kusikila bantu banji mbobakonzya amulumbe ooyu wa Makani aa Bwami. (Mt. 10:11) Nokuba kuti kumwaya kweelede kumana mu Nsondo, mu November 16, ikuti naa cilawo cakukambaukila kacitanamanisigwa alimwi ikuti imbungano kaicijisi makkopi, ibaalu inga bamulomba kuti muzumanane kumwaya Makani aa Bwami No. 35.
2 Aaka kapepa ka Makani aa Bwami kabakulwaizya bantu banji. Balibonena kuti bunji bwabantunsi baba basilunya aboobo bantu aaba balimukuyeeya naa kumbele kuyakuba buti. (2 Tim. 3:3) Tuyanda kupilukila kuli baabo bakatondezya luyando.
3 Makani aa Bwami Atambulwa Kabotu: Mukumwaya kwamu 1995 kwa Makani aa Bwami, imukaintu umwi iwakatambula kapepa kamakani ayo wakainka kumuswaangano ku Ŋanda ya Bwami nkaambo wakayandisisya kwiiya zintu zimbi Bakamboni ba Jehova nzyobasyoma. Amuswaangano oyo mpoona-mpoona wakazumina ciiyo ca Bbaibbele, elyo kuzwa leelyo wakazumanana lyoonse ikujanika amiswaangano yoonse. Kwiinde buyo ciindi cisyoonto, wakalembela cikombelo nkwaakali kunjila, akubaambila kuti tacili umwi wabo pe!
4 Kusika aciindi cino, kutegwa myaanda-myaanda yabantu muzilawo zyoonse baubala mulumbe uuli mu Makani aa Bwami No. 35. Pele ino bakautambula buti mulumbe ooyu? Nokuba kuti bakakkomana kuzintu nzyobakabala, ibanji kwiina nobanga babweza ntaamu kusikila mane umwi wa Bakamboni ba Jehova akabasikile alimwi. Sena muli mukulibambila kupilukila? Iluyando lwamuntuma lweelede kutukulwaizya kucita boobo. Boonse ibakatondezya luyando mu Makani aa Bwami beelede kuswaya alimwi.
5 Ino Muyakwaamba Nzi Mwaakupilukila? Mulakonzya kubandika mbuli mulumbe ooyo wamu Makani aa Bwami mbowakasika aciindi ceelede mpoonya akubabuzya mubuzyo uunga wabakkazya ansi kuyeeya. Amuswiilisisye ciindi mwini wamunzi naambaula ikutegwa muzibe ncayeeya. Mpoonya amumutondezye kaambo kamwi kali mubroshuwa ya Ncayanda, yalo iyakaambwa mu Makani aa Bwami. Ikuti naa baciyandisisya, amusoleke kutalisya ciiyo ca Bbaibbele mpoonaawo.
6 Ngaaya malailile amwi ngomunga mwasola ciindi nomupilukila kuli baabo ibakatondezya luyando mu “Makani aa Bwami” No. 35:
◼ “Ndasyoma mulayeeya mulumbe uulya ngweekamusiila calino-lino awa. Imulumbe ulya ujatikizya kaambo kapati ikali mukwaandaanya banamaleya sunu—ikutayandana.” Amutondezye bumboni buli apeeji 2 mu Makani aa Bwami aamutwe wamakani wakuti “Luyando Lwabusibukobonyina Lwamana.” Mpoonya amubuzye kuti, “Sena muyeeya kuti mmakanze aa Leza kuti banamaleya kabapona boobu?” Amulindile bwiinguzi. Amuye ku ciiyo 5 mubroshuwa lya Ncayanda, akusola kutalisya ciiyo ca Bbaibbele.
◼ “Eliya notwakaswaangana andinywe lutaanzi, ndakamusiila mulumbe umwi wamakani aakuti ‘Mwati Kuli Nobayooyandana Buya Bantu Boonse?’ Sena muyeeya kuti inyika iili boobo ilakonzeka?” Amulindile bwiinguzi. Amuye ku ciiyo 6 mubroshuwa ya Ncayanda, akubala muncali 6. Mpoonya amubale cisyomezyo ca Leza kuli Mika 4:3, 4. Ikuti mukamwini munzi ulibonya kuti ucilaa luyando, amumusiile broshuwa akutalisya ciiyo.
◼ “Ciindi cainda neekamuswaide, ndakamusiila makani amwi aalaa mutwe wakuti ‘Mwati Kuli Nobayooyandana Buya Bantu Boonse?’ Akali kukulwaizya ciiyo ca Bbaibbele caaŋanda icipegwa buyo. Ndapilukila kutegwa ndimutondezye bbuku ilitugwasya kwiiya ndyotubelesya. [Amutondezye bbuku lya Luzibo.] Eeli bbuku lilapandulula kujatikizya ciindi ibantu boonse nobayooyandana, alimwi lilaingula amibuzyo imbi iimukatazya lyoonse ndiza mbuli yakuti: Nkaambo nzi ncotucembaala akufwa? Nkaambo nzi Leza ncalekelede kupenga? Ncinzi cicitika kubayandwa besu bafwide?” Mpoonya amubuzye kuti, “Sena inga mwandizumizya kumutondezya mbocicitwa ciiyo?” Ikuti mwini munzi wacikaka ciiyo, amumubuzye naa inga wayanda kulibala bbuku alikke. Ikuti ulayanda, amumusiile bbuku aakusanga kwalyoonse. Amulibambile kupilukila alimwi.
7 Mbocitikamanizigwe buyo cilawo cesu kusikwa koonse-koonse a Makani aa Bwami No. 35, tulakonzya kumwaya bbuku lya Luzibo mumazuba aatikasyaale mumweezi. Imalailile mabotu manji ngomunga mwabelesya nomumwaya bbuku eeli alakonzya kujanwa kupeeji lyakusule kwa Mulimo Wesu Wabwami mukumwaya kwamu December 1995; March, June, November 1996; alimwi a June 1997.
8 Ikumwaya ooku kulibedelede kwa Makani aa Bwami kweelede kutukulwaizya toonse ikusolekesya mumulimo wakukambauka. Kwiinda mulugwasyo lwa Jehova tulakonzya kusyoma kuti kumwaya ooku kuya kuzwidilila, ikugwasya bantu kuziba kuti Leza uyanda kuti bantu boonse kabayandana. Jehova azumanane kulongezya kusoleka kwesu kwanguzu ciindi notupilukila kuli baabo bakatondezya luyando mu Makani aa Bwami.