Kwaabila Tulakiti Yaalubazu October 20–November 16!
1 Kutalikila mu Muhulo, October 20 alimwi akuzumanana kwansondo zyone, tuyootola lubazu mukwaabila tulakiti mpya iijisi mutwe wakuti, Sena Mulayanda Kuzyiba Bwiinguzi Bwakasimpe? Tusyoma kuti kwaabila katulakiti aaka kaalubazu ikuyoocitwa nyika yoonse kuyoopa kuti bantu banji babe aluyandisisyo mukuzyiba nkokazwa kasimpe.—Joh. 17:17.
2 Katulakiti aaka kapa bwiinguzi bufwaafwi alimwi butonkomene kumibuzyo eeyi iiyandika kapati iili cisambomwe: “Sena ncobeni Leza ulatulanganya?” “Sena nkondo akupenga kuli noziya kumana?” “Ncinzi cicitika kulindiswe twafwa?” “Sena kuli ncotukonzya kulangila kujatikizya bafwide?” “Mbuti mbondikonzya kupaila mipailo njaswiilila Leza?” alimwi awakuti: “Mbuti mbondikonzya kukkomana mubuumi?” Zikombelo zya Bunakristo Bwanyika kunyina nozyapa bwiinguzi bwini-bwini kumibuzyo eeyi. Nobaba bantu banji batalyaambi kuti Mbanakristo balazyingwa kujatikizya twaambo ootu, pele inga kabatazyi kuti bwiinguzi bulimvwisya bulajanwa mu Bbaibbele. Aboobo, tulangila kuti mulumbe ooyu uyoobakkomanisya bantu banji.
3 Amubeleke Mucilawo Canu Coonse: Amusoleke kubeleka mucilawo ncomukonzya kubelekela kuŋanda aŋanda ikuti kacikonzyeka. Ikuti kamujisi cilawo cipati, baalu balakonzya kumukulwaizya kuyaabusiya katulakiti mukuswaya kwakusaanguna aŋanda aatajanika muntu. Tamweelede kuluba kubapa katulakiti kapya basimukobonyoko, basazinyoko, balongwe banu kumilimo naa kucikolo, alimwi abamwi buyo mbomubandika limwi bunji bwaziindi. Ambweni inga mwabikka bubambe bwakuti mukacite bupainiya bwakugwasyilizya mu October naa November. Sena mujisi mwana naa muntu ngomwiiya limwi Bbaibbele walo uuyaambele kumuuya alimwi uunga weelela kutola lubazu mukwaabila katulakiti aaka kali sikumwaya uutanabbapatizyigwa? Ikuti naa nkwali, amubazyibye baalu.
4 Ncomukonzya Kwaamba: Ikutegwa mukambaukile bantu banji, inga cabota kuti kamuufwiinsya mubandi wanu lyoonse. Inga mwabuzya buyo mubuzyo omwe akati kamibuzyo iili cisambomwe iili apeeji lyakusaanguna alimwi akubatondezya bamukamwini ŋanda bwiinguzi mukatulakiti. Eeci ciyoogwasya basikumwaya boonse kucinca mubandi wabo kweelana aziyandika mucilawo. Ikuti muntu umwi walibonya kubikkila maanu, amulembe zyina lyakwe alimwi ampakkala alimwi akuyoomuswaya muntu ooyo alimwi. Mumazuba aamu Mujibelo amu Nsondo, mulakonzya kwaabila mamagazini aakumwaya mumyezi eeyi alimwi akatulakiti. Twaakumana kwaabila katulakiti aaka mu November 16, tuyakwaabila bbuku lya Bbaibbele Ncoliyiisya. Matulakiti aali woonse aayoosyaala ayoobelesyegwa mbubwenya mbotubelesya matulakiti aamwi buyo aaliko.
5 Amutalisye Ciiyo ca Bbaibbele: Katulakiti aaka kakabambilwa kutugwasya kutalisya ziiyo zya Bbaibbele. Ciindi nomupilukila kumuntu wakatondezya luyandisisyo, inga mwabuzya kuti: ‘Makani nzi aakasimpe kamu Bbaibbele aakamuumbulizya naa kumukatalusya?’ Amumutondezye peeji lyamamanino bubambe bwaciiyo ca Bbaibbele mpobupandulwidwe, alimwi akumwaabila bbuku lya Bbaibbele Ncoliyiisya. Ikuti kacikonzyeka, amubandike muncali omwe naa yobile mubufwaafwi iili mucibalo cijisi twaambo tupandulula kaambo nkaasala.
6 Jehova uyandaula baabo bayoomukomba “mumuuya amubwini.” (Joh. 4:23) Elo kaka inga cabota kuti toonse twatola lubazu mukwaabila katulakiti aaka kaalubazu kutegwa tubagwasye bantu kuzyiba kasimpe!