Amwiibelesye Kabotu Lyoonse
1. Ino tulakiti ya Bwiinguzi Bwakasimpe igwasyilizya buti?
1 Tulakiti yakuti Sena Mulayanda Kuzyiba Bwiinguzi Bwakasimpe? yakabambilwa kutugwasyilizya kutalisya ziiyo zya Bbaibbele. Pesi alimwi ncibelesyo cigwasya kumwaya mbuto zya kasimpe. (Muk. 11:6) Njeeyi mizeezo iikonzya kutugwasya kwiibelesya kabotu tulakiti eeyi.
2. Ino inga twaibelesya buti tulakiti eeyi kutalisya mubandi?
2 Kutalisya Mubandi: Mulakonzya kubapa beniŋanda tulakiti eeyi, akubatondezya mibuzyo iili cisambomwe iili apeeji yakusaanguna, akubabuzya kuti: “Ino nguuli mubuzyo ali yeeyi ngomwakalibuzya kale?” Bamana kwiingula, amubandike bwiinguzi bwamu Bbaibbele kumubuzyo wabo kuzwa mutulakiti eeyi, alimwi amubale lugwalo lomwe luli mucibalo. Amubale naa kwaamba buyo mubufwaafwi zili apeeji yamamanino akwaabila bbuku lyakuti Bbaibbele Ncoliyiisya. Nokuba kuti tiibazumina bbuku eeli, batambula kale tulakiti yalo iikonzya kupa kuti kasimpe kamene miyanda mumoyo wabo.—Mt. 13:23.
3. Ino ncinzi ncotukonzya kucita kuti naa beniŋanda bajisi bubi?
3 Ikuti naa Beniŋanda Bajisi Bubi: Mulakonzya kwaamba kuti: “Akaambo kakuti mujisi bubi ndilamusiila tulakiti eeyi. Ijisi mibuzyo iili cisambomwe yalo bunji bwesu njotwakabuzya kale, alimwi ipa bwiinguzi bwakaanzambwene kuzwa mu Bbaibbele. Twaakubonana alimwi inga ndayanda kuyoozyiba ncomuyeeya kujatikizya mibuzyo eeyi.”
4. Notucita bukambausi bwamumugwagwa, ino ncinzi ncotukonzya kwaamba notwaabila tulakiti?
4 Mwani Kucita Bukambausi Bwamumugwagwa: Mulakonzya kwaamba kuti: “Mwapona buti? Sena kuli nomwakabuzyide mibuzyo iili mbuli yeeyi? [Amulindile bwiinguzi.] Tulakiti eeyi itondezya bwiinguzi bwini-bwini bujanwa mu Bbaibbele.” Kuti naa muntu ngomukanana limwi tabindide, mulakonzya kubandika bwiinguzi kuzwa mutulakiti akwaabila bbuku lya Bbaibbele Ncoliyiisya.
5. Ino mbuti mbotukonzya kwiibelesya tulakiti mumaanda motutajani bantu?
5 Mumaanda Motutajani Bantu: Muzilawo zimwi basikumwaya bavwula kusiya mabbuku kunsi aamulyango mumaanda mobatajani bantu. Kuti naa mbomucita oobo kumbungano yanu, ayalo tulakiti ya Bwiinguzi Bwakasimpe mulakonzya kwiisiya kunsi aamulyango. Nomupilukila mulakonzya kwaamba kuti: “Ciindi camana notwakaboolede, tiitwakamujana aŋanda aboobo twakasiya tulakiti eeyi kunsi aamulyango wanu. Ino nguuli mubuzyo ali yeeyi ngomuyanda kuzyiba bwiinguzi?”
6. Ino ncinzi cipa kuti tulakiti ya Bwiinguzi Bwakasimpe ibe cibelesyo cigwasya mubukambausi?
6 Tulakiti ya Bwiinguzi Bwakasimpe ipandulula kasimpe munzila nguba-uba, alimwi cakutainda ambali. Ilabakkomanisya bantu bamuzikombelo zyoonse azilengwa zyoonse. Tiikatazyi kwaabila, nibaba bana abasikumwaya bapya inga bacikonzya. Sena mulaibelesya aciindi ceelede?