Tujisi Cibelesyo Cipya Cigwasya Kutalisya Ziiyo!
1 Imwanakazi umwi muna Amelika wakali lyaabide kapati kucikombelo cakwe ca Katolika. Cakusyomeka wakali kuzikwabilila njiisyo zyacikombelo cakwe. Mane wakeendaa lweendo lwakuya kuswaya munzi wa Vatican ngobaamba kuti ulisalede. Pele mwanakazi ooyu naakaswaigwa aumwi wa Bakamboni ba Jehova kuŋanda yakwe, wakazumina kubaa ciiyo ca Bbaibbele caaŋanda. Nkaambo nzi? Nkaambo kakuti wakali kuyanda kwiiya ncolyaamba Bbaibbele, kayi cikombelo cakwe taakwe nocakali kweendelezya ciiyo ca Bbaibbele caaŋanda. Ino ncinzi ncotwiiya kuzwa kuli ceeci? Ncotwiiya ncakuti, tatukonzyi kuziba yooyo uulangilwa kuzumina ciiyo ca Bbaibbele caaŋanda citabbadelwi.—Muk. 11:6.
2 Sena kuli nomwakawaya-waide ikwaambila bantu kuti tulilibambilide ikwiiya Bbaibbele amuntu uuli woonse uuyanda? Sena aabo boonse mbomukkala limwi balizi kuti mulapa lugwasyo luli boobo kakunyina kubbadelesya? Mbuti mbotunga twasinizya kuti boonse balizi oobo? Kwiinda mukubelesya cibelesyo cipya! Aka nkatulakiti kabotu kapati, ikajisi mapeeji aali cisambomwi alimwi kalaamutwe waamba kuti Sena Mulayanda Kuzyiba Zinji Kujatikizya Bbaibbele? Amukalange-lange katulakiti aaka kutegwa tuzibe zili mukati kwiinda mukulanga mutwe wamukati umwi aumwi.
3 “Nkaambo nzi Ncomweelede Kulibala Bbaibbele?” Itwaambo tupedwe mukatulakiti aaka tulakondelezya kapati. Kalapandulula kuti Ibbaibbele lijisi “malailile aaluyando kuzwa kuli Leza,” aatondezya mbotukonzya kumusikila mumupailo kukumbila lugwasyo alimwi ambotukonzya kutambula cipego cabuumi butamani. (1 Tes. 2:13) Katulakiti aaka kalaamba kujatikizya “twaambo twamasimpe itukatalusya” tusiyene-siyene tujanika mu Bbaibbele mbuli icicitika ciindi twafwa alimwi ancokuli mapenzi manji kapati anyika. Kalapandulula kuti ciindi notubelesya “injiisyo nzyatupede Leza mu Bbaibbele” ziyootugwasya munzila yakumubili alimwi akutupa lukkomano, ibulangizi kubikkilizyaa bube bumbi ibuyandika kapati. Ikatulakiti aaka kalapa akambi kaambo ncotweelede kubala Bbaibbele—ibusinsimi bujatikizya bukkale bwakumbele bwalo butondezya nzyotulangila ino-ino.—Ciy. 21:3, 4.
4 “Lugwasyo Mukuteelela Bbaibbele”: Ikatulakiti aaka kaamba kuti: “Toonse tuyandika lugwasyo mukuliteelela kabotu Jwi lya Leza.” Mpoonya kalapandululaa nzila mbotukonzya kwiiya Bbaibbele: “Ibunji bwaziindi cilagwasya ikwiiya Bbaibbele bucebuce kutalikilaa njiisyo zyantalisyo.” Nokuba kuti kalacisalazya kwaamba kuti “mu Bbaibbele momuzwa njiisyo zyoonse ziyiisigwa,” alimwi katulakiti kalapandulula kuti broshuwa ya Ncayanda njiikonzya kumugwasya “kuteelela Magwalo aabandika zibalo ziindene-indene.” Imutwe wamukati uutobela ulabuzya mubuzyo uukulwaizya.
5 “Sena Mulilisungwide Kutola Ciindi Cili Mbocibede Mvwiki Amvwiki Kutegwa Muliteelele Bbaibbele?” Katulakiti kapandulula kuti, iciiyo ca Bbaibbele cilakonzya kubikkwaa ciindi ncayanda alimwi abusena buli kabotu kuli sikwiiya, kulakonzya kunoocitilwa kuŋanda yakwe antela ikubelesya luwaile. Ino mbaani bakonzya kutola lubazu mumubandi? Katulakiti kaamba kuti “Mukwasyi wanu woonse. Abalo balongwe bali boonse mbomukonzya kutamba balakonzya kutola lubazu. Alimwi ikuti naa mwayanda, imubandi ulakonzya kucitwa andinywe buyo.” Ino muntu uyandika kwiiya kwaciindi cilamfwu buti? Kalapandulula kuti: “Ibanji babikka ambali woola lyomwe kutegwa baiye Bbaibbele mvwiki amvwiki. Ikuti kamukonzya kutola ciindi ciindaawo naa mujisi buyo ciindi cisyoonto amvwiki, kunyina makani Bakamboni bayoomugwasya.” Aaka nkakaambo kayandika kapati! Tulilibambilide ikucinca kweelanaa bukkale mbwajisi sikwiiya umwi aumwi.
6 “Ikutambwa Kukwiiya”: Kuli busena busiidwe aawo sikutambula katulakiti aaka mpakonzya kulemba akulomba broshuwa ya Ncayanda naa kuswaigwa kutegwa tumupandulwide pulogilamu yesu yaciiyo ca Bbaibbele caaŋanda citabbadelwi. Kwatondezyegwa civwumbyo cabroshuwa ya Ncayanda kweelanaa mboliboneka. Sena mwakabona kaambo katulakiti aaka ncokakonzya kubakulwaizya bantu babombe myoyo ikuzumina lugwasyo lwesu? Pele, ino mbuti mbotukonzya kucibelesya kabotu cibelesyo eeci cipya?
7 Ino Mbaani Mbomunga Mwaabila Katulakiti Aaka? Mulakonzya kupa katulakiti aaka kumuntu ngomuyaanya antela kukasiya buyo aŋanda aatako bantu. Katulakiti aaka kalakonzya kumwaigwa kuŋandaa ŋanda, mumugwagwa alimwi amucilawo camakwebo. Amukaabile kubantu kunyina makani naa balaatambula mabbuku eesu naa pe. Amukabikke mukati amamagazini naa mabbuku aamwi buyo ngomuli mukumwaya. Aleelyo nomulemba magwalo amukabikkilizye. Amubabuzye aabo mbomukambaukila kwiinda muluwaile naa inga mwabatumina. Ciindi coonse amubwezelezye matulakiti aali mbwaabede kutegwa kamwaabila bantu ciindi nomuula zintu, nomuli muzyakweendela zyabuleya alimwi aleelyo nomukambauka kwiinda mukwiizya. Amukape kulibaabo ibamuswayaa ŋanda yanu. Amukaabile kubasazinyoko, basimukobonyoko, mbomubeleka limwi, mbomwiiya limwi kucikolo alimwi abeenzinyoko bambi. Amusoleke kwaabila katulakiti aaka kumuntu uuli woonse ngomwayaanya! Ino ncinzi ciyootobela?
8 Ikuti Umwi Wazumina Kwiiya Mpoonya-Mpoonya: Bamwi bantu balazumina mpoonya-mpoonya akwaamba kuti balayanda ikwiiya Bbaibbele. Aboobo kufwumbwa ciindi nomutola lubazu mumulimo wamumuunda, amubone kuti lyoonse mulijisi mabroshuwa obilo aa Ncayanda—lyomwe ndya sikwiiya mpoonya limwi ndilyanu. Ikuti muntu kayanda, amutalike kwiiya mpoonyaawo. Amuvwunune kucivwumbyo nkocili mukati mpoonya akubalaa cibeela cakuti, “Mbwiibelesegwa Broshuwa Eyi.” Mwamana kucita boobo, amuzumanane aciiyo 1 akumutondezya mbotwiiya. Sena taili nguba-uba nzila eeyi?
9 Ikuti Muswiilizi Kayanda Ciindi Cakuti Akaliyeeye: Kakutanainda ciindi cilamfwu, amumuswaye alimwi. Ciindi nomumuswaya lwabili, amubone kuti muliijisi abroshuwa ya Ncayanda. Amumutondezye izili mukati zilembedwe acivwumbyo mucili mukati. Amumuleke asale ciiyo camukonda. Amuvwunune aali makani ngaasala akutalika kubandika.
10 Ikupilukila Ooko Nkomwakasiya Mamagazini: Ikuti kuli nkomwakasiide katulakiti antoomwe amamagazini, mulakonzya kupilukila ooko akwaamba kuti: “Nindakamuswayide ndakamusiila magazini ya Ngazi Yamulindizi. Ndasyoma mwakaubona mutwe wamagazini eeyi waamba kuti Ngazi Yamulindizi Yaambilizya Bwami bwa Jehova. Sunu ndiyanda kuti ndimupandulwide kujatikizya Bwami oobu alimwi ancobuyoomucitila nywebo alimwi amukwasyi wanu.” Mpoonya amuvwunune broshuwa ya Ncayanda aciiyo 6. Kutalikila mumuncali wakusaanguna, amubale akubandika kweelanaa ciindi ncajisi mwiniŋanda. Mwamana amupangane ciindi nomutiikapilukile buzuba bumbi akuzoomanizya ciiyo.
11 Atamumanini Matulakiti: Mulangizi wamulimo alimwi abakwesu balanga mabbuku bayoobona kuti balijisi lyoonse matulakiti aa Kuzyiba Bbaibbele manji mumbungano. Amubikke amwi munkomwe naa mucibbeke, mumootokala, aabusena mpomubelekela, kucikolo, munsi aamulyango waŋanda yanu—ali woonse mpomukonzya kwaajana kufwambaana. Inzya, mutalubi kubikka aamwi mucibbeke canu ncomuunka ancico mumuunda kutegwa kamwaabila bantu mbomukonzya kubandika ambabo kujatikizya Bbaibbele.
12 Jehova Akulongezye Kusoleka Kwesu: Imbaakani njobajisi Banakristo boonse njakuyiisya muntu kasimpe. (Mt. 28:19, 20) Sena mulaa ciiyo ca Bbaibbele caaŋanda ncomuli mukweendelezya? Ikuti kamucita oobo, sena inga mwajana ciindi mumulongo wazintu nzyomucita amvwiki cakunooyeendelezyaa cimbi ciiyo? Ikuti kamuteendelezyi ciiyo lino, masimpe mulayandisya ikunooyendelezya ciiyo ca Bbaibbele. Amumukumbile Jehova kuti amulongezye mukusola kwenu kujana muntu ngomukonzya kunooyiya anguwe. Mwacita boobo, mweelede kubeleka kweelanaa amipailo yanu.—1 Joh. 5:14, 15.
13 Tulijisi cibelesyo cipya cigwasya kutalisya ziiyo! Amuzibe makani aali mumo. Amukaabile kumuntu uuli woonse. Amucite nzyomukonzya ‘kuti mucite milimo iiluzi, kuti mube bavwubi mukumana milimo mibotu, kamufwambaana kupa akwaabilana’ nzyomwaiya kujatikizya Jwi lya Leza.—1 Tim. 6:18.
Kabbokesi kali apeeji 4]
ZIINDI NOMUNGA MWAKAABILA KATULAKITI
◼ Mumisalo yabuzubaa buzuba
◼ Ciindi umwi natambula mabbuku eesu
◼ Ciindi nokutakwe muntu aŋanda
◼ Ciindi notuunka munyendo zyakupilukila
◼ Ciindi notuyaanya muntu mubukambausi bwamumugwagwa
◼ Ciindi notukambauka mucilawo camakwebo
◼ Ciindi notucita bukambausi bwamukwiizya
◼ Ciindi notulemba magwalo
◼ Ciindi notuli muzyakweendela zyabuleya
◼ Ciindi umwi natuswayaa ŋanda
◼ Ciindi notubandikaa basazima, basimukoboma, mbotubeleka limwi, mbotwiiya limwi kucikolo alimwi abeenzuma bambi