Amubelesye Matulakiti Kutalisya Mibandi
1 Sena tamuzumini kuti ikupa bukambausi bubotu kuyeeme kapati akubweza ntaamu kwanu mukutalisya mibandi? Ibuyumuyumu buliko nkwaamba cintu cikonzya kubusya luyandisisyo lwamuntu alimwi akumupa kuti atole lubazu. Pele ino mbuti eeci mbocikonzya kucitwa cabusungu?
2 Basikumwaya banji bajana kuti kwiinda mukubelesya buyo majwi masyoonto aasalidwe kabotu, kwaabila imwi yamatulakiti eesu aapandulula Bbaibbele kulakonzya kutalisya mibandi. Aajisi mitwe yamakani iikondelezya alimwi azifwanikiso zijisi mubala mubotu weebeka kapati. Itulakiti tainyonganyi muntu pe, ikumupa muzeezo wakulimvwa kuti kuli makani manji aayandika kubala. Nokuba boobo, milumbe iigaminina iili mumatulakiti ilakwelelezya alimwi ilakonzya kubelesyegwaa kusololela kuciiyo ca Bbaibbele.
3 Mboobu mbwaakalimvwa Kamboni umwi: “Munyika eyi yakujata bubi, ikanjikanji bantu tabayandi kutola ciindi cilamfwu mukubala, pele matulakiti malamfwu bweelede mukupa mulumbe uuyandika kapati. Taali malamfwu cakuti bantu mbubalangila buyo aalinjiyo, bagusya amizeezo kabatana ibala pe. Ndakabala matulakiti manji, limwi ndakayiya kasimpe.” Mutabi nomuubya-ubya inguzu zya Jwi lya Leza kweelanaa mbokupandulwidwe mumilumbe mifwaafwi eeyi isimbidwe.—Heb. 4:12.
4 Inzila Zyuuba-uba Zyone: Ibanji bazwidilila kwiinda mukubelesya ntalisyo yamakani nguba-uba. (1) Amumutondezye muntu amwi matulakiti ngomujisi alimwi akumubuzya kusala yomwe iikonzya kumubotela. (2) Amana kusala yomwe, amubuzye mubuzyo wakalibambilwa kabotu utondezya kaambo kapati kali mutulakiti. (3) Nomwiingula mubuzyo, amubale muncali weelede naa lugwalo luli mutulakiti. (4) Ikuti naa mwatambulwa kabotu, amuzumanane kubandika zili mutulakiti naa kumutondezya ciiyo mubroshuwa ya Ncayanda naa cibalo mubbuku lya Luzibo cikonzya kupa bupanduluzi buyungizyidwe. Munzila eyi mulakonzya kusololela kabotu muciiyo ca Bbaibbele. Mizeezo iitobela iyoomugwasya kulibambila zyakwaamba kubelesya matulakiti one.
5 Imutwe wamakani watulakiti yakuti, “Mubwini Nguni Ulela Nyika?” ulakonzya kupegwa mbuli mubuzyo.
◼ Ikuti mubwiinguzi muntu ngomukanana limwi waamba kuti “ngu Leza” naa “Tandizyi,” amubale mizila yobile yakusaanguna apeeji 2 alimwi amuncali wakusaanguna apeeji 3. Amukankaizye alugwalo lwa 1 Johane 5:19 alimwi a Ciyubunuzyo 12:9. Kunyina makani naa muntu uladooneka kubako kwa Saatani Diabolosi naa ulazumina kuyunga nkwajisi munyika, mulakonzya kubutobelezya bupanduluzi bujanika mukatwe kasyoonto kakuti “Citondezyo Kuzwa Kuzicitika Munyika” kutegwa muzumanane amubandi. Ikuti watondezya luyandisisyo, amupandulule nkwaakazwa Diabolosi kwiinda mukubelesya twaambo tuli apeeji 3 alimwi a 4 mutulakiti.
6 Tulakiti yakuti, “Ino Bayandwa Bafwide Bajisi Bulangizinzi?” ilakonzya kubusya luyandisisyo mponya-mponya. Mulakonzya kutalisya mubandi kwiinda mukubuzya kuti:
◼ “Sena muyeeya kuti kuli notuyoobabona bayandwa besu bafwide alimwi?” Amana kwiingula muntu, amumutondezye mumuncali wabili apeeji 4 mutulakiti alimwi akubala Johane 5:28, 29. Mponya amupandulule kuti cilagwasya kuteelela makani aali ansi aakatwe kamakani kasyoonto kakusaanguna mutulakiti. Amulombe kuti mukabandike antoomwe.
7 Itulakiti yakuti “Amutangale Abuumi Bwamumukwasyi” ijisi kaambo kakulwaizya kumikwasyi yoonse. Nomubelesya njiyo mulakonzya kwaamba kuti:
◼ “Mulakonzya kuzumina kuti imukwasyi uuli mukulwanwa aano mazuba. Ino muyeeya kuti ncinzi cikonzya kugwasya kuyumya lukamantano mumikwasyi?” Amana kwiingula muntu, amumutondezye twaambo tuli mumuncali wakusaanguna apeeji 6. Amusale lugwalo lomwe luzubulwidwe apeeji 4 alimwi a 5 mutulakiti akupandulula ncolwaamba. Mpoonya amubakulwaizye kubaa ciiyo ca Bbaibbele citabbadelelwi.
8 Itulakiti yakuti “Ikaambo Ncomukonzya Kusyoma Ibbaibbele” ilakonzya kubelesyegwa kwiinda mukwaamba kuti:
◼ “Ibantu banji bakamvwa kujatikizya makani a Kaini alimwi a Abelo, aajanika mubbuku litaanzi lya Bbaibbele. Icibalo mubbuku lya Matalikilo alimwi cilaamba kujatikizya mukaintu wa Kaini. Sena mwalina buzuba mweezeezya mukaintu nkwaakazwa? Amubelesye muncali wamamanino apeeji 2 mutulakiti kutegwa mupe bwiinguzi. Alimwi amupandulule kuti itulakiti lilabandika twaambo tupati-pati twamu Bbaibbele kujatikizya bulangizi mbotujisi bwakumbele. Kutalikilaa mumuncali watatu apeeji 5, amuzumanane amubandi kamubelesya amagwalo aagwasilizya.
9 Ikumwaya matulakiti aabandika Bbaibbele kujisi mpuwo yakugwasya kapati, inzila iigwasya yakukambauka makani mabotu. Akaambo kakuti taakatazyi kubweza kufwumbwa nkomwaunka, mulakonzya kwaabelesya kapati mumulimo wanu wakuŋandaa ŋanda alimwi anomucita bukambausi bwamukwiizya. Matulakiti ajisi lubazu lupati mukuzuzikizya mulimo wesu. Amubone kuti mwabweza aisiyene-siyene alimwi akwaabelesya kabotu mukutalisya mibandi.—Kol. 4:17.