Matulakiti Mapya Aabambidwe Munzila Iikkomanisya!
1. Ino nzibelesyo nzi zipya zyamumulimo izyakabambwa munzila mpya iikkomanisya?
1 Kwakamwaigwa matulakiti mapya amuswaangano wacooko wamu 2013 wakuti, ‘Ijwi lya Leza Nkasimpe!’ Kuyungizya waawo, katulakiti ka Makani Mabotu Na. 38, ikajisi mutwe wakuti “Sena Ncobeni Bafwide Balakonzya Kupona Alimwi?” kayungizyigwa amatulakiti mapya aatobelene. Matulakiti oonse aaya aali cisambomwe abambidwe munzila mpya iikkomanisya. Ino nkaambo nzi ncaabambidwe munzila mpya? Ciindi notwaabila kuŋanda aŋanda, ino mbuti mbotukonzya kwaabelesya kabotu kweelana ambwaabambidwe?
2. Nkaambo nzi ncaabambidwe munzila mpya?
2 Nkaambo Nzi Ncaabambidwe Munzila Mpya?: Kanji-kanji, bukambausi bwakuŋanda aŋanda ibucitwa kabotu, bubikkilizya nzila eezyi zyone: (1) Kubuzya mubuzyo uupa muntu kuyeeya kutegwa mutalisye mubandi. (2) Kubala bwiinguzi buzwa mu Magwalo. (3) Kwaabila cakumwaya kuli mukamwini ŋanda kutegwa abale. (4) Kusiya mubuzyo uuyakwiingulwa ciindi citobela alimwi akupanga bubambe bwakupilukila. Mbwaanga matulakiti aaya abambidwe munzila mpya, cilatugwasya kutobela nzila zyone eezyi.
3. Mbuti mbotukonzya kwaabila matulakiti mapya mumulimo?
3 Mbwaakonzya Kubelesyegwa: (1) Mwamana kwaanzyanya, amumutondezye mukamwini ŋanda mubuzyo uukkomanisya uujisi bwiinguzi bwiindene-indene uuli apeeji yakusaanguna yakatulakiti, akumulomba kuti aambe mbwayeeya. (2) Amukajalule katulakiti, akulanga-langa aalembedwe kuti “Ncolyaamba Bbaibbele”. Amubale lugwalo mu Bbaibbele kuti bukkale kabuzumizya. Ikuti mukamwini ŋanda kajisi ciindi, amulange-lange aalembedwe kuti “Mbomukonzya Kugwasyigwa.” (3) Amwaabile katulakiti alimwi akumukulwaizya kukabala koonse ajana ciindi. (4) Kamutanazwa aŋanda, amumutondezye mubuzyo uuli ansi aamubuzyo wakuti “Ino muyeeya buti?” mpoonya amupange bubambe bwakuyoobandika bwiinguzi bwamu Bbaibbele ciindi ciboola.
4. Mbuti mbotukonzya kwaabelesya matulakiti mapya mulweendo lwakupilukila?
4 Ncuuba-uba kucita nyendo zyakupilukila. Amubelesye magwalo aali kunze aakatulakiti kutegwa mwiingule mubuzyo ngomwakasiya mulweendo lwakusaanguna. Kamutanazwa aŋanda, amutondeke aali cifwanikiso cabroshuwa ya Makani Mabotu, amumutondezye broshuwa mukamwini ŋanda alimwi acibalo citondezyedwe cijisi makani manji kujatikizya nzyomwabandika, mpoonya amumwaabile broshuwa. Ikuti naa wazumina, amupange bubambe bwakuti mukabandike makani aali mubroshuwa ciindi ciboola. Mwacita boobo nkokuti mwatalisya ciiyo ca Bbaibbele! Alimwi muciindi cakwaabila broshuwa, mulakonzya kwaabila katulakiti kamwi alimwi akupanga bubambe bwakuyoobandika amukamwini ŋanda.
5. Ino matulakiti ajisi mulimo nzi mumulimo wesu?
5 Matulakiti alikubelesyegwa mumulimo wesu kwamyaka iinda ku 130. Nokuba kuti abambidwe munzila ziindene-indene alikugwasya mukupa bumboni. Atwaabelesye kabotu matulakiti aaya aabambidwe munzila mpya kugwasya bantu munyika yoonse kulizyiba Bbaibbele.—Tus. 15:7a.