Mbomukonzya Kutalisya Mibandi Kwiinda Mukubelesya Matulakiti

Kuzwa mu January 2018, civwumbyo ca Kabbuku Kamuswaangano Wabuumi Amulimo Wesu wa Bunakristo cali kuba amibandi yacitondezyo. Twali kukulwaizyigwa kubikkila maano kubandika abantu muciindi cakubaabila buyo mabbuku. Kutegwa basikumwaya bagwasyigwe kucinca nzila nzyobabelesya, tuvidiyo twamibandi yacitondezyo twali kututondezya mbotukonzya kutalisya mubandi kwiinda mukubelesya buyo Bbaibbele. Pele sena eeci caamba kuti tatweelede kubelesya zyakumwaya zimbi ciindi notukambauka kuŋanda aŋanda? Peepe. Mucikozyanyo, matulakiti alakonzya kugwasya kapati mukutalisya mibandi. Aboobo tulakonzya kubelesya nzila eezyi zitobela ciindi notubelesya katulakiti kali koonse:

1. Amubuzye mubuzyo uuli atala aacivwumbyo uujisi bwiinguzi bwakusala.

2. Amutondezye bwiinguzi bwamu Bbaibbele ibujanika mulugwalo naa mumagwalo aali atala apeeji lyabili. Ikuti ciindi kacizumizya, amubale akubandika twaambo tumwi ituli mukati mukatulakiti.

3. Amumupe katulakiti mukamwiniŋanda, akumukulwaizya kuti akakabale koonse aakujana ciindi.

4. Kamutanaunka, amumutondezye mubuzyo uuli acibeela cakuti “Ino Muyeeya Buti?” akupangana kuti mukabandike bwiinguzi bwamu Bbaibbele ciindi ciboola.

Mwaakupilukila, amukabandike bwiinguzi mpoonya akusiya mubuzyo uumbi ngomuyoobandika ciindi ciboola. Mulakonzya kusala kusiya mubuzyo uuli awebbusaiti yesu naa kuzwa mubbuku libikkidwe akatulakiti nkokali kumamanino. Mpoonya aciindi ceelede, amukamutondezye broshuwa yakuti Makani Mabotu Aazwa Kuli Leza! naa bbuku limbi lyakwiiya kuzwa mu Zibelesyo Nzyotubelesya Kapati Mukuyiisya.