Mbotukonzya Kwiibelesya Mibandi Yacitondezyo

Kuzwa mu January 2018, mibandi yacitondezyo yali kujanika acivwumbyo ca Kabbuku Kamuswaangano Wabuumi Amulimo Wesu wa Bunakristo. Ino inga twaibelesya buti?

Ciindi Nomupa Makani Aabasicikolo: Mweelede kubelesya mubuzyo, lugwalo alimwi amubuzyo wakubandika ciindi ciboola izili mumubandi wacitondezyo. Nokuba boobo, eeci tacaambi kuti mweelede kubelesya mabala ngoonya aali mukavidiyo kamubandi wacitondezyo. Mulakonzya kubelesya bukkale bwiindene, ntalisyo, nzila iimbi iigwasya kusalazya kaambo alimwi azimbi buyo. Kuyungizya waawo, mulakonzya kwaabila cakumwaya cimwi kuzwa mu Zibelesyo Nzyotubelesya Kapati Mukuyiisya, nokuba kuti malailile aacibeela canu taambi kuti mucite oobo.

Ciindi Nomuli Mumulimo Wamumuunda: Mibandi yacitondezyo yakabambilwa kuti kaitugwasya. Mucikozyanyo, ikuti muntu watondezya luyandisisyo alimwi uyanda kwiiya zinji, mulakonzya kuzumanana amubandi ambweni kwiinda mukubelesya mubandi wacitondezyo calweendo lwakupilukila. Mulakonzya kuucinca mubandi wacitondezyo naa kubelesya nzila imbi yiindene buya. Sena makani aakabelesyegwa mwezi wainda naa lugwalo lwiindene inga bazikkomanina kapati bantu mucilawo canu? Sena kuli cintu icakazwa akucitika naa makani aakaambwa anyuuzi, bantu bakubusena nkomukkala ngobayandisya kubandika? Kufwumbwa nzila njomwasala kubelesya mibandi yacitondezyo, makanze aanu ayelede kuba ‘aakucita zintu zyoonse akaambo kamakani mabotu, kutegwa mwaabile bamwi.’—1Kor. 9:22, 23.