Katulakiti ka Makani aa Bwami Na. 38 Kayakwaabilwa mu November!
1. Ino mibuzyo nzi bantu njobajisi kujatikizya bafwide, alimwi ino iyakwiingulwa buti mu November?
1 Lufwu ngusinkondonyina wabantu, taakwe makani amuntu nzyasyoma. (1 Ko. 15:26) Bantu banji tabazyi nkobabede bafwide, alimwi tabazyi naa bayoobabona alimwi. Akaambo kaceeci, mbungano nyika yoonse ziyootola lubazu mwezi woonse kwaabila katulakiti ka Makani aa Bwami Na. 38, kajisi mutwe wakuti Sena Ncobeni Bafwide Balakonzya Kupona Alimwi? Mulimo ooyu waalubazu wakutamba bantu uyootalika mu November 1. Waakumana mulimo waalubazu wakutamba bantu, katulakiti ka Makani aa Bwami Na. 38 kanoobelesyegwa mumuunda mbuli matulakiti oonse.
2. Ino katulakiti ka Makani aa Bwami Na. 38 kabambidwe buti?
2 Mbokabambidwe: Katulakiti ka Makani aa Bwami Na. 38 kabambidwe munzila yakuti inga kavwungwa kutegwa mutwe wamakani uukkomanisya kaulibonya alimwi amajwi aakuti “Sena inga mwaingula kuti . . . inzya? peepe? ambweni?” Babali kuti bajalula katulakiti ka Makani aa Bwami, banoobona bwiinguzi kumubuzyo uuli ngomutwe wamakani alimwi azisyomezyo izili mu Bbaibbele ncozyaamba kulimbabo. Alimwi bayakubona kaambo ncobakonzya kulisyoma Bbaibbele. Katulakiti ka Makani aa Bwami nkokali kunze kalijisi mubuzyo uukkomanisya uupa babali kuyeeya alimwi akuyanda kwiiya zinji.
3. Ino katulakiti ka Makani aa Bwami Na. 38 kayakwaabilwa buti?
3 Mbokayakwaabilwa: Mulimo ooyu wakwaabila unookozyenye awakwaabila tupepa twakutamba bantu ku Ciibalusyo akumuswaangano wacooko. Baalu bayoobikka bubambe bwakubeleka mucilawo cambungano yabo, kweelana alugwalo ndobakatuminwa lwamu April 1, 2013. Mbungano zijisi cilawo cisyoonto inga zyalomba kugwasya mbungano zili munsi-munsi anzizyo izijisi cilawo cipati. Mwanoobweza matulakiti aa Makani aa Bwami Na. 38, amubweze buyo ngomukonzya kumana mumvwiki yomwe. Mulakonzya kwaabila matulakiti aaya mubukambausi bwakubuleya mwaakumanizya kwaabila kuŋanda aŋanda. Ikuti makkopi oonse aakatulakiti aabilwa kautanamana mwezi, mweelede kwaabila mabbuku aakwaabila mumwezi ooyo. Mubuzuba bwa Mujibelo bwakusaanguna, tuyakubikkila maano kumulimo waalubazu wakwaabila katulakiti kutali kutalisya ziiyo zya Bbaibbele. Kumamanino aamvwiki, inga twaabila amamagazini kuti kaceelela kucita oobo. Sena mwalibambila kuyootola lubazu mumulimo ooyu waalubazu wakwaabila katulakiti?