Kutamba Kwaalubazu
1. lno mulimo wakutamba bantu kumuswaangano wacooko wamu 2014 uyootalika lili?
1 Kuti naa mulibambila kujikila beenzinyoko naa mukwasyi cakulya caalubazu, calo cidula alimwi iciyandika kuti mubeleke canguzu kutegwa mucijike, kweelede kuti inga mwabatamba kucakulya eeci calukkomano. Mbubwenya buyo, kwacitwa milimo minji mukulibambila pobwe lyakumuuya liyoocitika lyamiswaangano yacooko alimwi ayamasi yamu 2014. Kakuceede mvwiki zyotatwe kuti muswaangano wesu utalike, tuyooba acoolwe cakutamba bantu kuti bakajanike. Ino ncinzi ciyootugwasya kutamba bantu cakusangalizya?
2. Ncinzi ciyootukulwaizya kutola lubazu bukkwene mumulimo wakutamba bantu?
2 Tuyookulwaizyigwa kutola lubazu bukkwene mukutamba bantu kuti twayeeya mbotugwasyigwa apobwe lyakumuuya ndyatupa Jehova amiswaangano yesu. (Is. 65:13, 14) Alimwi tweelede kuzyiba kuti kutamba bantu nkotucita amwaka kulabagwasya bantu. Bantu bamwi mbotuyootamba bayooswaangana andiswe. Tacikwe makani naa mbangaye ibayoojanika, pele kusolekesya kwesu ciindi cakutamba bantu kuyootembaula Jehova alimwi akutondezya bwaabi bwakwe.—Int. 145:3, 7; Ciy. 22:17.
3. Mbuti mbotuyakwaabilwa tupepa twakutamba bantu?
3 Kabunga kabaalu keelede kubona mbungano mboikonzya kutamba bantu banji, kubikkilizya naa beelede kusiya tupepa mumaanda mobatajanwa bantu naa kutamba bantu mubukambausi bwakubuleya mucilawo cambungano. Kumamanino aamvwiki inga twaabila tupepa amamagazini kuti kaceelela kucita oobo. Ikuti buzuba bwamu Mujibelo bwakusaanguna bwamwezi bwawida mumazuba ngotunootamba bantu, tuyoobikkila maano kwaabila tupepa twakutamba bantu muciindi cakutalisya ziiyo zya Bbaibbele. Mulimo wakutamba bantu waakumana tunookkomene akaambo kakuzyiba kuti twakatola lubazu cakusangalizya mukutamba bantu banji kuti batusangane kupobwe lyakumuuya ndyaatubambila Jehova!