Kutamba Bantu Cacigaminina
1. Ino mulimo wakutamba bantu kumuswaangano wacooko uyootalika lili?
1 Ikuti kamuyanda kubamba cakulya caalubazu cabanamukwasyi naa balongwe banu, calo ciyandika mali manji alimwi aciindi cilamfwu cakulibambila, kweelede kuti munoosungweede kubatamba. Ncimwi buyo, mulimo mupati wacitwa mukulibambila cakulya cakumuuya ciyoopegwa amuswaangano wacooko ngotulangila. Kakuceede nsondo zyotatwe kuti muswaangano utalike, Jehova watupa coolwe cakutamba bantu kuti bakajanike kumuswaangano ooyu. Ncinzi ciyootugwasya kutamba bantu cabusungu?
2. Ino ncinzi ciyootukulwaizya kutola lubazu cabusungu mumulimo wakutamba bantu?
2 Tuyookulwaizyigwa kutola lubazu mumulimo wakutamba bantu ikuti twazinzibala kuyeeya mpindu njotujana kumalailile aakatalusya Jehova ngatupa amuswaangano wacooko. (Is. 65:13, 14) Alimwi tweelede kuyeeya kuti, mulimo wakutamba bantu ngotucita mwaka amwaka ulagwasya. (Amubone kabbokesi kakuti “Kalagwasya.”) Bantu bamwi mbotutamba kumuswaangano wacooko bayoojanika, nokuba kuti bamwi tabakajaniki. Nokuba boobo, tacikwe makani naa bali bongaye ibaboola, kusoleka kwesu aciindi eeci cakutamba bantu kulamutembaula Jehova alimwi kutondezya mbwali mwaabi.—Int. 145:3, 7; Ciy. 22:17.
3. Ino tupepa twakutamba bantu tuyakwaabilwa buti?
3 Kabunga kabaalu kamwi akamwi keelede kubona mbungano mboikonzya kwaabila tupepa tunji twakutamba bantu, alimwi akuti naa beelede kusiya tupepa mumaanda mobatajanwi bantu naa kubapa mubukambausi bwakubuleya mucilawo cambungano. Kumamanino aamvwiki inga twaabila mamagazini atupepa twakutamba bantu ikuti kaceelela kucita oobo. Eelo kaka waakumana mulimo wakutamba bantu, tuyookkomana kuzyiba kuti twakatola lubazu cabusungu alimwi akuti bantu banji bakatusangana kupobwe lyakumuuya ndyaakatubambila Jehova!