Sena Mbungano Yanu Ilijisi Cilawo Cipati Cakukambaukila?
1 Kuzwa kumunzi umwi aumwi waku Judeya kusikila muminzi ya Galileya, Jesu wakakambauka bweelede mucilawo cipati ca Israyeli yansiku. (Mk. 1:38, 39; Lk. 23:5) Andiswe mbweena tweelede kusikila bantu banji mbuli mbotukonzya akubaambila makani mabotu. (Mk. 13:10) Nokuba boobo, ooyu mulimo ulakonzya kuyuma kapati. Nkaambo nzi?
2 Ibunji bwambungano zyili muminzi mu Zambia zijisi zilawo zipati-pati, imakkilomita aasika kumyaanda-myaanda kukomena kwalo. Basikumwaya bakanana mulaka wakunze aacisi cino, balakonzya kubelekela muzilawo mobakonzya kujana bantu banji mwalo mobasola kulangaula baabo baambaula mulaka wakwabo. Ino mbuti mbotukozya kucita ikutegwa tubagwasye bantu bakkala muzilawo zipati kutegwa baiye kasimpe kujatikizya Jehova, Jesu alimwi a Bwami?
3 Amulibambile Kabotu: Mulangizi wamulimo alimwi amubelesi wazilawo beelede kuti kaba weendelezya mulimo uucitwa ambungano kutegwa weende kabotu. Ambweni inga cainda kubota ikuti mazuba aa Mujibelo aba aalubazu akwaabelesyegwa bweelede nkaambo nceciindi banji nobakonzya kubeleka buzuba boonse. Iciindi nomubelekela muzilawo zili kulamfwu, amulibambilile limwi kubeleka kwaciindi cilamfwu mumulimo wamumuunda, ikuti kacikonzyeka amutoleele acakulya camasikati. Mulakonzya kucita muswaangano wakulibambila kuya mumulimo wamumuunda cakufwaambana kacitanasika ciindi ncomucita lyoonse kutegwa mujane ciindi cakuya kooko kucilawo, kwataba boobo, inga mwacitila afwiifwi akooko nkomuya cibelekela. Kamubeleka mutukamu tusyoonto kutegwa boonse bajane maanda akukambaukila. Amulibambile kubelekela muminzi ciindi camwaka nokuca kabotu alimwi amigwagwa noili kabotu.
4 Aboobo, aabo balangaula bantu bakanana mulaka wakunze aacisi cino balakonzya kucibelesya kabotu ciindi ciyandika kapati kwiinda mukuba amulongo wamazina, makkeyala alimwi amaapu. Amulange-lange cilawo kutegwa eeyi nkamu ikonzye kusikila baabo balaamakkeyala aayo ngobajisi.
5 Amubone kwaamba kuti mulijisi mabbuku manji. Ikuti cilawo kacitabelekwi-belekwi, inga cainda kubota kusiya katulakiti naa magazini yakaindi kulibaabo batajanwa aŋanda. Amwaabile katulakiti kakuti Sena Mulayanda Kuzyiba Zinji Kujatikizya Bbaibbele? kuli woonse ngomwayaanya alimwi amusiye komwe amunzi mpomwatajana bantu.
6 Amubelekele Antoomwe: Kubelekela mucilawo cipati ciyanda kukamantana kwaboonse ibali mumbungano. Ikuti babelesya mootokala naa bbaasi, aabo baunka balakonzya kusangilana mali. Kubelesya bupampu kulayandika iciindi nomujana basiŋanda balibambide kukanana. Kamuyeeya kuti mweelede kubasikila bantu boonse bali mucilawo alimwi kamuyeeya aciindi ncimwapangana cakujokela kutegwa beenzyinyoko batalemi kulindila mwayanda kujoka kumunzi. Ikuti kamuyanda kuzumanana kubandika kwaciindi cilamfwu amuntu ooyo watondezya luyandisisyo, sena inga tamukonzyi kucita bubambe kutegwa aabo mbomulilimwi bakonzye kuzumanana mumulimo wamumuunda?
7 Amulibambile kutegwa mukabaswaye aabo bakatondezya luyandisisyo. Ikuti migwagwa yakumunzi kiitajisi mazina naa maanda kaatajisi manamba, cabunkutwe amuzekaule maapu nikuba kulemba cikonzya kumuzyibya kutegwa mukacikonzye kubaswaya baatondezya luyandisisyo munyendo zyakupilukila.
8 Elo kaka tulaacoolwe cakuccilila malailile aa Jesu aakuti: “Nimunjila mumunzi umwi aumwi, nimuba mukanzi kamwi akamwi, amuyandaule muntu umwi wamumo uuelede”! (Mt. 10:11) Masimpe Jehova uya kumuleleka kukusoleka nkomucita kubeleka cakulisungula mumulimo ooyu uuyandika kapati!