Amube Amuuya Wabupainiya
1. Ino mbuti mbomukonzya kuupandulula muuya wabupainiya?
1 Nokuba kuti balakonzya kubeleka kabali bapainiya naa pe, boonse basikumwaya ba Bwami balakonzya kutondezya muuya wabupainiya. Boonse bayanda kutobela lulayo lwakukambauka akugwasya bantu kuti babe basikwiiya. (Mt. 28:19, 20; Inc. 18:5) Balababikkila maano bantu alimwi balalyaaba kutegwa bazuzikizye mulimo wabo. (Mt. 9:36; Inc. 20:24) Babelesi ba Jehova balilisungude kucita kufwumbwa eeco ciyandika kugwasya bantu kwiiya kasimpe. (1 Kor. 9:19-23) Atulange-lange cikozyanyo camuntu umwi wakatondezya muuya uli boobo uutegwa Filipo mukambausi.
2. Ino mbuti baalu alimwi abakutausi mbobakonzya kwiiya busungu bwa Filipo mumulimo?
2 Kukambauka Alimwi Akuyiisya: Filipo wakali kwiilanganya mikuli mipati kapati mumbungano yamumwaanda wamyaka wakusaanguna. (Inc. 6:1-6) Nokuba boobo, wakali mukambausi uusungweede wamakani mabotu. (Inc. 8:40) Aboobo sunu nobalanganya mikuli yabo njobapedwe, baalu alimwi abakutausi balakonzya kutondezya muuya wabupainiya kwiinda mukusololela mumulimo cabusungu. Eeci cilauyumya muuya mumbungano!—Rom. 12:11.
3. Ino mbuti mbotukonzya kutondezya muuya wabupainiya notupenzyegwa?
3 Naakafwa Stefano, kupenzyegwa kwabasikwiiya kwakaya ambele cakuti kwakapa kunyongana kapati. Nokuba boobo, Filipo wakazumanana kukambauka alimwi wakabeleka kapati mukutalisya mulimo wabukambausi kubana Samaria. (Inc. 8:1, 4-6, 12, 14-17) Tulakonzya kwiiya cikozyanyo cakwe kwiinda mukuzumanana kwaambilizya makani mabotu notupenzyegwa anotukambauka kakunyina kusalulula kuli boonse mbotuyaanya.—Joh. 4:9.
4. Ino ncikozyanyo nzi Filipo ncaakapa cakuba mwiiyi?
4 Inzila ya Filipo mbwaakali mwiiyi wa Jwi lya Leza ilakonzya kubonwa kuzwa kuli ceeco cakacitika kukusanduka kwamuzibe waku Etiopiya. (Inc. 8:26-38) Ikucikonzya kubelesya Bbaibbele alimwi ‘akubandika makani aamu Magwalo,’ nenzila aimwi njotukonzya kutondezya muuya wabupainiya. (Inc. 17:2, 3) Mbubonya mbuli Filipo, tuyanda kukambauka makani mabotu kuli koonse bantu nkobakonzya kujanika alimwi amuciindi coonse ceelede.
5. Ino ncinzi cikonzya kubagwasya bazyali Banakristo kukulwaizya muuya wabupainiya mubana babo?
5 Mumukwasyi Alimwi amu Mbungano: Mbwaakali kuzilanga zintu Filipo alimwi acikozyanyo cakwe, kakunyina akudooneka zyakabakulwaizya bana bakwe basimbi. (Inc. 21:9) Mbubwenya buyo, bazyali Banakristo babikka zintu zya Bwami kumbele mubuumi bwabo, bakulwaizya bana babo kucita mbubwenya. Nokuba kuti bazyali balalema yamana nsondo akaambo kamilimo yakumubili, muzyali uuyandisisya kukambaukila bantu ulakonzya kuujatikizya moyo wamwana kwaciindi cilamfwu.—Tus. 22:6.
6. Ino mbuti mbotukonzya kubalumba bapainiya mumbungano yesu?
6 Filipo wakatamba Paulo a Luka, Banakristo basungu bakali kubeleka canguzu mumulimo wa Jehova. (Inc. 21:8, 10) Ino mbuti mbotukonzya kulumba alimwi akupa lugwasyo kubantu basungu mazubaano? Ambweni inga twabeleka abapainiya mafwumofwumo naa kumazuba mubuzuba bantu banji nobataunki lyoonse kumulimo wamumuunda. (Flp. 2:4) Tulakonzya kubatamba kumaanda eesu kuti tuyumizyanye. Kufwumbwa naa bukkale bwesu buli buti, toonse atusolekesye kutondezya muuya wabupainiya.