Ciindi ca Ciibalusyo—Nciindi Cakuyungizya Mulimo
1. Ino “mapobwe aa Jehova” akabajatikkizya buti bana Israyeli bakali kuyoowa Leza?
1 Kuziindi zibikkidwe mumwaka, bana Israyeli bansiku bakali kusekelela “mapobwe aa-Jehova.” (Lev. 23:2) Ikuba aciindi cakuzinzibala kuyeeya abubotu bwa Leza wabo kwakapa kuti bakkomane alimwi kwakabakulwaizya kusungwaalila bukombi busalala.—2 Mak. 30:21–31:2.
2, 3. Nkaambo nzi ncocili kabotu ikuyungizya mulimo wesu wakumuuya lyaciindi ca Ciibalusyo, alimwi ndilili notuyoocita Ciibalusyo?
2 Imazubaano, imilimo yesu iikkomanisya yeendelezyegwa a Leza ilayindila kuyaambele mwaka amwaka lyaciindi ca Ciibalusyo. Nceciindi ncotuzinzibala kuyeeya acipego citalikomeneni Jehova ncaakatupa—Imwanaakwe simuzyalwa alikke. (Joh. 3:16; 1 Pet. 1:18, 19) Notuzinzibala kuyeeya aluyando ndwaakatondezya Leza a Mwanaakwe, tulakulwaizyigwa kumutembaula alimwi akusolekesya kapati kucita kuyanda kwa Jehova.—2 Kor. 5:14, 15.
3 Mwaka uuno, Mulalilo wa Mwami uyoocitwa muli Bwane, March 24, lyaakubbila zuba. Mbuti mbotunga twayungizya mulimo wesu mumyezi ya March, April, alimwi a May?
4, 5. (a) Ncinzi cabagwasya bamwi kukambaukila bantu banji makani mabotu? (b) Ninzila nzi njomwajana kuti ilagwasya mucilawo cenu?
4 Ikukambaukila Bantu Banji: Ikuti kacikonzyeka amujane nzila yakukambaukila bantu banji ciindi nomutola lubazu mumulimo wamumuunda. Sena inga mwabikka bubambe bwakutola lubazu mubukambausi bwaku ŋanda aŋanda ciindi bantu banji nobajanika aŋanda, mbuli kumazuba naa kumangolezya? Ikuti bamwi mukakamu kanu kaciiyo cabbuku kabayanda kutola lubazu mumulimo wamumuunda kacitanatalika ciiyo, imulangizi waciiyo cabbuku inga wabikka bubambe bwakuba amuswaangano kwakaindi kasyoonto wamu mulimo wamumuunda kutegwa babelekele mucilawo cili afwaafwi.
5 Aimwi nzila yakukambaukila bantu banji njakukambaukila mumasena aabuleya. Umwi mucizyi ku Japan wakali kuyanda kubeleka mulimo wabupainiya bwakugwasyilizya nokuba kuti wakalijisi mulimo wakumubili waciindi coonse. Imwaalu wakamwaambila kuti abuzuba katanaunka kumulimo wakwe, kacita bukambausi bwamumugwagwa munsi lya citisyini cacitima. Naakazunda bukandu mbwaakajisi alimwi akusampaulwa abasikukkwela citima bamwi, wakaba abantu bakutolela mamagazini lyoonse ibali 40, kubikkilizya abasikukkwela citima, bantu babelekela acitisyini cacitima, alimwi abasizintoolo zyakali afwaafwi. Wakaabila mweelwe waakati-kati wamagazini aali 235 amwezi. Kwiinda mukwaambila bantu twaambo twamu Magwalo kwaciindi cisyoonto buyo abuzuba, wakacikonzya kutalisya ziiyo zya Bbaibbele zili cisambomwe.
6. Mbuti bakubusi mbobanga bayungizya mulimo wabo wakumuuya?
6 Ziindi Zyakupa Bumboni: Ibunji bwabasikumwaya ibacili acikolo balaba aziindi zyakulyookezya mumwaka. Eezyi inga zyaba ziindi zibotu zyakubeleka mulimo wabupainiya bwakugwasyilizya. Kunze lyaboobo, bakubusi Banakristo balakonzya kuyungizya mulimo wabo kwiinda mukupa bumboni kucikolo. Inga mwagambwa ikubona mbobabikkila maano mbomwiiya limwi nomwaamba zyalusyomo lwenu. Amubelesye ciindi nomuba amibandi yamukkilasi naa nomulemba mulaso ikupa bukamboni. Ibamwi bacikonzya kucita oobo kwiinda mukubelesya mavidiyo eesu. Ibambi batalisya ziiyo zya Bbaibbele abasicikolonyina alimwi babagwasya kuyaambele mane kukulyaaba akubbapatizyigwa. Eezyi nenzila zibotu kapati ‘zyakutembula izina lya Jehova.’—Int. 148:12, 13.
7. (a) Ino mbuti umwi mukwesu mbwaakacibelesya ciindi cakwe kukambaukila bamwi? (b) Sena kuli nomwakacitikilwa cintu cili boobu?
7 Nomucita zintu abuzuba, amujane nzila zisiyene-siyene kutegwa mwaambile bantu kujatizya Leza wesu uugambya alimwi azisyomezyo zyakwe zitaliboteli. Mukwesu umwi uukkwela zitima abuzuba ulapa bumboni kuli basilweendonyina eelyo nokukonzyeka. Mucikonzyanyo, ciindi naakali kulindila citima acitisyini, wakakambaukila mulombwana umwi kwamaminiti aatandila kuli osanwe buzuba bumwi abumwi. Cakazwawo ncakuti, mulombwana ooyo amweenzinyina bakazumina kwiiya Bbaibbele. Ciiyo ca Bbaibbele cakali kucitwa kabatantide citima mulweendo lwabo. Nokwakainda mazuba aali mbwaabede, bacembele bamwi bakali kuswiilila kumubandi wabo bakasikila mukwesu ooyu akumulomba kuti kabayiiya Bbaibbele. Abalo balacikkomanina ciiyo mumazuba ngobakkwela citima. Munzila eeyi mukwesu ooyu wayiiya abantu ibali kkumi mucitima.
8. Nimbazu nzi zya mulimo izinga zyagwasya baabo ibalezya mumbazu zimwi akaambo kakukomena naa kuciswa kuyungizya mulimo wabo?
8 Ino mbuti kuti kamulezya mumulimo wanu akaambo kakukomena antela kuciswa? Ambweni inga kakuli nzila zimwi momunga mwayaambele kutegwa mutembaula Jehova. Sena mwakasoleka kucita bukambausi bwaaluwaile? Ikuti kamutazyi kabotu mbomunga mwacita oobo, amumwaambile mulangizi waciiyo cabbuku. Ambweni inga wacita bubambe bwakuti mubeleke abasikumwaya baibelesya nzila eeyi. Kwiinda mukubeleka abamwi inga mwapana maano alimwi akugwasyanya kutegwa mupe bukamboni bugwasya.
9. Mbuti mbotukonzya kugwasya basikwiiya Bbaibbele kweelela kutola lubazu ambungano mumulimo uucitwa kubuleya?
9 Ikujanika ku Ciibalusyo kulakonzya kukulwaizya bapya ikuyanda kuyaambele mukutembaula Jehova. Mulakonzya kubagwasya kumana bukandu mbobakonzya kuba ambubo kujatikizya kutola lubazu mumulimo wakukambauka kwiinda mukuluula zintu zikulwaizya zyakamucitikila mumulimo alimwi akuzumanana kubayiisya mbobanga bapandulula njiisyo zyamu Bbaibbele akuba bantu balibambilide kwaamba zyalusyomo lwabo. (1 Pet. 3:15) Ikuti sikwiiya Bbaibbele waamba kuti uyanda kutalika kumwaya makani mabotu, amukanane a mulangizi weendelezya. Uyoobikka bubambe bwakuswaangana a sikwiiya ikutegwa kulangwe-langwe naa uleelela kutola lubazu ambungano mumulimo uucitwa kubuleya. Masimpe, cilamukkomanisya Jehova ikubona bantu bapya nkobayima kulubazu lwakwe mbwali mwami wakoonse-koonse!—Tus. 27:11.
10. (a) Ino mbuti mulongo uuli kabotu mboukonzya kutugwasya kucita bupainiya bwakugwasyilizya? (b) Sena mwakacikonzya kulibambila kucita bupainiya bwakugwasyilizya mwaka wainda lya ciindi ca Ciibalusyo? Mbuti mbomwakacita oobo?
10 Sena Inga Mwacita Bupainiya Bwakugwasyilizya? Mweelwe wamawoola aali 50 uuyandika ku bapainiya bakugwasyilizya weelede kubikkilwa maano kapati. (Mt. 5:37) Eeci caamba kuti muyooyandika kulibambila kutola mweelwe waakati-kati wamawoola aali 12 mumulimo wamumuunda amvwiki. Sena umwi wamilongo yacitondezyo yabupainiya bwakugwasyilizya iili apeeji 5 uleendelana abukkale bwanu? Ikuti naa pe, sena inga mwabamba mulongo uunga wamupa kuti mucite bupainiya bwakugwasyilizya mu March, April, antela May? Amumulombe Jehova kutegwa alongezye kusoleka kwanu kwakuyungizya mulimo wenu.—Tus. 16:3.
11. Mbuti ibaalu alimwi abakutausi mbobanga bagwasya baabo bayoobeleka kabali bapainiya bakugwasyilizya?
11 Ibaalu alimwi abakutausi bayoomugwasya kapati mukusoleka kwenu kwakucita kuti ciindi ca Ciibalusyo cikabe ciindi caalubazu cakutembaula Jehova. Kulangilwa kuti ibunji bwabo bayooubeleka mulimo wabupainiya bwakugwasyilizya. Kweelana abukkale, baalu bayoobikka bubambe bwakuba amiswaangano iiyungizyidwe yakulibambila kuunka mumulimo, kuciindi cakumazuba, mangolezya mukati kamvwiki, alimwi akumamanino amvwiki. Nobalanga-langa ciindi alimwi abusena miswaangano iili boobo nkoyinoocitilwa alimwi abanoojanika kutegwa kabasololela, ibaalu inga babandika abaabo ibajisi makanze aakucita bupainiya naa ibalombozya kucita oobo. Ibaalu bayoosolekesya kubikka bubambe bwakuti kakujanika basikumwaya mbomunga mwabeleka limwi mumazuba alimwi aziindi nzyomubikkide zya kuunka mumulimo. Munzila eeyi, makanze alakonzya kuzuzikizyigwa alimwi zinji zilakonzya kucitwa.—Tus. 20:18
12. Ncinzi citukulwaizya kutembaula Jehova lyoonse?
12 Amubeleke Kusikila Mpomugolela: Ikuti bukkale bwanu tabumuzumizyi kucita bupainiya bwakugwasyilizya, kamuyeeya kuti Jehova ulatambula mulimo ngotubeleka canguzu akulyaaba ‘kweelana anzyotujisi, ikutali nzyotutajisi pe.’ (2 Kor. 8:12) Tulijisi twaambo tunji ncotweelede kulumba Jehova. Anu Davida ncaakalembela kuti: “Nootembaula Jehova kuziindi zyoonse, intembauzyo zyakwe zilaba mukanwa lyangu lyoonse.” (Int. 34:1) Aayo aabe makanze eesu lya ciindi eeci ca Ciibalusyo.
Kabbokesi kali apeeji 3]
Mbuti Mbomuyooyungizya Mulimo Wenu?
◼ Kukambauka bantu nobali aŋanda
◼ Kukambaukila mumasena aabuleya
◼ Kupa bumboni kumilimo naa kucikolo
◼ Kucita bukambausi bwaaluwaile
◼ Kubeleka kandili mupainiya wakugwasyilizya
Ccaati iili apeeji 5]
Bubambe Bwaciindi Cabapainiya Bakugwasyilizya—Izikonzyanyo Izitondezya Mbokubambwa Ciindi ca Mulimo Wamumuunda Camawoola Aali 12 Amvwiki
Mafwumofwumo—Muhhulo Kusikila Mujibelo
Buzuba bwamu Nsondo bulakonzya kubelesyegwa muciindi cabuzuba buli boonse
Buzuba Ciindi Mawoola
Muhhulo Mafwumofwumo 2
Bwabili Mafwumofwumo 2
Bwatatu Mafwumofwumo 2
Bwane Mafwumofwumo 2
Bwasanu Mafwumofwumo 2
Mujibelo Mafwumofwumo 2
Mawoola Oonse Antoomwe: 12
Mazuba Obile Aazwide
Kufumbwa mazuba obile alakonzya kusalwa mumvwiki aimwi. (Kweelana amazuba aasalwa, ooyu mulongo inga waba buyo amawoola antoomwe aali 48 amwezi.)
Buzuba Ciindi Mawoola
Bwatatu Buzuba Boonse 6
Mujibelo Buzuba Boonse 6
Mawoola Oonse Antoomwe: 12
Mazuba Obile Kumangolezya Alimwi Akumamanino Amvwiki
Kufwumbwa mangolezya aamazuba obile mukati kamvwiki alakonzya kusalwa.
Buzuba Ciindi Mawoola
Muhhulo Mangolezya 11⁄2
Bwatatu Mangolezya 11⁄2
Mujibelo Buzuba Boonse 6
Munsondo Cisela Cabuzuba 3
Mawoola Oonse Antoomwe: 12
Mazuba Otatwe Kumazuba Alimwi a Mujibelo
Buzuba bwamu Nsondo bulakonzya kubelesyegwa muciindi cabuzuba buli boonse.
Buzuba Ciindi Mawoola
Muhhulo Mangolezya 2
Bwatatu Mangolezya 2
Bwasanu Mangolezya 2
Mujibelo Buzuba Boonse 6
Mawoola Oonse Antoomwe: 12
Bubambe Bwangu Ndemwini Bwamu Mulimo
Amusale mweelwe wamawoola kuciindi cimwi acimwi.
Buzuba Ciindi Mawoola
Muhhulo
Bwabili
Bwatatu
Bwane
Bwasanu
Mujibelo
Munsondo
Mawoola Oonse Antoomwe: 12